Read lubukusu Khub. 14 Bible Online

Khub. 14 - lubukusu bible

Khub. 14

¹Nio libuusiana lioosi liayokela. Babaandu balila silo esio.

²Babaandu boosi beng'ulung'unya khu Musa ne Aruni. Boosi baloma bali, “Bwakhabeele bulayi khwafwila mu sibala sia Misiri namwe khufwila mu sichiimi sino!

³Sikila siina Wele Omunyali Owa Bioosi ne akhurera mu sibala sino khwirirwe mwiie. Bakhasi ne babaana befwe bakhatiilwe. Se bwakhabeele bulayi khukobole e Misiri?”

⁴Nio babolanila bali, “Lekha khurobore omwimeelesi mala khukobole e Misiri.”

⁵Nio Musa ne Aruni benama bubweeni bwabwe bwetiila asi ebweeni we libuusiana lie babaandu ba Isiraeli.

⁶Ne Yoshua okhwa Nuni ne Kalebu okhwa Yefune, babili khu ba bayoota sibala esio, batabulaka chingubo chabwe.

⁷Baboolela libuusiana lie babaandu ba Isiraeli bali, “Sibala nisio khwabiriramo nga bayooti, sili sibala silayi lukali.

⁸Wele Omunyali Owa Bioosi ne asiima, alakhuyilayo mala akhuelesie efwefwe sibala esio, nisio kamabeele ne bubuukhi biseleetekhanga.

⁹ Lekha khukhwaukha khu Wele Omunyali Owa Bioosi. Ne mukharia babaandu bamenyile mu sibala esio tawe. Khulabaula bwangu busa. Buliindi bwabwe bwabarurirekho. Wele Omunyali Owa Bioosi ali ne nafwe mukhabaria tawe.”

¹⁰Ne kakhali babaandu boosi beenya khubapa kamabaale. Nio luyali lwa Wele Omunyali Owa Bioosi lwabonekha a liiema lie kumuse khu baandu boosi ba Isiraeli.

¹¹Ne Wele Omunyali Owa Bioosi aaboolela Musa ali, “Babaandu bano bacha khundekelesia khukhwola siise sina? Ne khulwe siise sina nisio bakhalobe khukhusuubila ese, akhaba ne mbakholeele kamayia kano koosi akari wabwe?

¹²Ndabarumira bulwaale bubi mala mbalobe. Ne ndikhukhola ewe obe sibala sili siboofu lundi sie kamaani khubakhila nibo.”

¹³ Ne kakhali Musa aboolela Wele Omunyali Owa Bioosi ali, “Bamisiri bakhaulile kano. Ewe warusia babaandu bano khukhwama mu Bamisiri ne kamaani kowo.

¹⁴Bamisiri bacha khuboolela babaandu bamenyile mu sibala sino. Babaandu bamala khuulila bali ewe Ee Wele Omunyali Owa Bioosi, oli ne babaandu abano. Ewe obonekhanga moni na moni, ne lifuumbi liowo limanga angaaki wabwe. Ne ewe obarangilira mu lukeendo ne lifuumbi kumuusi, ne mu mulilo silo.

¹⁵Nono kaaba bali wira babaandu abano boosi, chikholo chichaulila khu fuma yowo chiicha khuloma chili,

¹⁶‘Wele Omunyali Owa Bioosi se anyala khurera babaandu abano mu sibala nisio abechubila khubaelesia tawe. Elio liakila aberera mu sichiimi.’

¹⁷Nono khusaba Wele Omunyali Owa Bioosi, kamaani kowo kabe kamakali nga ne walaka. Waloma oli,

¹⁸ ‘Ese Wele Omunyali Owa Bioosi ndi kalaa khuba ne lirima, ne endi ne busiime bwa mindali bukali. Mbeelanga bumayaanu ne kamabi. Ne kakhaba kario mbaananga kumunaanio khulwe bumayaanu. Mbaananga kumunaanio kwe bakuuka khu baana, babechukhulu, bisoni ne bimiila.’

¹⁹Nosiima beela bumayaanu bwe babaandu bano, khuloondekhana ne bukali bwe busiime bwowo bwa mindali. Babeele nga wababeela khukhwama nga barura e Misiri khukhwola luno.”

²⁰Nio Wele Omunyali Owa Bioosi akobosia ali, “Nababeleele, nga nilwo osabile.

²¹ Ne kakhali nga nilwo menya, ne nga liloba lioosi ne lilichusibwa luyali lwa Wele Omunyali Owa Bioosi, nichuba ndi:

²²Babaandu bano boosi babona luyali lwase ne kamaya kase niko nakhola e Misiri ne mu sichiimi. Ne kakhali balekha khu khundia mala bakhaka ese khukhwola ekhumi.

²³Nono mbao yesi yesi ocha khubona sibala nisio nalaka bakuuka babwe tawe. Mbao yesi yesi owandekelesia okhasibone tawe.

²⁴ Ne kakhali omukholi wase Kalebu, sikila ali ne roho eyaaukhana ne ali omweyikinwa khwise elala, khamwolisie mu sibala nisio anyoa khubona ne lisaaye liewe licha khunyoola sibala esio.

²⁵Nono sikila Baamaleki ne Bakanaani bamenyilemo mu matooma kobola muchuli mala muche mu sichiimi khubirira khu ngila echa khu Nyanja eya Shamu.”

²⁶Wele Omunyali Owa Bioosi aboolela Musa ne Aruni ali,

²⁷“Babaandu bamayaanu bano bacha khunjeng'ulung'unyakho khukhwola liina? Nauliile khukhwilung'unya khwe babaandu ba Isiraeli.

²⁸Baboolele oli, ‘Nga nilwo emenya, ndibakholela nga nilwo mwaloma.’

²⁹ Mulafwa ne kimibili kienywe kicha khukwa mu sichiimi sino. Buli mulala khwinywe oli ne bukhulu bwe kimiiko kamakhumi kabili ne khukhilakho lundi owabalwa ne babaandu, owelung'unya yesi yesi acha khufwa.

³⁰Mbao yesi yesi ocha khwingila mu sibala, akhaba mulala, nisio nalaka ndi nja khubaelesia mumenyemo tawe. Kalebu okhwa Yefune ne Yoshua okhwa Nuni bong'ene bacha khwingila mu sibala esio.

³¹Ne kakhali babaana benywe nibo mwaloma muli baliba baambe balicha mu sibala nisio mwaloba siliba sisiabwe.

³²Ne enywe mucha khufwila mu sichiimi muno.

³³ Ne lisaaye lienywe licha khuyiyila mu sichiimi muno khulwe kimiiko kamakhumi kane. Balinanisibwa sikila enywe mwalekha khuuba babeyikinwa, khukhwola nga omumaliilisi khwinywe ne afwila mu sichiimi.

³⁴Mucha khunaanisibwa khulwe bumayaanu bwenywe khulwe kimiiko kamakhumi kane, kumwiiko mulala khulwe buli endaalo ndala niio mwarumikhira khuyoota mu sibala. Nio mumanye lirima liase:

³⁵Ese Wele Omunyali Owa Bioosi, ng'ali nalomile. Ng'ali nja khukhola kano khu libuusiana limayaanu lino libuusiane khukhundoba ese. Mu sichiimi muno bacha khwicha khu siakamo. Balifwila mu sichiimi.”

³⁶Nio babaandu balala nibo Musa aruma khucha khukhola buyooti mu sibala bareera elomo embi khu baandu. Bakila babaandu beng'ulung'unya khu Wele Omunyali Owa Bioosi.

³⁷Babaandu abo babareera elomo embi bafwa bulwaale ebweeni wa Wele Omunyali Owa Bioosi.

³⁸Ne kakhali Yoshua okhwa Nuni ne Kalebu okhwa Yefune barama khwaabo babacha nga bayooti be sibala.

³⁹Musa aboolela Baisiraeli boosi niko Wele Omunyali Owa Bioosi aloma. Ne babaandu balila lukali.

⁴⁰Benyokha makhelebeende kumutikhinyi barakikha khucha sibala sie sikulu. Baloma bali, “Lola khuli ano, khulacha abuundu niio Wele Omunyali Owa Bioosi akhulaka sikila khwakholile bumayaanu.”

⁴¹Ne kakhali Musa abareeba ali, “Siina sikila nono ne mulikho mulekha khuria lilaka lia Wele Omunyali Owa Bioosi? Se mucha khukhila tawe.

⁴²Mukhacha tawe mukhola murio mwaulwa ne basiku benywe, sikila Wele Omunyali Owa Bioosi se ali ne nanywe tawe.

⁴³Ebweeneyo Baamaleki ne Bakanaani baliyo. Ne mucha khwirwa sikila enywe mwalekhile Wele Omunyali Owa Bioosi. Wele Omunyali Owa Bioosi se acha khuba ne nanywe tawe.”

⁴⁴Ne kakhali babaandu balekelesia mala bacha boola khungaaki khwe sikulu sie sibala sie bikulu. Bacha ne kakhali Lisanduku lie ndakaano eya Wele Omunyali Owa Bioosi namwe Musa se arura mu kambi tawe.

⁴⁵Nio Baamaleki ne Bakaanani ba baamenya mu sibala esio bekha mala babaula. Babatimania khukhwola e Horima.