Read lubukusu Khub. 15 Bible Online

Khub. 15 - lubukusu bible

Khub. 15

¹Wele Omunyali Owa Bioosi aboolela Musa ali,

²“Boolela babaandu ba Isiraeli oli ne boola mu sibala nisio nja khubaelesia khuba sisiabwe,

³bakhoya bambanila biianwa bie khukhwosia. Biianwa bino bikhoya bibe bie chiuunwa, chimbusi, kamakheese. Bareere biianwa bie khukhwirusia, namwe siianwa sie khukhwosia namwe embosio namwe siianwa sie khukhwolesia nisio echuba namwe chimbosio che biise bibiaroborwa nio bakhole kumuuya kusiimisia Wele Omunyali Owa Bioosi.

⁴Yesi yesi oaana siianwa sie biakhulia aliaana silala khwikhumi sie siikula sie bufu bunosie. Bufu buno bukhatubanisibwe ne kamafura echuupa ndala.

⁵Endali khulwe siianwa sie khunywebwa, echuupa ndala, elikholwa khu buli siianwa sie khukhwosia namwe embosio eya buli limeeme.

⁶Ne limiiku ne liaanwa, khola siianwa sie biakhulia sisioola bibili khwikhumi bie siikula sie bufu bunosie butubaanisibwe ne kamafura echuupa ndala.

⁷Ne khulwe siianwa sie khunywa, mukhaane echuupa ne nusu eye endali kumuuya kusiimisia Wele Omunyali Owa Bioosi.

⁸Ne mulirekekha euunwa nga siianwa sie khukhwosia, namwe embosio, khukhwolesia nisio echuba namwe siianwa sie kumuleembe khu Wele Omunyali Owa Bioosi.

⁹Siianwa sie euunwa esio siliaanwa ne siianwa sie siakhulia sili silala khu bitaru sie siikula sie bufu bunosie butubaanisibwe ne kamafura chichupa chibili.

¹⁰Ne siianwa sie khunywa, mulisiaana ne endali chichupa chibili nga siianwa sisiakholwa ne kumulilo sili sie kumuuya kusiimisia Wele Omunyali Owa Bioosi.

¹¹“Mulikhola murio khu buli euunwa, limiiku, namwe limeeme, namwe emeeme.

¹²Mulikholela buli silala murio khuloondekhana ne bukali bwe biianwa nibio murekekha.

¹³Buli Omuisiraeli akhoyeele akhole ario mu khuaana siianwa sie khukhwosia sisiimisia Wele Omunyali Owa Bioosi.

¹⁴Ne aaba bali omukwa namwe omundu yesi yesi oli nanywe chiselukho choosi amumenyilemo, ne enya khuaana siianwa sie khukhwosia sie silikakha, sisiimisia Wele Omunyali Owa Bioosi, alikhola nga nilwo enywe mukhola.

¹⁵Lilibao lilaka lilala khwinywe ne khu baakwa mu biise bioosi. Baakwa baliba nga enywe ebweeni wa Wele Omunyali Owa Bioosi.

¹⁶ Lilaka liliba lilala khwinywe ne khu baakwa.”

¹⁷Wele Omunyali Owa Bioosi aboolela Musa ali,

¹⁸“Boolela Baisiraeli oli, ne mwola mu sibala nisio ndikho mbayilamo,

¹⁹ne mulia biakhulia bie sibala esio mukhoya mwaana khu Wele Omunyali Owa Bioosi siianwa.

²⁰Khu biakhulia bienywe bie khunyoa, muliaana khu Wele Omunyali Owa Bioosi kumukaati mulala nga siianwa. Mukhakwaule nga siianwa bulayi bwene nga siianwa sie biakhulia biyaaya.

²¹Khu biise bioosi bibiicha, mulichiililila khuaana siianwa sie biakhulia bienywe bie khunyoa.

²²“Ne mwaba ne mwibilila khuria lilala khu malaka kano niko naelesia Musa mukhola muriena?

²³(Koosi niko Wele Omunyali Owa Bioosi amulaka enywe khubirira khu Musa, khukhwama endaalo niyo Wele Omunyali Owa Bioosi aanila kamalaka ne khuchiililila mu selukho chenywe), Mukhola muri:

²⁴Kaaba bali babaandu balekha khuria sikila se baba ne limanya tawe, libuusiana lioosi liliaana euunwa endoro, balikiaana nga siianwa sie khukhwosia, esilikakha esiimisia Wele Omunyali Owa Bioosi. Balikiaana alala ne siianwa sie biakhulia ne siianwa sie khunywa khuloondekhana ne lilaka. Khutasa khwako, baliaana endurume nga siianwa sie bumayaanu.

²⁵Ne omusaayi acha khubayeeta khurusiao bumayaanu, ne bacha khubeelwa bubi bwabwe. Sikila bwaba bubi nibwo bareerire siianwa sie silikakha ne siianwa sie bubi bwabwe khu Wele Omunyali Owa Bioosi.

²⁶Babaandu ba Isiraeli boosi balibeelwa alala ne omukwa obamenyilemo, sikila buli mundu yesi yesi aba mu bubi obwo.

²⁷ “Kaaba bali omundu akhola bubwoni nibwo akhang'aliilemo tawe, anyala aana embusi esubeeni eyoola bukhulu bwe kumwiiko mulala nga siianwa sie bubwoni.

²⁸Ne omusaayi acha khuyeeta khurusiao bubi ebweeni wa Wele Omunyali Owa Bioosi khulwo mundu okholile bubi. Ne omundu oyo acha khubeelwa.

²⁹Mucha khuba ne lilaka lifwaanana khu yesi yesi okhola bubi nakhang'aliilemo tawe, abeele Omuisiraeli, namwe omukwa owamumenyamo.

³⁰Ne omundu yesi yesi okhola bubi ne amanyile abeele Omuisiraeli, namwe omukwa, aba akhomile Wele Omunyali Owa Bioosi, ne aliirwa.

³¹Aliirwa sikila aalekelesia elomo eya Wele Omunyali Owa Bioosi lundi afunake lilaka lia Wele Omunyali Owa Bioosi. Omundu oyo aliirwa. Bubi bwewe buliba khu mwene.”

³²Baisiraeli ne basiili mu sichiimi, banyoola omundu mulala ne alikho areenya chiikhu khu ndaalo eya sabato.

³³Ba bamunyoola bamuyila khu Musa, ne Aruni, ne babaandu boosi.

³⁴Bamura asi we buliindi, sikila se liamanyikhana nilio banyala bamukholela tawe.

³⁵Mala Wele Omunyali Owa Bioosi aboolela Musa ali, “Omundu oyo akhoya werwa. Babaandu boosi bamupe kamabaale bamwirire enje we kambi.”

³⁶Khwako babaandu boosi bamurusia enje we ekambi mala bamupa kamabaale bamwiira nga Wele Omunyali Owa Bioosi ne alaka Musa.

³⁷Wele Omunyali Owa Bioosi aboolela Musa ali,

³⁸ “Boolela babaandu ba Isiraeli banabe buusi khu ndulo khwe chingubo chabwe bufwaane nga buyenje mala rakho lukoye lunyelele lubuusi khu buli luyenje. Bakhoya bakholanga bario buli muselukho chabwe choosi.

³⁹Mulilola khu buyenje obwo mala mukhebulile kamalaka ka Wele Omunyali Owa Bioosi koosi. Nio mukhole ne khulekha lilienya ne liliekoomba lienywe mwabeene nilio mwenya khuloondakho.

⁴⁰Nio mulikhebulila ne khukhola nga kamalaka kase koosi ne kenyekhana. Ne muliba batakatifu khu Wele wenywe.

⁴¹Ese ndi Wele Omunyali Owa Bioosi, Wele wenywe, owamurusia mu sibala sia Misiri, khuba Wele wenywe: Ese ndi Wele Omunyali Owa Bioosi, Wele wenywe.”