Read lubukusu Khub. 16 Bible Online

Khub. 16 - lubukusu bible

Khub. 16

¹ Nono Kora okhwa Isihari, omwichukhulu owa Kohati lundi sisoni sia Lawi aambana ne balala khu baandu be kholo eya Rubeni baba Tatani, Abiramu (ba okhwa Eliabu) ne Oni okhwa Peleti.

²Babaandu bano babukula babemeelesi be Baisiraeli chimia chibili ne kamakhumi karaano, ba bamanyikhana mala baroborwa ne libuusiana lie babaandu.

³Bebuusiana ebweeni wa Musa ne Aruni. Ba baboolela bali, “Mwachiile aleeyi lukali! Libuusiana lioosi lie babaandu lili litakatifu. Buli mulala ali omutakatifu. Ne Wele Omunyali Owa Bioosi ali akari wabwe. Siina sikila enywe ne mweniinia khu baandu ba Wele Omunyali Owa Bioosi?”

⁴Musa nga aulila kano, akwa asi mafumala.

⁵Aboolela Kora ne sipupu siewe sioosi ali, “Kumutikhinyi, Wele Omunyali Owa Bioosi alakhwekesia fweesi naanu oli wewe, ne naanu oli omutakatifu. Oyo niye alirobora alimuchao.

⁶Ewewe ne sipupu siowo bukula bibuumba bie khukhwoseliamo bupani.

⁷Biremo kamanda ke kumulilo mala murekho bibiindu biiunya bulayi, ebweeni wa Wele Omunyali Owa Bioosi kumutikhinyi. Ne omundu niye Wele Omunyali Owa Bioosi akharobore akhabe niye omutakatifu. Mwachile aleeyi lukali baana ba Lawi!”

⁸Musa achilila khuboolela Kora ali, “Rekeeresia, enywe Balawi:

⁹enywe mulola muli lili likhuwa likeekhe Wele owe Baisiraeli khubaaula enywe khukhwama mu libuusiana lie Baisiraeli boosi? Wele Omunyali Owa Bioosi amureera enywe embi khu niye omwene. Enya mumukholele kimilimo mu liiema litakatifu lia Wele Omunyali Owa Bioosi. Enya mukholele babaandu.

¹⁰Nono Wele Omunyali Owa Bioosi amureerire siimbi ne naye omwene alala ne bawandaayo bakhwa Lawi ne nanywe. Ne enywe luno mwenya akhaba busaayi?

¹¹Khwako mwakholile likhasiimisia Wele Omunyali Owa Bioosi tawe khulwe khukhola ekwangwaani yino, ewe ne sipupu sino. Aruni ali siina nio mumweng'ulung'unye?”

¹²Nio Musa arumania khulaanga Tatani ne Abiramu, ba okhwa Eliabu. Ne nibo baloma bali, “Se khwicha ebweeneyo tawe.

¹³Lili likhuwa litiiti ewe khukhurusia mu sibala sia Misiri nisio kamabeele ne bubuukhi biseleetekhanga khukhwirira mu sichiimi muno nio ewe wekhole omwimeelesi wefwe?

¹⁴Khutasa khwako ewe se wakhureera mu sibala nisio kamabeele ne bubuukhi biseleetekhanga, namwe okhakhuakho kamaloba ne kimikuunda kie kimisabibu nga kimiaandu kiefwe tawe. Olikho obea babaandu bano? Se khwicha tawe.”

¹⁵Musa akhalala lukali mala aboolela Wele Omunyali Owa Bioosi ali, “Okhafukiililakho biianwa biabwe tawe. Se nababukulakho akhaba epunda ndala tawe. Se nabakholelakho bubi tawe.”

¹⁶Musa aboolela Kora ali, “Kumuchuli ewewe ne sipupu siowo mukhoya mwiche ebweeni wa Wele Omunyali Owa Bioosi. Aruni yesi acha khubao.

¹⁷Buli sia mulala khwinywe abukule sibuumba siewe mala arekho bibiindu biiunya bulayi. Ne buli sia mulala arere lucho lwewe ebweeni wa Wele Omunyali Owa Bioosi. Bibuumba bioosi bie chimia chibili ne kamakhumi karaano. Aruni yesi acha khureera sibuumba siewe.”

¹⁸Nio buli mundu abukula sibuumba siewe, mala arakho kamanda ke kumulilo ne bibiindu biiunya bulayi. Bema amuliango kwe liiema lie kumuse alala ne Musa ne Aruni.

¹⁹Nio Kora abuusia babaandu boosi balobe Musa ne Aruni amuliango kwe liiema lie kumuse. Ne luyali lwa Wele Omunyali Owa Bioosi lwabonekhela libuusiana lioosi.

²⁰Wele Omunyali Owa Bioosi aboolela Musa ne Aruni ali,

²¹“Yiyaula khukhwama mu libuusiana lino, nio mbabunie bwangu.”

²²Ne Musa ne Aruni benama asi bubweeni bwoola khwiloba mala baloma bali, “Ee Wele, Wele we bie bulamu bioosi omundu mulala anyala akhola bumayaanu bukile ewe okhalalile libuusiana lioosi?”

²³Nio Wele Omunyali Owa Bioosi aboolela Musa ali,

²⁴“Boolela libuusiana linyokhe a maeema ka Kora, Tatani ne Abiramu.”

²⁵Nio Musa, alala ne babemeelesi be Baisiraeli, acha khu Tatani ne Abiramu.

²⁶Aboolela babaandu ali, “Musaba murure a maeema ke babaandu bamayaanu bano. Mukhatilakho sisiindu sili sisiabwe tawe. Ne busa, mukhola murio mwabunila mu bumayaanu bwabwe.”

²⁷Nio benyokha a maeema ka Kora, Tatani ne Abiramu. Tatani ne Abiramu barura enje mala bema amuliango kwe kamaeema kabwe, alala ne bakhasi babwe, ne babaana babwe bang'alia.

²⁸Ne Musa aboola ali, “Luno mulamanya muli Wele Omunyali Owa Bioosi anduma ese khukhola kimilimo kino kioosi ne se lili lilienya liase tawe.

²⁹Kaaba bali babaandu bano bafwa lifwa nga lia buli mundu namwe banyoola butinyu nga bunyoolanga buli mundu, aba Wele Omunyali Owa Bioosi se anduma ese tawe.

³⁰Ne kakhali kaaba bali Wele Omunyali Owa Bioosi akhola sisiindu siiya, mala liloba liasama ne khubamila alala ne bibiindu biabwe, mala bache asi balamu mu sibala sie bafu, nio mulamanya muli babaandu bano baleka Wele Omunyali Owa Bioosi.”

³¹Nga amala khulomaloma, liloba asi we babaandu abo liatikhamo.

³²Liabamila ne babaandu babwe, alala ne sipupu sia Kora ne kimiaandu kiabwe kioosi.

³³Nio nibo ne bibiindu biabwe bioosi besiikha ne bali balamu mu sibala sie makoombe. Liloba liabafuuma, mala babuna khukhwama mu libuusiana lie babaandu.

³⁴Baisiraeli boosi ba baaba siimbi barwandukha chimbilo nga ne baulila ne balikho ne balila. Baloma bali, “Sibala sikhola sirio siakhumila fwesi!”

³⁵Nio Wele Omunyali Owa Bioosi aruma kumulilo kwosia babaandu chimia chibili ne kamakhumi karaano ba baaba ne baana bibiindu biiunya bulayi.

³⁶Nio Wele Omunyali Owa Bioosi aboolela Musa ali,

³⁷“Boolela Eliesa okhwa Aruni, omusaayi arerure bibuumba bie khukhwoseliakho bupani khukhwama khu mulilo mala asalanisie kamanda sikila kali kamatakatifu.

³⁸Bukula bibuumba bie khukhwoseliakho bupani bie babaandu baberwa khulwe bumayaanu bwabwe mala obibasemo kamapaati kafuunikha khu alutare. Khola orio sikila ba biaana khu Wele Omunyali Owa Bioosi. Bili bitakatifu. Biliba simanyisio khu Baisiraeli.”

³⁹Nio Omusaayi Eliesa abukula bibuumba bie kumukasa nibio babaandu baya kumulilo baana. Abibasamo kamapaati ke khufuunikha khu alutare.

⁴⁰Elino liaba likhebusia khu Baisiraeli lili, yesi yesi okhali omusaayi wenju eya Aruni akhecha niio alutare eli khukhwosia bibiindu biiunya bulayi tawe. Akhola ario abuna nga Kora ne sipupu siewe. Kano koosi kekholekha khuloondekhana nga Wele Omunyali Owa Bioosi ne aboolela Eliesa khubirira khu Musa.

⁴¹Ne kakhali endaalo eloondakho babaandu boosi beng'ulung'unyila Musa ne Aruni ne baloma bali, “Mwerire babaandu ba Wele Omunyali Owa Bioosi.”

⁴²Nga ne bamala khubusiana khulwe khuloba Musa ne Aruni, bekhebukha sie liiema lie kumuse mala babona lifuumbi lialifumile, ne luyali lwa Wele Omunyali Owa Bioosi lwabonekha.

⁴³Ne Musa ne Aruni bacha ebweeni we liiema lie kumuse.

⁴⁴Wele Omunyali Owa Bioosi aboolela Musa ali,

⁴⁵“Rura a libuusiana lie babaandu lino, nio mbabunie siise sino. Ne kakhali nibo benama asi.”

⁴⁶Musa aboolela Aruni ali, “Bukula sibuumba siowo sie kumulilo, ramo kamanda ke kumulilo khukhwama khu alutare. Ne omalile orio rakho bibiindu biiunya bulayi. Nio otime nasio khangu niio babaandu bali mala obayeete khurusiao bumayaanu bwabwe. Wele Omunyali Owa Bioosi ali ne lirima likali mala butinyu bwarakiikhe.”

⁴⁷Nio Aruni akhola nga Musa ne amuboolela aatima engila mwituuli lie babaandu. Butinyu bwaba bwarakiikhe khale. Aambia bibiindu biiunya bulayi mala ayeeta babaandu khubeelwa bumayaanu bwabwe.

⁴⁸Eema akari we bafwiile ne balamu mala butinyu bwakama.

⁴⁹Nono babaandu babafwa baba chielefu ekhumi na chine ne chimia saba khutasa khwaabo ba bafwila mu makhuwa ka Kora.

⁵⁰Aruni akobola khu Musa a muliango kwe liiema lie kumuse nga butinyu ne bwawa.