Read lubukusu Khub. 17 Bible Online

Khub. 17 - lubukusu bible

Khub. 17

¹Wele Omunyali Owa Bioosi aboolela Musa ali,

²“Boolela babaandu ba Isiraeli bakhuelesie chisiimbo likhumi na chibili, buli ndala khukhwama khu buli omwimeelesi owe luuya lwa Isiraeli. Andika lisina lia buli mundu khu siimbo yewe.

³Ne andika lisina lia Aruni khu siimbo eye Balawi. Echa khubao esiimbo ndala khu buli omwimeelesi owe luuya.

⁴Ne ochiile mwiiema lie kumuse mala ochire ebweeni we Lisanduku lie ndakaano, niio ese nakaananilanga ne nawe.

⁵Ne esiimbo eyo mundu niye ndobore echa khu sisina. Khwako nja khumalao khukhweng'ulung'unya khwe Baisiraeli khuno khwiwe.”

⁶Musa alomaloma ne Baisiraeli mala babemeelesi babwe boosi bamuelesia chisiimbo, ndala khukhwama mu buli nju choosi likhumi na chibili. Ne esiimbo eya Aruni yosi yabamo.

⁷Mala Musa ara chisiimbo choosi mwiiema lie kumuse ebweeni we lisanduku lie ndakaano eya Wele Omunyali Owa Bioosi.

⁸ Endaalo eloondekho Musa acha mwiiema lie kumuse mala abona esiimbo eya Aruni, owe luuya lwa Lawi, yasisiine. Yaba yasisiine, yareerekho bimuli, ne khukhwamakho kamatuunda kamarobe ka alimondi.

⁹Nio Musa arusia enje chisiimbo choosi khukhwama ebweeni owa Wele Omunyali Owa Bioosi achekesia Baisiraeli boosi mala buli mundu abukula esiimbo yewe.

¹⁰Wele Omunyali Owa Bioosi aboolela Musa ali, “Kobosiamo esiimbo eya Aruni ebweeni we Lisanduku lie ndakaano. Esiimbo eyo ebiikhwe ebe simanyisio khu Baisiraeli be sileka khwise nio wakamie khukhweng'ulung'unya khwabwe. Busa bakhola bario bafwa.”

¹¹Musa akhola ario nga Wele Omunyali Owa Bioosi ne amulaka.

¹²Ne babaandu ba Isiraeli baboolela Musa bali, “Lola khulikho khubuna. Khwabuna fweesi.

¹³Omundu yesi yesi owicha siimbi ne liiema lia Wele Omunyali Owa Bioosi acha khufwa, aba kenyekhana fweesi khufwe?”