Read lubukusu Khub. 18 Bible Online

Khub. 18 - lubukusu bible

Khub. 18

¹Wele Omunyali Owa Bioosi aboolela Aruni ali, “Ewe, basoleeli bowo nende be lisaaye lienywe mulabiiywa khuloondekhana ne kimilimo kie liiema litakatifu. Ne akhaba lundi ewe ne basoleeli bowo mulabiiywa khuloondekhana ne kimilimo kie busaayi.

²Reera balebe bowo, ekholo eye ba raraao eya Lawi, bakhole ne nawe khu khuyeeta wamwene ne basoleeli bowo ne mulikho mukhola kimilimo mwiiema lie buloli.

³Bacha khukhukholela kimilimo ne khukhola kimilimo kioosi kie mwieema. Ne kakhali bakhecha siimbi abiindu bie Abuundu Atakatifu namwe a alutare tawe. Bakhola bario, nibo ne nawe mulafwa.

⁴ Balaambana ne nawe khukhola kimilimo kie mu liiema lie kumuse. Mbao omundu yesi yesi okundi okheeche siimbi ne nanywe tawe.

⁵Ewe ocha khukhola kimilimo kie Abuundu Atakatifu ne alutare, nio lirima lia Wele Omunyali Owa Bioosi lilekhe khukhwicha lundi khu baandu ba Isiraeli.

⁶Naroboore balebe bowo Balawi khukhwama mu Baisiraeli nga siianwa khwinywe. Baanilwe khu Wele Omunyali Owa Bioosi, nio bakhole kimilimo mwiiema lie kumuse.

⁷Ne ewe ne basoleeli bowo mucha khukhola kimilimo kie busaayi kiloondekhana ne alutare ne buli siosi siosi sisiili mukari mwe epasia. Namueleesie kimilimo kie busaayi nga siianwa. Ne omundu okundi yesi yesi owicha siimbi alafwa.”

⁸Wele Omunyali Owa Bioosi aboolela Aruni ali, Nakhuelesie biianwa bioosi nibio Baisiraeli bambelesia ese. Bibiindu nibio Baisiraeli banjaulila bioosi nakhuelesie ewe ne basoleeli bowo nga sitonyi sie kumukabwa kwowo elala.

⁹Ebio bilala bibiowo khukhwama khu biindu bitakatifu bikhosebwa tawe. Buli siianwa siabwe, buli siianwa sie siakhulia ne buli siianwa sie khurusiao bubwoni; nisio bambelesia siliba sisiowo ne basoleeli bowo.

¹⁰Wenyekhana oliile bibiindu bino Abuundu Atakatifu. Be siseecha bong'ene bakhaliekho. Okhoyela obibukule khuba bitakatifu.

¹¹Khutasa khwako, biianwa bibiindi nibio Baisiraeli bambelesia bicha khuba bibiowo. Ndabielesia ewe, ne babaana bowo be siseecha, nende be siikhaana biise bioosi bibiicha. Buli omundu oli omutakatifu munju mwowo anyala aliakho.

¹²Kamafura kamalayi koosi, ne endali endayi yoosi ne biakhulia ne kamatuunda ke khunyoa niko Baisiraeli bambelesia nakhuele ewe.

¹³Bibiaamo bie khunyoa bili mu mikuunda kiabwe kioosi nibio barera khu Wele Omunyali Owa Bioosi biliba bibiowo.

¹⁴Buli siindu siosi mu Isiraeli sisiaebwa khwise sili sisiowo.

¹⁵Buli omwana omubele namwe esaang'i embele niyo Baisiraeli bacha khumbelesia echa khuba eyowo. Ne kakhali ofukiilile kumuruungo kwe khusikula buli omwana omubele, ne kumuruungo kwe khusikula kwa buli esaang'i embele ekhali endakatifu tawe.

¹⁶Bibiindu ebio ne babaandu bakhoyela basikulwe ne bali ne bukhulu bwe kumwesi mulala. Basikule khulwe kumuruungo kwe bitonyi biraano bie chishekeli che efwesa, khuloondekhana ne sikelo sie Abuundu Atakatifu.

¹⁷Ne kakhali emoosi embele ne limeeme libele, ne meeme embele, okhachisikula tawe, sikila chili chindakatifu. Ocha khuanya kamalasile kacho khu alutare. Lundi ocha khwosia kamafura kacho nga siianwa sili esilikakha eyisiimisia.

¹⁸Ne kakhali chinyama chacho chiliba chichenywe nga sitindimilo ne nyama eye sietakho sie lubeka luseecha siaanwe khwinywe.

¹⁹“Biianwa bioosi bitakatifu nibio Baisiraeli baana, nakhuelesie ewe ne basoleeli bowo, alala ne bakhaana bowo. Nakhuele nga siianwa biise bioosi. Yino eli ndakaano eya chumbe mindali na mindali niyo kholile ne nawe ne lisaaye liowo.”

²⁰Ne Wele Omunyali Owa Bioosi aboolela Aruni ali, “Se ocha khubakho ne kumukabwa mu sibala siabwe tawe. Namwe se ocha khubakho ne sitonye siosi siosi mu nibo tawe, Ese niye sitonyi siowo lundi kumukabwa kwowo mu baandu Baisiraeli.”

²¹ Wele Omunyali Owa Bioosi aloma ali, “Naelesie Balawi buli siianwa sie likhumi nisio Baisiraeli bambelesia. Kuno kuli kumuruungo khulwe kimilimo kiabwe kie mwiiema lie kumuse.

²²Ne khukhwama luno khuchiililila, Baisiraeli bakhechakho embi ne liiema lie kumuse tawe, ne busa becha banyoolekhana ne bubwoni mala bafwa.

²³Ne kakhali Balawi bong'ene bacha khukhola kimilimo mwiiema lie kumuse ne khusuta bubwoni bwe Baisiraeli. Lino lili lilaka lia mindali khu selukho choosi. Balawi se bacha khubakho ne kumukabwa mu Isiraeli tawe.

²⁴Sikila nabaeleesie sitonyi sie ekhumi nisio Baisiraeli bambelesia nga siianwa siase. Elio nilio likila ne ndaka ndi se bacha khubakho ne kumukabwa mu Isiraeli tawe.”

²⁵Wele Omunyali Owa Bioosi aboolela Musa ali,

²⁶“Lundi olaboolela Balawi oli, ‘Ne munyoola khukhwama khu Baisiraeli siianwa sie ekhumi nisio Wele Omunyali Owa Bioosi amuelesia enywe, mukhoya murusie siianwa khu Wele Omunyali Owa Bioosi. Siianwa esio siikhoya sibe sie ekhumi eye siianwa sie khumi nisio munyoola.

²⁷Siianwa sienywe Sicha khuba nga siianwa nisio Omulimi arusia khulwe biakhulia biyaaya ne endali embia khukhwama mwiloo lie khusuuriramo endali.

²⁸Nio mwesi mucha khuaanila Wele Omunyali Owa Bioosi siianwa khukhwama khu biianwa bioosi bie ekhumi bienywe nibio munyoola khukhwama khu baandu ba Isiraeli, mala khukhwama mu nibio mucha khuaana biianwa bia Wele Omunyali Owa Bioosi bino khu musaayi Aruni.

²⁹Khukhwama khu biianwa bioosi nibio munyoola, mucha khuaana buli siianwa sisienyekhana siaanwe khu Wele Omunyali Owa Bioosi. Aana khu Wele Omunyali Owa Bioosi siianwa silayi khu bioosi nibio munyoola.

³⁰Ne mumalile khuaana sitonyi silayi khu Wele Omunyali Owa Bioosi, munyala mwabiikha biramire, nga nilwo omulimi ne abuunga biramire enyuma ne amalile khuaana siianwa siewe.

³¹Ne nono munyala mwalia siramire, enywe ne babaandu be chinju chenywe. Munyala mwalila abuundu osi osi, sikila kuli kumuruungo kwenywe khulwe kimilimo kienywe kie mwiiema lie kumuse.

³²Se mucha khubakho ne bubwoni ne mulia tawe, ne mumalile khuaanila Wele Omunyali Owa Bioosi silayi. Ne mukhola murio aba se mwanyaalutisie bibiindu bitakatifu bie Baisiraeli tawe. Ne lundi ne mukhola murio se mulafwa tawe.’ ”