Read lubukusu Khub. 19 Bible Online

Khub. 19 - lubukusu bible

Khub. 19

¹Nono Wele Omunyali Owa Bioosi aboolela Musa ne Aruni ali,

²“Elesia Baisiraeli lilaka lino: Baboolele bareere ekhaafu emasoti embesemu ekhalikho ne bubi namwe buleme tawe lundi niyo bakharakho lichooki tawe.

³Ne balakielesia Omusaayi Eliesa. Omusaayi akirusie enje we ekambi mala bakirire ebweeni wewe.

⁴Nio Omusaayi Eliesa abukule malala khu malasile kayo ne lulwala lwewe aanye ebweeni we liiema lie kumuse khukhwola kamakhabi saba.

⁵Ne emasoti eyo yoosi alala ne lisielo liayo, enyama, kamalasile ne kamala, biosebwe bioosi ebweeni wo omusaayi.

⁶Nio Omusaayi abukule lukhu lwe kumutarakwa, ne lusaala luleeyi ne engubo embesemu eye bufuumbo ne khubimwaata mu mulilo kulikho kukwosia ekhaafu eyo.

⁷Enyuma wako, omusaayi asiinge chingubo chewe, ne khukhwisiinga, nio engile mu kambi, kakhaba kario, omusaayi alaba omunyaalu khukhwola ekolooba.

⁸Omundu owosia ekhaafu akhoya asiinge chingubo chewe ne khukhwisiinga, ne yesi alaba omunyaalu khukhwola ekolooba.

⁹ Nio omundu oli omumiliiu acha khubuusia likokhe lie khaafu eyo, ne khulira abuundu ali amiliiu enje we kambi. Ne licha khubikhwa khulwe libuusiana lie babaandu ba Isiraeli khurumikhira mu khwing'oonela kameechi ke khukhwinyosiao bubwoni.

¹⁰Omundu obuusia likokhe akhoya asiinge chingubo chewe, ne aba omunyaalu ario khukhwola ekolooba. Lilaka lino lili ne kamaani mu biise bioosi bibiicha, khulwe Baisiraeli ne baakwa boosi bamenyile ne nabo.

¹¹“Yesi yesi otiila khu mufu acha khuba omunyaalu khu ndaalo saba.

¹²Omundu oyo akhoya esiinge endaalo ekhola khataru ne ndaalo eya saba, nio abe omumiliiu. Ne alekha khukhwesiinga endaalo eya khataru ne ndaalo eya saba se acha khuba omumiliiu tawe.

¹³Yesi yesi otiila khu mufu mala alekha khu khwekwalaasia tawe, anyaalutia liiema lia Wele Omunyali Owa Bioosi, ne omundu nga oyo alaulwa khukhwama khu Baisiraeli, sikila kameechi ke khukwalaasia omundu se kamuanyukhekho tawe alaba busa omunyaalu, bunyaalu bwewe bulaba busa khu niye.

¹⁴“Elino nilio lilaka khuloondekhana ne omundu ofwila mu liiema lie kumuse: Buli yesi yesi oli mwieema namwe owingilamo aba omunyaalu khu ndaalo saba.

¹⁵Ne buli siindu sili mwiiema sitambakho sifunikho sili sinyaalu.

¹⁶Yesi yesi oli mu lukoongo mala atiila khu mundu owirirwe ne mbalu namwe ofwiiliile mundaa namwe atiila khu makuumba ko mufu namwe siliindwa, acha khuba omunyaalu khu ndaalo saba.

¹⁷Khukhwinyosiao bunyaalu buno, likokhe khukhwama khu khaafu emasoti embesemu eyosebwa khulwa siianwa sie khurusiao bubwoni licha khubukulwa mala lireebwe mu nyuungu, mala bachukhemo kameechi.

¹⁸Nio omundu yesi yesi oli omumiliiu alabukula sisiaangu, asisiikhe mu meechi, mala aanye kameechi khwiiema, ne buli khu siindu silimo, ne khu baandu balimo boosi. Aliianya ne khu mundu yesi yesi otiilile khu makuumba ko omufu, namwe omundu owirirwe namwe khu mufu namwe khu siliindwa.

¹⁹Omundu oli omumiliiu oyo aanye kameechi khu mundu oli omunyaalu, khu ndaalo eya khataru ne eya saba. Khu ndaalo eya saba amusiinge, ne amalile khusiinga chingubo chewe ne khukhwesiinga kameechi, acha khuba omumiliiu ekolooba.

²⁰“Ne omundu yesi yesi oli omunyaalu ne se eenya khukhwesiinga tawe acha khwirwa, sikila kameechi ke khukhwisiinga se kamuanyukhekho tawe. Anyaalutia liiema litakatifu lia Wele Omunyali Owa Bioosi.

²¹Mukhoya mwatiila lilaka lino mu biise bioosi bibiicha. Omundu oanya kameechi ke khusiinga bubi akhoya yesi asiinge chingubo chewe. Ne yesi yesi otiila khu meechi acha khuba omunyaalu khukhwola ekolooba.

²²Siosi siosi nisio omundu omunyaalu atiilakho siba sinyaalu, ne yesi yesi ositilakho arama omunyaalu khukhwola ekolooba.”