Read lubukusu Khub. 2 Bible Online

Khub. 2 - lubukusu bible

Khub. 2

¹Wele Omunyali Owa Bioosi aboolela Musa ne Aruni ali,

²“Babaandu ba Isiraeli balakhola ekambi, buli mundu asi we pendera yabwe, ne bimanyisio bie luuya lwabwe. Balakhola chikambi chiloleelele liiema lie kumuse buli lubeka.

³Bakhola ekambi lubeka lwe bukwe, niio enyanga esoela, balaba be ekambi ne pendera eye kholo eya Yuda. Omwimeelesi wabwe alaba Nasioni okhwa Aminatabu.

⁴Ne bukali bwe babaandu bewe bwaba chielefu sabini naine ne chimia sita.

⁵Bakhola ekambi yabwe siimbi ne nabo balaba ekholo eya Isakari. Omwimeelesi wabwe alaba Netaneli okhwa Suari.

⁶Bukali bwe babaandu bewe bwaba chielefu khamusini naine ne chimia chine.

⁷Ne ekambi eye ekholo eya Sebuluni elaloondakho. Omwimeelesi wabwe alaba, Eliabu okhwa Heloni.

⁸Bukali bwe babaandu bewe bwaba chielefu khamusini na saba ne chimia chine.

⁹Bukali bwe babaandu boosi be kambi eya Yuda, mu bipupu biabwe, baba chielefu emia ndala ne kamakhumi munaane na sita, ne chimia chine. Be kambi eya Yuda yino nibo bacha khunyoa khurekukha mu lukeendo.

¹⁰Bakhola ekambi lubeka lwe bunafubo, bali asi we pendera eye kholo eya Rubeni. Omwimeelesi wabwe ali Elisuri okhwa Sheteuri.

¹¹Bukali bwe babaandu bewe nga ne babalwa bwaba babaandu chielefu arubaine na sita ne chimia chiraano.

¹²Ne babakhola ekambi embi ne nabo bali ekholo eya Simioni. Omwimeelesi wabwe ali Shelumieli okhwa Surisiatai.

¹³Bukali bwe babaandu bewe bwaba chielefu khamusini na tisa ne chimia chitaru.

¹⁴Ekambi eyaloondakho yaba eye ekholo eya Kati. Ne omwimeelesi wabwe ali Eliasafu okhwa Reueli.

¹⁵Bukali bwe babaandu bewe bwaba chielefu arubaine na chiraano ne chimia sita ne kamakhumi karaano.”

¹⁶Bukali bwe kambi yoosi eya Rubeni, mu bipupu biabwe, buli chielefu miamoja khamusini na moja ne chimia chine ne kamakhumi karaano. Be kambi eya Rubeni yino bacha khuba be khabili mu khurakikha lukeendo.

¹⁷Balawi ne barura ne liiema lie kumuse, balikeendela akari we chikambi chichiindi. Chikholo chilirura bulayi bwene nga chamenya mu kambi, buli ebira asi we pendera yayo.

¹⁸Bipupu bie ekholo eye Efuraimu biliba lubeka lwe mumbo asi we pendera yabwe. Omwimeelesi wabwe ali Elisiama okhwa Amihudi.

¹⁹Bukali bwe babaandu bewe bwaba chielefu arubaine ne chimia chiraano.

²⁰Ne baloondakho balaba ekholo eya Manase. Omwimeelesi wabwe alaba Kamalieli okhwa Petausuri.

²¹Bukali bwe babaandu bewe bwaba chielefu salasini na mbili ne chimia chibili.

²²Ne eloondakho eli ekholo eya Benjamini. Omwimeelesi wabwe ali Abitani okhwa Gidioni.

²³Bukali bwe babaandu bewe bwaba chielefu salasini na chiraano ne chimia chine.

²⁴Bukali bwe babaandu boosi ba Efuraimu, mu kambi chabwe, baba chielefu emia ndala na munaane, ne mia ndala. Be kambi eye ekholo eya Efuraimu nibo bacha khuba be khataru mu khurakikha lukeendo.

²⁵Bipupu bie ekholo eya Dani biliba lubeka lwe ebunaswa asi we pendera yabwe. Omwimeelesi wabwe ali Ahieseri okhwa Amisiatai.

²⁶Bukali bwe babaandu bewe bwaba chielefu sitini na mbili ne chimia saba.

²⁷Baloondakho bacha khuba ekholo eya Asieri. Omwimeelesi wabwe ali Pakieli okhwa Okirani.

²⁸Bukali bwe babaandu bewe bwaba chielefu arubaine na moja ne chimia chiraano.

²⁹Ne eyaloondakho yaba ekholo eya Nafutali. Omwimeelesi wabwe aba Ahira okhwa Enani.

³⁰Bukali bwe babaandu bewe bwaba chielefu khamusini na tatu ne chimia chine.

³¹Babaandu boosi babalwa mu kambi eya Dani baba chielefu emia ndala ne kamakhumi karaano ne saba, ne chimia sita. Sipupu sie babaandu ba Dani Sicha khuba simaliilisi mu khurura mu kambi asi we pendera yabwe.

³²Bano bali babaandu ba Isiraeli ba baabalwa khuloondekhana ne luuya lwabwe. Boosi mu kambi ba babalwa khuloondekhana ne bipupu biabwe baba chielefu chimia sita ne chitaru ne chimia chiraano ne kamakhumi karaano.

³³Ne kakhali Balawi se babalilwa mu baandu ba Isiraeli tawe. Wele Omunyali Owa Bioosi beele alaka Musa ario.

³⁴Baisiraeli bakhola bario. Khuloondekhana nga Wele Omunyali Owa Bioosi ne alaka Musa, bakhola chikambi asi we chipendera chabwe. Nio barakikha lukeendo bario buli mundu mu be nju yewe khuloondekhana ne luuya lwewe.