Read lubukusu Khub. 20 Bible Online

Khub. 20 - lubukusu bible

Khub. 20

¹Babaandu ba Isiraeli boosi boola mu sichiimi sia Sini. Bolayo mu mwesi kwe khunyoa. Bamenya e Kadeshi. Ne Miriamu aafwiila ebweeneyo mala aasiikhwa.

² Babaandu se baba ne kameechi tawe. Nio babaandu babuusiana mala bakaluukhana khu Musa ne Aruni.

³Babaandu beng'ulung'unya khu Musa bali, “Liakhabeele lilayi efwe khufwa nga bawandaayefwe ne bafwa ebweeni wa Wele Omunyali Owa Bioosi.

⁴Siina sikila ne wareera libuusiana lia Wele Omunyali Owa Bioosi mu sichiimi nio khufwiile muno alala ne bibiaayo biefwe?

⁵Siina sikila ne wakhurusia e Misiri mala wakhureera abuundu butinyu ano? Se alikho abuundu we biakhulia, namwe chinduli namwe chisabibu namwe kamakomanga tawe. Ne kameechi ke khunywa se kalikhoo tawe.”

⁶Ne Musa ne Aruni barura niio babaandu babuusianila bacha ebweeni we liiema lie kumuse. Benama bubweeni bwabwe bwetiila asi. Luyali lwa Wele Omunyali Owa Bioosi lwababonekhela.

⁷Ne Wele Omunyali Owa Bioosi aboolela Musa ali,

⁸“Bukula esiimbo mala ewe ne Aruni wandaayo mubuusie babaandu. Boolela lulwanda luli ebweeni wabwe lutubukhe kameechi kalwo. Nio mungila yino ocha khureera kameechi khukhwama mu lwanda khulwe babaandu ne bibiaayo biabwe khunywa.”

⁹Musa abukula esiimbo ebweeni wa Wele Omunyali Owa Bioosi nga Wele Omunyali Owa Bioosi ne amulaka.

¹⁰Musa ne Aruni babuusia babaandu alala ebweeni we lulwanda, mala Musa aloma ali, “Rekeeresia, enywe bareengu. Khumureerere kameechi khukhwama mu lwanda luno?”

¹¹Nio Musa asuta esiimbo mala apa lulwanda khabili, nio kameechi katubukha kamakali mala babaandu boosi ne bibiaayo banywa.

¹²Ne kakhali Wele Omunyali Owa Bioosi ekiicha Musa ne Aruni. Aloma ali, “Enywe se mwaba ne lisuubila khwise tawe. Se mwambelesia lukoosi ebweeni we Baisiraeli nga omutakatifu tawe. Sikila kano se mucha khubarangirira khuboosia mu sibala nisio nabaelesia tawe.”

¹³Kano kali kameechi ke Meriba[3] niio babaandu ba Isiraeli bayingana ne Wele Omunyali Owa Bioosi niio Wele Omunyali Owa Bioosi abekeselia ali niye ali Omutakatifu.

¹⁴Musa aruma barume khukhwama e Kadeshi khu Mwami owa Edomu. Aloma ali, “Bawandaayo Baisiraeli baloma bali: omanyile butinyu bwoosi nibwo khwanyoola.

¹⁵Mumanyile nga nilwo bakuuka befwe bacha e Misiri, niyo khwamenya e Misiri kimiiko kimikali. Bamisiri bakhupia sibi ne bakuuka befwe.

¹⁶Ne khwalilila Wele Omunyali Owa Bioosi khukhuyeeta. Wele aulila khulila khwefwe mala akhurumira malaika, owakhurusia e Misiri. Luno luri khuli e Kadeshi, lukoba luli embi ne lulwakha lwe sibala siowo.

¹⁷Nono khufukiilile khubire mu sibala siowo. Se khulabirira mu mikuunda kienywe namwe mu misabibu kienywe tawe. Se kane khunywe kameechi khukhwama mu sebele tawe. Khucha khuloonda khu muyila kumuboofu ne se khucha khwaukhakho tawe khukhwola nga ne khucha khurura mu sibala siowo.”

¹⁸Ne kakhali omwami owa Edomu abakobosia ali, “Se mulabirira muno tawe. Mwakhola murio khucha khumwibwaakala.”

¹⁹Babaandu ba Isiraeli baloma bali, “khucha khubirira khu muyila kumuboofu. Ne kaaba bali efwe namwe bibiaayo biefwe khunywa khu meechi kenywe, khucha khuruunga. Khulekhe khubire busa khu bikele.”

²⁰Ne kakhali omwami owa Edomu abakobosia ali, “Se mucha khubirira ano tawe.” Nio babaandu ba Edomu barura bakali ne banamae be kamaani khukhwibwaakala babaandu ba Isiraeli.

²¹Mungila yino Baedomu se bafukiilila Baisiraeli khubirira mu sibala siabwe tawe. Baisiraeli bakobolayo bachila khu ngila ekiindi.

²²Babaandu boosi ba Isiraeli barura e Kadeshi mala boola khu sikulu sia Hori,

²³sisiili siimbi ne lulwakha lwa Edomu. Ebweeneyo Wele Omunyali Owa Bioosi alomaloma ne Musa ne Aruni. Ababoolela ali,

²⁴“Aruni se acha khwingila mu sibala nisio ndaelesia Baisiraeli tawe. Acha khufwa sikila mwembi mwaloba lilaka liase e Meriba.

²⁵Bukula Aruni ne omusoleeli wewe Eliesa mala obarere khu sikulu sia Hori.

²⁶Ebweeneyo, fuula Aruni chingubo chewe che busaayi mala afware Eliesa. Aruni acha khufwila ebweeneyo.”

²⁷Musa akhola nga Wele Omunyali Owa Bioosi ne alaka. Baniina khu sikulu sia Hori Baisiraeli boosi ne ba baloleleele.

²⁸ Ne Musa afuula Aruni chingubo che busaayi ne khufwara Eliesa. Aruni afwila ebweeneyo khu sikulu. Ne Musa ne Eliesa bekha khukhwama khu sikulu.

²⁹Ne babaandu boosi nga bamanya bali Aruni afwiile, bamulila khu ndaalo kamakhumi kataru.