Read lubukusu Khub. 21 Bible Online

Khub. 21 - lubukusu bible

Khub. 21

¹ Omwami owe Bakanaani owa Arati, omenyile e bunafubo owa Kanaani, aulila bali, Baisiraeli balikho bechela khu ngila eye Atarimu. Apania Baisiraeli ne khutiila babaandi.

²Ne Baisiraeli bechuba khu Wele Omunyali Owa Bioosi bali, “Kaaba bali ocha khukhunyalila khuule babaandu bano, aba khucha khubunisila elala[4] chingoba chabwe.”

³Wele Omunyali Owa Bioosi aulila Baisiraeli mala ara Bakanaani mu bunyali bwabwe. Nio Baisiraeli babunia Bakanaani boosi alala ne chingoba chabwe. Nio lisina lie abuundu ao lialaangwa bali Horima.[5]

⁴ Khukhwama khu sikulu sia Hori, Baisiraeli bachila khu ngila echa sia Nyanja eya Shamu. Batalanda sibala sia Edomu. Ne babaandu batamba liliekhaliilikha khu ngila.

⁵ Mala babaandu baloma kamabi khu Wele ne Musa. Beng'ulung'unya bali, “Siina sikila ne mwakhurusia Misiri nio khufwiile mu sichiimi sino? Siakhulia namwe kameechi se biliio tawe. Ne khwabiile siakhulia siikhali ne bukhala sino tawe.”

⁶Nio Wele Omunyali Owa Bioosi aruma chindemu che buchiba mu baandu. Chaluma babaandu ba Isiraeli mala bakali mu nibo bafwa.

⁷Babaandu bacha khu Musa mala baloma bali, “Khwakholile bubwoni sikila khwalomalome kamabi khu Wele Omunyali Owa Bioosi ne nawe. Saba Wele Omunyali Owa Bioosi akhwinyosieo chindemu chino.” Nio Musa aasabila babaandu.

⁸Nio Wele Omunyali Owa Bioosi aboolela Musa khukhola endemu eye kumukasa mala akira khu lukuulo, nio yesi yesi niye endemu yaluma ne akalama alola endemu eye kumukasa aona.

⁹ Nio Musa akhola endemu eye kumukasa mala akira khu lukuulo. Omundu yesi yesi niye yaba endemu eluma aalolanga khu ndemu eye kumukasa ne aona.

¹⁰Baisiraeli bacha baapa ekambi a Oboti.

¹¹Enyuma we khukhwama Oboti, baapa ekambi e Iye-abarimu, mu sichiimi siloleelela e bukwe we sibala sie Bamoabu.

¹²Khukhwama ao barekukha mala baapa ekambi mwitooma lia Sereti.

¹³Khukhwama ao bacha baapa ekambi lubeka luluundi lwa Arinoni, mu sichiimi Sicha mu sibala sie Baamori. (Arinoni yaba lulwakha akari we Bamoabu ne Baamoni,)

¹⁴Lino likila Sitabu sie kamae ka Wele Omunyali Owa Bioosi ne siloma sili: “Lukoba lwe Bahebu mu Sufa, ne mu matooma ka Arinoni,

¹⁵ne khu ndeelwa khwe kamatooma, lucha khukhwola e Ari, ne khuchiililila khukhwola khu lwakha lwa Moabu.”

¹⁶Khukhwama ao bachiililila bola abuundu alaangwa bali Beeri. Abwenao niyo Wele Omunyali Owa Bioosi aboolela Musa ali, “Buusia babaandu alala, nja khubaelesia kameechi.”

¹⁷Mu siise esio babaandu ba Isiraeli bemba kumwenya kuno: “Tubukha kameechi, ee esebele, kimbile!

¹⁸Esebele niyo babaami balima, niyo babaandu be fuma be babaandu bakhola, ne esiimbo eye bubwami alala ne chisiimbo chabwe.” Ne khukhwama mu sichiimi bacha e Matana.

¹⁹Khukhwama ao bacha boola e Nahalieli ne khukhwama Nahalieli khukhwola Banoti,

²⁰ne khukhwama Banoti khukhwola mwitooma mu sibala sie Bamoabu, khu ngaaki khwe sikulu sia Pisika, sisialoleelela sisiangalaamwe.

²¹Nio babaandu ba Isiraeli baruma barume khu mwami owe Sihoni Baamoni. Bamuboolela bali,

²²“Khulekhe khubirire mu sibala siowo. Se khucha khwinyokha khumuyila khwingile mu mikuunda namwe mu misabibu tawe. Lundi se khucha khunywakho kameechi khukhwama mu sebele chowo tawe. Khucha khuba busa khu ngila emboofu khukhwola ne khucha khurura mu sibala siowo.”

²³Ne kakhali Sihoni se afukiilila babaandu ba Isiraeli khubirira mu sibala siewe tawe. Abuusia banamae bewe arura acha e Yahasi mu sichiimi mala ebwaakala Baisiraeli.

²⁴Ne Baisiraeli bera Sihoni mwiie ne khubukula sibala siewe khukhwama khu luuchi lwa Arinoni khukhwola Yaboki. Se batuma lulwakha lwe Baamoni e Yaseri tawe sikila lwaba lusire.

²⁵Baisiraeli babukula chingoba che Baamoni mala bachimenyamo. Bamenya akhaba mu Heshiboni ne birekere bialwo bioosi.

²⁶Heshiboni lwaba lukoba lwo mwami Sihoni owe Baamoni. Sihoni apana liie no mwami we khaale owa Moabu mala abukula sibala siewe sioosi khukhwola khu luuchi lwa Arinoni.

²⁷Elio nilio likila babeembi ne bemba bali, “Yiicha e Heshiboni, lekha lwombakhwe lundi, lekha lukoba lwa Sihoni lwimikhwe.

²⁸ Kumulilo kwama Heshiboni, enjaso khukhwama mu lukoba lwa Sihoni, yabunia lukoba lwa Ari mu Moabu, babaami be bikulu bia Arinoni.

²⁹Akhoo, Moabu! Mwabuna, ee baandu ba Chemoshi! Chemoshi alekhile babaana bewe be siseecha, khuuba babeluukhe mwiie. Ne bakooko bewe khutiilwa mu mbaambe ne omwami Sihoni owa Amori.

³⁰Nio lisaaye liabwe liabuna, khukhwama Heshiboni khukhwola Diboni, khwonaka sibala khukhwola nga kumulilo kwola Meteba.”

³¹Nio babaandu ba Isiraeli bamenya mu sibala sie Baamori.

³²Ne Musa aaruma babaandu bakhola buyooti khu lukoba lwa Yaseri mala babukula birekere bialwo nio Baamori batibia bumenyo bwabwe.

³³Baisiraeli bakobola baloonda engila echa Bashani. Ne Oku omwami owa Bashani arura ne banamae bewe boosi becha khu khupana liie e Etrei.

³⁴Ne kakhali Wele Omunyali Owa Bioosi aboolela Musa ali, “Okhamuria tawe. Ndakhua kamaani ke khumuula niye ne babaandu bewe boosi, ne sibala siewe. Mukhole nga nilwo wakhola Sihoni, omwami owe Baamori owamenyanga e Heshiboni.”

³⁵Nio Baisiraeli bera Oki ne basoleeli bewe ne babaandu bewe boosi. Se balekhakho omundu akhaba mulala tawe. Nio babukula sibala siewe.