Read lubukusu Khub. 22 Bible Online

Khub. 22 - lubukusu bible

Khub. 22

¹Baisiraeli bacha mala baapa ekambi mu siangalaamwe sia Moabu ebweeni wa Yoritani, e Yeriko.

²Ne Balaki okhwa Sipori, abona koosi niko Baisiraeli bakholela Baamori.

³Bamoabu baria lukali sikila Baisiraeli baba bakali.

⁴Bamoabu baboolela babemeelesi be Bamidiani bali, “Sipupu siboofu sino luno Sicha khu bukula buli siindu siili siimbi nafwe, nga euunwa ne yaya bunyaasi mu mayilwe.” Balaki aba omwami owa Moabu mu siise esio.

⁵ Aruma barume khulaanga Balamu okhwa Beori, owaba ne ali Petiori embi ne luluuchi lwa Efurati mu sibala sia Amawa. Amuboolela ali, “Lola, babaandu barurire e Misiri. Bali bakali lukali, ne bamenyile embi ne nase.

⁶Nono yiicha luno mala undaamile babaandu bano sikila bali ne kamaani lukali khukhila ese. Nio wakana khola ndio nabaula ne khubatimania khurura mu sibala. Manyile ndi yesi yesi niye obiita chikhabi aba ne khabi, ne oyo niye olaama alaamwa.”

⁷Nio basaakhulu be Bamoabu nende be Bamidiani babukula kumuruungo khulwe bulakusi. Bacha khu Balamu, mala bamuelesia burume bwa Balaki.

⁸Balamu ababoolela ali, “Kona ano silo sia luno, ne kumuchuli nja khumuboolela liosi liosi nilio Wele Omunyali Owa Bioosi alamboolela.” Nio babaami ba Moabu bekhala ne Balamu.

⁹Wele echa khu Balamu mala areeba ali, “Baandu siina bali ne nawe bano?”

¹⁰Balamu aboolela Wele ali, “Omwami owa Moabu, Balaki okhwa Sipori, arumanie khwise. Aloma ali,

¹¹‘Babaandu bakali lukali bechile khukhwama e Misiri. Nono yiicha undaamile babaandu bano. Wakana khola ndio nanyala khu khupana ne nabo mala nabatimania.’ ”

¹²Wele aboolela Balamu ali, “Okhachakho ne babaandu bano tawe. Okhalaama babaaandu bano tawe, sikila bali ba babiitwa chikhabi.”

¹³Nio Balamu enyokha makhelebeende mala aboolela babemeelesi ba Balaki ali, “Kobola mu sibala sienywe sikila Wele Omunyali Owa Bioosi alobile khukhufukiilila enje ne nanywe.”

¹⁴Nio babemeelesi bakobola khu Balaki mala bamuboolela bali, “Balamu alobile khukhwicha ne nafwe.”

¹⁵Nio Balaki aruma lundi babemeelesi babaandi bakalikho, lundi be lukoosi khukhila babanyoa.

¹⁶Becha khu Balamu mala bamuboolela bali, “Balaki aloma ali, ‘Siindu siosi siosi siikhakhukhiingilila khukhwicha khwise tawe.

¹⁷Ng'ali nja khu khuruunga kumuruungo kumuboofu lukali. Ne siosi siosi nisio umboolela ndakhola. Nosiima yiicha mala undaamile babaandu bano.’ ”

¹⁸Ne kakhali Balamu abakobosia ali, “Akhaba bali Balaki ambelesia enju yewe eyichuule efwesa ne esahabu, se nja khuloma liosi liosi likhali lilaka lia Wele Omunyali Owa Bioosi, Wele wase tawe.

¹⁹Ne nemusiima khemukone, ano silo sino siosi nio manye liliindi liosi liosi nilio Wele Omunyali Owa Bioosi anyala aba ne amboolela.”

²⁰Ne silo esio Wele echa khu Balamu ne aloma ali, “Babaandu bano baaba ne bechile khukhulaanga ewe yinyokha oche ne nabo. Ne kakhali ocha khukhola ako niko ekhuboolela kong'ene.”

²¹Nio Balamu enyokha kumutikhinyi aniina khu punda yewe, mala acha ne babemeelesi ba Moabu.

²²Ne kakhali Wele aaba ne lirima sikila Balamu acha. Ne malaika owa Wele Omunyali Owa Bioosi eema ebweeni wa Balamu nga omusiku wewe. Balamu aba khu punda ne bakholi bewe babili baba ne naye.

²³Epunda yabona malaika owa Wele Omunyali Owa Bioosi emile khu ngila aatilile embalu. Nio yalekha engila yaukha yacha mundaa. Balamu apa epunda khukikobosia khu ngila.

²⁴Nio malaika owa Wele Omunyali Owa Bioosi eema khu ngila enyelele akari we kimikuunda kibili kie kimisabibu kikiaba ne lisiisi buli lubeka.

²⁵Nga epunda ne yabona malaika, yacha yeminila khwisiisi mala yang'uurirakho sikele sia Balamu. Balamu apa epunda lundi.

²⁶Nio malaika owa Wele Omunyali Owa Bioosi acha ebweeni eema abuundu e sibaanga sitiiti niio bubwangu bukhali bwe khukhwaukha tawe chimbeka chombi.

²⁷Ne nga epunda yabona malaika, yakona asi. Balamu aba ne lirima mala apila epunda esiimbo yewe.

²⁸Nio Wele Omunyali Owa Bioosi aaelesia epunda bunyali bwe khulomaloma, mala yareeba Balamu eli, “Khukholele siina sikila ne ukhupa kamakhabi kataru kano?”

²⁹Balamu akobosia ali, “Sikila wanjinyayile. Abanga mba ne mbalu, andi khwirire.”

³⁰Epunda yakobosia Balamu eli, “Ese sendi epunda niyo otimilangakho mu bulamu bwowo bwoosi khukhwola luno? Kholanga endio ku?” Balamu aloma ali “Tawe.”

³¹Nio Wele Omunyali Owa Bioosi akhola Balamu abona malaika owa Wele Omunyali Owa Bioosi emile ebweeni ne mbalu yewe, mala Balamu enama asi khwiloba bubweeni bwetiila asi.

³²Malaika owa Wele Omunyali Owa Bioosi areeba ali, “Sikila siina ne upile epunda yowo kamakhabi kataru kano? Lola nechile khukhiingilila ewe, sikila khucha khwowo khuli khumayaanu.

³³Epunda yowo yimbone mala yaukha kamakhabi kataru kano. Abanga se yinjaukhekho tawe, andi nakhwirire mala ndekha epunda.”

³⁴Balamu akobosia malaika ali, “Nakholile bumayaanu, se manyile ndi ewe wemile khungila wakhiingilile tawe. Nono lili libi khwiwe ese khuchiililila, nja khukobola engo.”

³⁵Ne malaika owa Wele Omunyali Owa Bioosi aboolela Balamu ali, “Cha ne babaandu bano, ne lomaloma nilio khuboolela liong'ene.” Nio Balamu acha ne babemeelesi ba Balaki.

³⁶Balaki nga ne aulila bali Balamu alikho echa, acha amwakaanila mu lukoba lwa Ari, mu sibala sia Moabu. Bakaanana khu ndulo khwe lulwakha lwa Moabu.

³⁷Balaki areeba Balamu ali, “Se narumania bakhulange? Siina sikila ne okhecha nga ne nakhulaanga tawe? Webaasia oli se nyala nakhua kumuruungo tawe?”

³⁸Balamu amukobosia ali, “Nechile. Ne kakhali ndi na bunyali siina bwe khuloma liosi liosi? Nja khuloma niko Wele amboolela khuloma kong'ene.”

³⁹Nio Balamu acha ne Balaki. Boola e Kiriati-husoti.

⁴⁰Balaki eera chimbosio che chikhaafu ne kamakheese mala aelesia chinyama Balamu ne babemeelesi ba baaba ne naye.

⁴¹Bwasia kumutikhinyi Balaki abukula Balamu amuniinia khu Bamoti-Baali nio Balamu anyala khubona babaandu ba Isiraeli ba baaba siimbi.