Read lubukusu Khub. 23 Bible Online

Khub. 23 - lubukusu bible

Khub. 23

¹Balamu aboolela Balaki ali, “Njombakhile anano chi alutare saba, mala underere anano chiuunwa saba ne kamamiiku saba.”

²Balaki akhola nga ne bamuboolela. Ne Balamu ne Balaki baana euunwa ne limiiku buli khu alutare.

³Nio Balamu aboolela Balaki ali, “Yiima siimbi ne siianwa siowo sie khukhwosia, ne ese ndacha. Wakana ndakaanana ne Wele Omunyali Owa Bioosi. Ne liosi liosi nilio acha khunjekesia kane khuboolele.” Nio Balamu waniina yeng'ene khu ngaaki khwe sikulu.

⁴Wele akaanana ne Balamu. Balamu amuboolela ali, “Narekeekhe chi alutare saba ne naanile euunwa ne limiiku buli khu alutare.”

⁵Ne Wele Omunyali Owa Bioosi aboolela Balamu nilio enyekhana alome. Wele Omunyali Owa Bioosi aloma ali kobola khu Balaki mala omuboolele burume buno.

⁶Nio Balamu akobolayo anyoola Balaki ne asimanga busa a siianwa siewe sie khukhwosia, alala ne babemeelesi boosi ba Moabu.

⁷Balamu alomaloma bung'oosi buno: “Khukhwama Aramu omwami Balaki anderire, omwami owa Moabu khukhwama e bikulu bie ebukwe. ‘Yiicha undaamile babaandu ba Yakobo.’ ‘Ne yiicha undafwirire Isiraeli’

⁸Nyala ndiena nalaama babaandu nibo Wele akhalaamile tawe? Nyala ndiena narafwira babaandu nibo Wele Omunyali Owa Bioosi akharafwiirire tawe?

⁹Sikila khukhwama khu ngaaki khwe lukulu, nababoone. Khukhwama khu bikulu nababoone; naboone babaandu bamenyile bong'ene, bebaasia bali baabukhana ne chikholo chichiindi!

¹⁰Naanu onyala abala babaandu ba Isiraeli? Namwe khubala e roho eye babaandu ba Isiraeli. Lekha efwe lifwa lio omuluungi, ne lekha maliilisie nga nibo!”

¹¹Nio Balaki areeba Balamu ali, “Siina nisio ukholile sino? Nakhureerire undaamile basiku base, ne koosi niko okholile khuli khubabiita chikhabi.”

¹²Balamu akobosia ali, “Se nenyekhana mbe omurekeerefu ndome niko Wele Omunyali Owa Bioosi andakho ndome kong'ene tawe ku?”

¹³Nio Balaki aboolela Balamu ali, “Bira khuche fwembi lubeka luluundi niio onyala wababonela. Olabona Baisiraeli bali siimbi bong'ene, ne se olababona boosi tawe. Ndaamile khukhwama elubeka lwenolwo.”

¹⁴Balaki amuyila mu mukuunda kwa Sofimu khu lukulu lwa Pisika. Ebweeneyo ombakhayo chi alutare saba ne khuana euunwa ndala ne limiiku lilala khu buli alutare.

¹⁵Balamu aboolela Balaki ali, “Yiima a siianwa siowo sie khukhwosia, ese nja khwakaanana ne Wele Omunyali Owa Bioosi eyeyo.”

¹⁶Wele Omunyali Owa Bioosi akaanana ne Balamu, mala amuboolela nilio enyekhana alome. Wele Omunyali Owa Bioosi aloma ali kobola khu Balaki mala omuboolele burume buno.

¹⁷Nio akobolayo anyoola Balaki asimaanga niio siianwa siewe sie khukhwosia sili. Ne babemeelesi ba Moabu baba alala ne naye. Balaki amureeba ali, “Wele Omunyali Owa Bioosi alomile ali siina?”

¹⁸Mala Balamu alomaloma bung'oosi buno: “Yinyokha Balaki mala oulile, ndekeresie, ee okhwa Sipori:

¹⁹Wele se ali omundu tawe, ne se abea tawe, se ali omundu tawe, ne se anyala akaluukhasia chinganakani tawe, siosi siosi nisio aloma ali akhola, asikhola; siosi siosi nisio alaka siikholekha.

²⁰Nanyoola lilaka khubabiita chikhabi, ne Wele ne abiita chikhabi, se nyala nachirusiao tawe.

²¹Wele se aboone bumayaanu mu baandu ba Yakobo tawe, se abona kamabi mu Isiraeli tawe. Wele Omunyali Owa Bioosi, Wele wabwe ali ne nabo, ne bafumia Wele oli Omwami wabwe.

²²Wele abarusia khukhwama e Misiri, bali ne kamaani nga emboongo.

²³Mbao bubacha bunyala bwekholekha, khu baandu ba Isiraeli, namwe bulakusi buunyala bwabeekholekhakho tawe. Luno babaandu bacha khuloma khu Isiraeli bali, ‘Lola niko Wele akholeele Isiraeli!’

²⁴Baisiraeli benyokha nga etalang'i ekhasi, lundi nga etalang'i eseecha, se ekona asi tawe, khukhwola nga ne elia siakhulia siayo, lundi khukhwola nga ne enywa kamafuki ke siifwiile.”

²⁵Nio Balaki aboolela Balamu ali, “Okhabalaama namwe wababiita chikhabi tawe.”

²⁶Ne kakhali Balamu akobosia Balaki ali, “Se nakhuboolela ndi koosi niko Wele Omunyali Owa Bioosi aloma nenyekhana ekhole?”

²⁷Balaki aboolela Balamu ali, “yiicha khuyile abuundu aandi. Wakana Wele anyala akhufukiilila ewe wandaamila ba Isiraeli khukhwama ebweeneyo.”

²⁸Nio Balaki aayila Balamu khu ngaaki khwe sikulu sia Peori sisialoleelela sisiangalaamwe.

²⁹Balamu amuboolela ali, “Njombakhile anano chi alutare saba mala underere chiuunwa saba ne kamamiiku saba.”

³⁰Balaki akhola nga ne bamuboolele mala waana euunwa ne limiiku buli khu alutare.