Read lubukusu Khub. 24 Bible Online

Khub. 24 - lubukusu bible

Khub. 24

¹Balamu amanya ali liasimiisie Wele Omunyali Owa Bioosi khubiita Baisiraeli chikhabi. Nio se aniina acha khuyima kakaandi nga ne akholilenge mu khunyoa tawe. Ne kakhali aloleelela e sichiimi.

²Balamu alola mala abona babaandu ba Isiraeli bakholile chikambi khuloondekhana ne chikholo chabwe. Nio Roho owa Wele amwichakho,

³mala alomaloma bung'oosi buno: “Burume bwa Balamu okhwa Beori, burume bwo omundu oobona bulayi,

⁴burume bwo omundu oulila chilomo cha Wele, oobona buloli bwa Wele, Owe Bunyali Bwoosi, akwa asi ebweeni wa Wele, ne kakhali se afunyikha chimoni chewe tawe.

⁵Kamaeema ke Baisiraeli kali kamamiliiu lukali! Akhaba chikambi chenywe, Ee Isiraeli.

⁶Bili nga kamatooma kamabalaayi, nga biluundu biili khu luuchi, nga kumurongooro kukwabiaalwa ne Wele Omunyali Owa Bioosi, namwe nga kimitarakwa kie khu ndulo khwe sebele.

⁷Kameechi kakheekhe khukhwama khu ndoo che Baisiraeli, ne bibiaamo biabwe bilinyoola kameechi kamakali, omwami wabwe aliba omukali khukhila Akaki, ne bubwami bwewe bulikaliia.

⁸Wele abarusia khukhwama e Misiri, alibapanila nga emboongo, balitabulaka basiku babwe, balifunaka kamakuumba kabwe mu bitonyi tonyi, ne khubalasa ne buembo bwewe.

⁹ Befumba ne bakona nga etalang'i, nga etalang'i ekhasi, nanu onyala abenyosia? Ali ne ekhabi oobabiita chikhabi, ne alaamwe yesi yesi omulaama.”

¹⁰Balaki aambila Balamu lirima mala afumbara bifuusi biewe mala aboolela Balamu ali, “Nakhulaanga undaamile basiku base, ne lola kamakhabi kataru kano ewe wababiitile chikhabi.

¹¹Nono khwako yilukha oche engo. Naloma ndi, ‘Khakhuruunge.’ Ne kakhali Wele Omunyali Owa Bioosi ekale kumuruungo kwowo.”

¹²Balamu akobosia Balaki ali, “Se naboolela barume nibo waruma khwise ndi,

¹³wakhamba enju yowo eyichuulemo efwesa ne esahabu, se enyala nakhola niko Wele Omunyali Owa Bioosi akhenya tawe. Se enyala nakhola libi namwe lilayi mu lienya liase samwene tawe. Nilio Wele Omunyali Owa Bioosi aloma nilio ese ndomaloma.”

¹⁴“Nono ndikho ngobolayo khu baandu base. Nono nenya khukhumanyisia niko babaandu ba Isiraeli bacha khukhola khu baandu bowo mu biise bibiicha.”

¹⁵Nio alomaloma bung'oosi buno: “Burume bwa Balamu okhwa Beori, burume bwo omundu obona bulayi,

¹⁶burume bwo omundu oulila chilomo cha Wele, lundi onyoola limanya lie owe Angaaki Lukali, obona kamalola ka Wele Owe Bunyali Bwoosi. Aakwa asi ebweeni wa Wele, ne kakhali se afunyikha chimoni chewe tawe.

¹⁷Naboone, omundu oliicha, ne kakhali aliicha mu biise biikhali bie aembi tawe. Eng'enieesi echa khwinyokhela mu kholo eya Yakobo, omwami aliama mu Isiraeli, alitubundula babemeelesi ba Moabu, ne khubunia lisaaye lia Seti lioosi.

¹⁸Sibala sia Edomu siliiulwa, basiku ba Isiraeli Baedomu baliulwa, ne kakhali Baisiraeli bakhaindiaale.

¹⁹Omwami aliama mu kholo eya Yakobo, ne alibunia abo balirama mu lukoba!”

²⁰Nio Balamu mu malola kewe abona Baamaleki mala alomaloma bung'oosi buno: “Ekholo eya Amaleki yaba eye kamaani khukhila chikholo choosi, ne kakhali ekhumaliilikha echa khubunila elala.”

²¹Balamu alola Bakenayi, mala alomaloma bung'oosi buno: “Abuundu niio omenyile ali e kumuleembe, ali e kumuleembe nga siswi siili mwibaale.

²²Ne kakhaba kario Bakenayi mucha khubuna, Baashuru bakhamubukule muche mu mbaambe.”

²³Balamu alomaloma bung'oosi buno: “Naanu onyala amenya Wele ne akhola kano?

²⁴Ne chimeeli chiliicha khukhwama Kitimu, ne chiliiula Ashuru ne Eberi, ne bosi balibuna.”

²⁵Nio Balamu enyokha mala akobola engo, ne Balaki yesi acha engila yewe.