Read lubukusu Khub. 25 Bible Online

Khub. 25 - lubukusu bible

Khub. 25

¹Baisiraeli nga ne baba e Sitimu barakikha sifwaabi ne bakhasi Bamoabu.

²Bakhasi bano babalanga khu naikara eye khukhola embosio khu bawele babwe. Baisiraeli balia biakhulia mala basaaya bawele babwe.

³Nio Baisiraeli barakikha khusaaya Baali, Wele owa Peori. Wele Omunyali Owa Bioosi aambila Isiraeli lirima.

⁴Ne Wele Omunyali Owa Bioosi aboolela Musa ali, “Bukula babemeelesi ba Isiraeli be bueeyani boosi mala mubasuunge kumuusi nio lirima liase liwe khu Baisiraeli.”

⁵Musa aboolela bakhalaki ba Isiraeli ali, “Buli mulala khwinywe eere babaandu bewe ba basaaya Baali owa Peori.”

⁶Ne omundu mulala owa Isiraeli areera omukhasi Omumidiani munju yewe, ebweeni wa Musa ne ebweeni we libuusiana lie babaandu ba Isiraeli lioosi. Baisiraeli baba balikho balilila a muliango kwe liiema lie kumuse.

⁷Fineasi okhwa Eliesa, omwichukhulu owo omusaayi Aruni nga abona ario. Enyokha alekha kumuse acha abukula lifumo liewe.

⁸Aloonda khu mundu owa Isiraeli oyo khukhwola mwieema. Abauna lifumo boombi. Nio bulwaale bwakama mu Baisiraeli.

⁹Ne kakhaba kario babaandu chielefu kamakhumi kabili na chine bafwa khulwe bulwaale.

¹⁰Wele Omunyali Owa Bioosi aboolela Musa ali,

¹¹“Fineasi okhwa Eliesa, omwichukhulu owo omusaayi Aruni akholile lirima liase liaweele khu Baisiraeli. Abiila bumayaanu nga samwene, akila nalekha khukhwira Baisiraeli mu lirima liase.

¹²Nono boolela Fineasi oli ndakhola endakaano eye kumuleembe ne naye.

¹³Endakaano yino echa khuba khu niye ne lisaaye liewe, enyuma wewe. Baliba basaayi khulwa mindali sikila Fineasi ayiimila Wele wewe lukoosi, mala Wele aabeela Baisiraeli.”

¹⁴Lisina lio Omuisiraeli owerwa ne omukhasi Mumidiani liaba Simuri okhwa Salu. Aba omwimeelesi wenju eye ekholo eya Simioni.

¹⁵Ne lisina lio omukhasi Omumidiani liaba Kosibi. Aba omukhaana owa Suri owaba omwimeelesi owe enju ndala eye Bamidiani.

¹⁶Wele Omunyali Owa Bioosi aboolela Musa ali,

¹⁷“Biila Bamidiani mala obeere,

¹⁸sikila Bamidiani bamukholela bubi nga ne bamubea e Peori. Lundi bakhole murio sikila bamubiila enywe sikila lifwa lia Kosibi omukhaana owo mwimeelesi owa Midiani owerwa khu ndaalo eye bulwaale bubwaba Peori.”