Read lubukusu Khub. 26 Bible Online

Khub. 26 - lubukusu bible

Khub. 26

¹ Enyuma we bulwaale Wele Omunyali Owa Bioosi aboolela Musa ne Eliesa okhwa Aruni omusaayi ali,

²“Bali libuusiana lioosi lie babaandu ba Isiraeli khukhwama khu bukhulu bwe kimiiko kamakhumi kabili ne khukhilakho. Babale khuloondekhana ne chinju che bapaapa babwe banyala bacha mwiie.”

³Musa ne Eliesa balomaloma ne babaandu khu siangalaamwe sia Moabu khu luuchi lwa Yoritani mu Yeriko. Bababoolela bali,

⁴bala babaandu khukhwama khu bukhulu bwe kimiiko kamakhumi kabili khuchiililila nga Wele Omunyali Owa Bioosi ne alaka Musa. Abano nibo babaandu ba Isiraeli babama mu sibala sia Misiri:

⁵Lisaaye lia Rubeni (Rubeni aba okhwa Yakobo omubele) yabalwa. Khukhwama khu Hanoki yamamo ekholo eye Baanaki. Khukhwama khu Palu yamamo ekholo eye Bapalu.

⁶Hesironi, arusia ekholo eye Bahesironi ne Karimi arusia ekholo eye Bakarimi.

⁷Lisaaye lie Barubeni liabalwa liola babaandu chielefu arubaine na tatu ne chimia saba ne kamakhumi kataru.

⁸Omusoleeli owa Palu aba Eliabu

⁹ne babaana ba Eliabu be siseecha baba Nemueli, Tatani, ne Abiramu. Tatani ne Abiramu baba babemeelesi be babaandu bayingania Musa ne Aruni mala baloonda khu Kora nga ne aukha khu Wele Omunyali Owa Bioosi.

¹⁰Liloba liasama mala liabamila ne Kora. Bafwa khu siise silala ne babaandu chimia chibili ne kamakhumi karaano ba babunisibwa ne kumulilo. Babaandu abo nga ne bafwa, baba likaania khu baandu.

¹¹Ne kakhali ba okhwa Kora se bafwa tawe.

¹²Ne lisaaye lia Simioni khuloondekhana ne chinju chabwe baba: Nemueli, Yamini, Yakini,

¹³Sera, ne Shauli.

¹⁴Lisaaye lino liabalwa liola babaandu chielefu ishirini na mbili ne chimia chibili.

¹⁵Lisaaye lia Kati khuloondekhana ne chinju chabwe baba lisaaye lia Sefoni, Haki, Shuni;

¹⁶Osini, Eri,

¹⁷Aroti, ne Areli.

¹⁸Khukhwama munju cha Kati chino babaandu ba babalwa baba chielefu kamakhumi kane, ne chimia chiraano.

¹⁹Ba okhwa Yuda baba Eri ne Onani. Eri ne Onani bafwila mu sibala sia Kanaani.

²⁰Ne be kholo eya Yuda khuloondekhana ne lisaaye liabwe baba: lisaaye lia Shela, Peresi, ne Sera.

²¹Be nju eya Peresi, baba Hesironi, ne Hamuli.

²²Boosi baba babaandu boola chielefu sabini na sita, ne chimia chiraano.

²³Lisaaye lia Isakari: khuloondekhana ne chinju chabwe baba lisaaye lia Dola, Puba,

²⁴Yashubu, ne Shimuroni.

²⁵Chino nicho chichabalwa. Boosi baba babaandu chielefu sitini naine ne chimia chitaru.

²⁶Lisaaye lia Sebuluni khuloondekhana ne chinju chabwe baba: lisaaye lia Sereti, Eloni, ne Yaileeli.

²⁷Boosi baba babaandu chielefu kamakhumi sita ne chimia chiraano.

²⁸Babaana ba Yosefu baba Manase ne Efuraimu.

²⁹Lisaaye lia Manase yabamo, Makiri, Makiri aba paapa owa Kileati, niye chikholo che Bakileati bakukhakho.

³⁰Lisaaye lia Kileati liaba Yeseri Heleki,

³¹Asirieli, Shekemu,

³²Shemita, ne Heferi.

³³Nono Selofehadi okhwa Heferi se abakho ne babaana be siseecha tawe, ne bakhali bakhaana bong'ene. Kamasina kabwe kaba, Maila, Noa, Hokila, Milika, ne Tirisa.

³⁴Abo nibo baba lisaaye lia Manase. Boosi baba babaandu chielefu khamusini na mbili ne chimia saba.

³⁵Elino nilio lisaaye lia Efuraimu: lisaaye lia Shutela, Bekeri, ne Tahani.

³⁶Lisaaye lia Erani liakukha khu Shutela.

³⁷Elino nilio lisaaye lia Yosefu. Boosi baba chielefu kamakhumi kataru na chibili, ne chimia chiraano.

³⁸Lisaaye lia Benjamini khuloondekhana ne chinju chabwe baba: lisaaye lia Bela, Asibeli, Ahiramu,

³⁹Shefufamu, ne Hufamu.

⁴⁰Luya lwa Bela lwabamo Ariti ne Naamani.

⁴¹Abo nibo baba lisaaye lia Bela. Boosi baba babaandu chielefu arubaine na tano ne chimia sita.

⁴²Lisaaye lia Dani liabamo luuya lwa Siulamu,

⁴³lulwabalwa lwabamo babaandu chielefu sitini naine ne chimia chine.

⁴⁴Lisaaye lia Asieri liaba: lisaaye lia Imuna, Isibi, ne Beria,

⁴⁵Luya lwa Beria lwabamo Heberi ne Malikieli.

⁴⁶Asieri aba ne omukhaana bali Sera.

⁴⁷Lisaaye lia Asieri lioosi liaba babaandu chielefu khamusini na tatu ne chimia chine.

⁴⁸Lisaaye lia Nafutali khuloondekhana ne chikholo chabwe liaba: lisaaye lia Yaiseeli, Kuni,

⁴⁹Yeseri, ne Shilemu.

⁵⁰Elio nilio lisaaye lia Nafutali. Boosi baba babaandu chielefu arubaine na tano ne chimia chine.

⁵¹Babaandu Baisiraeli boosi nga babalwa baba chielefu chimia sita na endala ne chimia saba ne kamakhumi kataru.

⁵² Wele Omunyali Owa Bioosi aboolela Musa ali,

⁵³“Khu bano kamaloba kalikabwa khuloondekhana ne chikholo.

⁵⁴Khu kholo eli engali ocha khukikaba kumukabwa kumukali. Ne ekholo engeekhe ocha khukikaba kumukabwa kumukeekhe, buli ekholo khuloondekhana ne bukali bwayo.

⁵⁵Ne kakhali, kamaloba kakabwa khulwe khukhupa ekura. Baandu banyoole kamaloba khuloondekhana ne chikholo che bakuuka babwe.

⁵⁶Kumukabwa kwabwe kucha khukabwa khuloondekhana ne ekura, akari we bukali ne bukeekhe bwabwe.”

⁵⁷Abano nibo Balawi ba babalwa khuloondekhana ne chinju chabwe: lisaaye lia Kerishoni, Koati, ne Merari.

⁵⁸Abano bosi baba lisaaye lia Lawi: lisaaye lia Balibuna, Baeburoni, Bamaili, Bamusi ne Bakora. Koati aaba raraawe owa Amuramu.

⁵⁹Omukhasi owa Amuramu aba Yakobeti, omukhaana owa Lawi. Lawi amusaala ne ali e Misiri. Yokebeti asaalila Amuramu babaana bataru, Aruni ne Musa, ne omukooko wabwe Miriamu.

⁶⁰ Ne Aruni aba ne babaana be siseecha bane, Natabu, Abihu, Eliesa, ne Itamari.

⁶¹ Ne kakhali Natabu ne Abihu bafwa nga ne baana kumulilo kukhali kumutakatifu tawe khu Wele Omunyali Owa Bioosi.

⁶²Babaana be siseecha Balawi ba baaba be bukhulu bwe kumwesi mulala namwe khukhilakho baba chielefu kamakhumi kabili ne chitaru. Babalwa bong'ene khukhwama khu Baisiraeli babaandi, sikila se babakabakho kumukabwa kwe kamaloba kosi kosi mu Isiraeli tawe.

⁶³Musa ne omusaayi Eliesa babala babaandu bano boosi. Baababalila khu siangalaamwe sia Moabu siimbi ne luluuchi lwa Yoritani e Yeriko.

⁶⁴Ne kakhali mbao omundu yesi yesi owalekhwa mu nibo tawe. Musa ne omusaayi Aruni bamala khubala mu khunyoa mu sichiimi sia Sinai tawe.

⁶⁵ Khu nibo, Wele Omunyali Owa Bioosi aloma ali, “Boosi bacha khufwila mu sichiimi,” Se aaramakho omundu akhaba mulala tawe ne akhali Kalebu okhwa Yefune ne Yoshua okhwa Nuni.