Read lubukusu Khub. 27 Bible Online

Khub. 27 - lubukusu bible

Khub. 27

¹Mahila Noa, Hokila, Milika ne Tirisa, baba bakhaana ba Selofehadi becha siimbi. Selofehadi aba okhwa Heferi, omwichukhulu owa Kileati, lundi sisoni sia Makiri, okhwa Manase. Manase aba okhwa Yosefu.

²Beema ebweeni wa Musa ne omusaayi Eliesa, ne babemeelesi ne babaandu boosi. Beema ebweeni we a muliango kwe liiema lie kumuse mala baloma bali,

³“Paapa wefwe afwila mu sichiimi. Se aba mulala khwaabo ba babuusiana alala ne Kora khulekha Wele Omunyali Owa Bioosi tawe. Niye afwa khulwe bumayaanu bwewe omwene. Ne se aba ne babaana be sisoleeli tawe.

⁴Lisina lia paapa wefwe lilatiba sikila se aba ne babaana be siseecha tawe. Khuelesie efwe kumukabwa mu balebe bapaapa wefwe.”

⁵Musa ayila kamalilo kabwe ebweeni wa Wele Omunyali Owa Bioosi.

⁶Wele Omunyali Owa Bioosi aboolela Musa ali,

⁷ “Nilio bakhaana ba Selofehadi benya lili lia ng'ali. Baelesie kumukabwa mu balebe ba rarawabwe. Lekha kumukabwa kwa rarawabwe kuche khu nibo.

⁸Boolela Baisiraeli oli, omundu yesi yesi nafwa ne akhalikho ne omwana owe siseecha tawe, omwana wewe owe siikhaana anyala ela khu miaandu kiewe.

⁹Ne aba ne akhali ne omwana owe siikhaana tawe, bawandaaye ba raraawe okundi banyala bela khu miaandu.

¹⁰Ne aba ne akhalikho ne bawandaaye ba raraawe okundi tawe, bawandaaye ba raraawe banyala bela khu miaandu.

¹¹Ne raraawe aba ne akhali ne bawandaaye tawe, elesia kimiaandu omulebe owe aembi mu bulebe. Babaandu ba Isiraeli bakhoya balibukule likhuwa lino nga lilaka lilienyibwa, nga Wele Omunyali Owa Bioosi ne alaka Musa.”

¹² Wele Omunyali Owa Bioosi aboolela Musa ali, “Niina khu sikulu lwa Abarimu luno mala obone sibala nisio mbelesie Baisiraeli.

¹³Ne omalile khu sibona, ocha khufwa, nga wandaayo Aruni ne afwa.

¹⁴Olafwa sikila waleka lilaka liase mu sichiimi sia Sini. Nga babaandu boosi ne bakholela situluungu emeechi ka Meriba mwaloba khunjokesia ese nga omutakatifu ebweeni wabwe.” (Meriba luli luluuchi luli e Kadeshi mu sichiimi sia Sini.)

¹⁵Musa asaba ali,

¹⁶“Wele Omunyali Owa Bioosi, Wele owe chiroho che babaandu boosi, robora, omundu onyala emeelela babaandu bano.

¹⁷ Robora omundu onyala abemeelela mu buli siindu nio babaandu bowo balekhe khuba nga kamakheese kakhali ne omwaayi tawe.”

¹⁸ Ne Wele Omunyali Owa Bioosi aboolela Musa ali, “Bukula Yoshua okhwa Nuni. Niye roho wase alimo mala murekho kamakhono kowo.

¹⁹Mwimisie ebweeni wo musaayi Eliesa ne babaandu boosi, mala omure khu milimo ebweeni wabwe.

²⁰Muelesiekho bunyali bwowo, nio babaandu boosi ba Isiraeli bamurie.

²¹ Acha khwima ebweeni womusaayi Eliesa. Eliesa acha khunyoola bukambisi khukhwama khu Wele Omunyali Owa Bioosi mu khurumikhira Urimu ne Tumimu.[6] Mu ngila yino Eliesa acha khurangirira Isiraeli mu makhuwa kabwe koosi.”

²²Musa akhola nga Wele Omunyali Owa Bioosi ne amulaka. Abukula Yoshua mala amukhola eema ebweeni we omusaayi Eliesa, ne libuusiana lioosi.

²³ Musa ara kamakhono kewe khu murwe kwa Yoshua mala amura khu milimo nga Wele Omunyali Owa Bioosi ne amulaka.