Read lubukusu Khub. 28 Bible Online

Khub. 28 - lubukusu bible

Khub. 28

¹Wele Omunyali Owa Bioosi aboolela Musa ali,

²“Laka Baisiraeli oli, ‘siianwa khwise sie biakhulia khulwe khukhwosia, sisiimisia siikhoya siaanwe khwise mu biise bibienyekhana.’

³Ebino bili biianwa bie khukhwosia nibio mukhoya mwaana khu Wele Omunyali Owa Bioosi: kamameeme kabili ke bukhulu bwe kumwiiko mulala kakhalikho ne butekhele tawe. Aana buli endaalo nga siianwa sia buli lwosi.

⁴Aana limeeme lilala kumutikhinyi ne likhola khabili ekolooba.

⁵Aana lundi buli silala khwikhumi sie siianwa sie bufu siikula silala, butubaanisibwe ne kamafura echuupa endala ke kumusabibu.

⁶Sino sili siianwa sie khukhwosia sia buli lwosi nisio sisiarebwao sibeo khu sikulu sia Sinai. Siianwa sino sili sie khukhwosia nga esilikakha esiimisia Wele Omunyali Owa Bioosi.

⁷Aana siianwa sie khunywa echuupa endala khu buli limeeme. Mulisichukha Abuundu Atakatifu siianwa sie khunywa sie ndali endulu.

⁸Ekolooba aana limeeme likhola khabili. Liaane bulayi bwene nga siianwa sie biakhulia sie kumutikhinyi lundi nga siianwa sie khunywa. Mukhasiaane khulwe khukhwosia. Sili ne silikakha esiimisia Wele Omunyali Owa Bioosi.

⁹“Khu ndaalo eya sabato aana kamameeme kabili ke bukhulu bwe kumwiiko mulala buli lilala, kakhalikhoomo butekhele tawe, ne chibili khwikhumi che bufu butubaasibwe ne kamafura khulwe siianwa sie biakhulia ne sie khunywa.

¹⁰Sino nisio siianwa sie khukhwosia sia buli esabato khutasa khu siianwa sia buli lwosi alala ne siianwa sie khunywa.

¹¹“Aana siianwa sie khukhwosia khu Wele Omunyali Owa Bioosi buli kumwesi ne kunyoa. Aana chiuunwa chindiiti chibili, limiiku lilala, kamameeme saba ke bukhulu bwe kumwiiko mulala, koosi kakhalimo butekhele tawe.

¹²Aana lundi siianwa sie biakhulia, aana bitaru khwikhumi bie bufu bunosie mu siikula butubaasibwe ne kamafura khu buli euunwa, bibili khu khumi bie bufu bunosie nga siianwa sie biakhulia bitubanisibwe ne kamafura khu buli limiiku.

¹³Ne khu buli limeeme aana silala khwi khumi sie bufu butubaanisibwe ne kamafura nga siianwa sie biakhulia. Siaane nga siianwa sie khukhwosia, nga esilikakha esiimisia Wele Omunyali Owa Bioosi.

¹⁴Siianwa sie khunywa siabio siliba endali chichupa chibili khu buli euunwa ne echuupa ne nusu khu buli limiiku, ne echuupa ndala khulwa buli limeeme. Ebio nibio bicha khuba biianwa bie khukhwosia bia buli mwesi khu miesi kioosi kie kumwiiko.

¹⁵Lundi muliaana endurume khu Wele Omunyali Owa Bioosi khu siianwa sie khurusiao bubwoni. Siliaanwa khutasa khu siianwa sia buli lwosi sie khukhwosia ne siianwa sie khunywa.

¹⁶ “Endaalo eye ekhumi na chine eye kumwesi kwe khunyoa eli endaalo eye e pasaka eya Wele Omunyali Owa Bioosi.

¹⁷ Ne khu ndaalo eye ekhumi na chiraano eye kumwesi kuno, eliba eya naikara. Khu ndaalo saba kumukaati kukhalimo limela kwong'ene nikwo kuliibwa.

¹⁸Khu ndaalo enyoa eya naikara mube ne libuusiana litakatifu. Ne mukhakholakho kumulimo kwosi kwosi tawe.

¹⁹Ne kakhali aana siianwa sie khukhwosia khu Wele Omunyali Owa Bioosi. Aana chiuunwa chibili chindiiti, limiiku lilala, ne kamameeme ke siseecha saba ke bukhulu bwe kumwiiko mulala, koosi kakhalimo ne butekhele tawe.

²⁰Lundi aana siianwa sie biakhulia sie bufu butubaanisibwe ne kamafura. Aana bitaru khwi khumi mu siikula bie bufu khu buli euunwa, ne bibili khwikhumi khu buli limiiku,

²¹ne silala khwikhumi khu buli limeeme khu mameeme.

²²Lundi aana endurume ndala nga siianwa sie khurusiao bubwoni khulwe khureera khubeelwa bubwoni bwenywe.

²³Mulaana biianwa bino khutasa khu siianwa sie khukhwosia sie kumutikhinyi, sili siianwa sia buli lwosi.

²⁴Mungila yino ne eng'ene, mulaana buli endaalo khu ndaalo saba siianwa sie biakhulia, khulwe khukhwosia esilikakha esiimisia Wele Omunyali Owa Bioosi. Muaane khutasa khu siianwa sie khukhwosia sia buli lwosi ne siianwa sie khunywa.

²⁵Mubuusiane khulwe khukhwesaaya endaalo eya saba. Ne mu khakholakho kumulimo kwosi kwosi tawe.

²⁶ “Khu ndaalo enyoa eye biakhulia bie khunyoa bie likesa, aanila Wele Omunyali Owa Bioosi biakhulia biiyaaya mu siise sia Naikara eye Likesa nga muba ne libuusiana litakatifu. Mukhakholakho kumulimo kwosi kwosi tawe.

²⁷Ana siianwa sie khukhwosia nga esilikakha esiimisia Wele Omunyali Owa Bioosi. Aana chiuunwa chibili chindiiti, limiiku lilala, ne kamameeme ke siseecha saba ke bukhulu bwe kumwiiko mulala.

²⁸Lundi aana siianwa sie biakhulia sia abweene sie bufu butubaasibwe ne kamafura, aana bitaru khwi khumi sie siikula sie bufu khu buli euunwa, ne bibili khwikhumi khu buli limiiku,

²⁹ne silala khwikhumi khu buli limeeme.

³⁰Lundi aana endurume ndala khulwe khurusiao bubwoni, khulwe khurusiao bubwoni bwenywe.

³¹Aana lundi biianwa bie khunywa khutasa khu bie khukhwosia bia buli lwosi ne biianwa bie biakhulia. Mukhoya mubone muli se bilikhomo butekhele tawe.”