Read lubukusu Khub. 29 Bible Online

Khub. 29 - lubukusu bible

Khub. 29

¹Khu ndaalo enyoa eye kumwesi kukhola saba mube ne libuusiana litakatifu khulwe khukhwisaaya. Mukhakholakho kumulimo kwosi kwosi tawe. Endaalo yino eliba eye khukhupa chikhoombi.

²Mukhaane siianwa sie khukhwosia nga esilikakha esiimisia Wele Omunyali Owa Bioosi. Aana euunwa ndala endiiti, limiiku lilala, ne kamameeme ke siseecha saba ke bukhulu bwe kumwiiko mulala, kakhalikhoomo butekhele tawe.

³Lundi aana siianwa sie biakhulia sie bufu butubaasie ne kamafura: bitaru khwikhumi bie siikula sie bufu khulwe buli euunwa, bibili khwikhumi khu buli limiiku,

⁴ne silala khwikhumi khu buli limeeme khu mameeme saba.

⁵Lundi aana endurume ndala khulwe siianwa sie khurusiao bubwoni bwenywe.

⁶Aana bino khutasakho khu siianwa sie khukhwosia khulwe endaalo enyoa eye kumwesi, alala ne siianwa siayo sie biakhulia, ne siianwa sie khukhwosia sia buli lwosi alala ne siianwa siayo sie biakhulia ne siianwa sie khunywa. Biaane khuloondekhana ne lilaka liabio khulwe khubiosia nga esilikakha esiimisia Wele Omunyali Owa Bioosi.

⁷ Khu ndaalo ekhola ekhumi eye kumwesi kwa saba, mube ne libuusiana litakatifu. Khu ndaalo eyo mukhalia namwe mukhakholakho kumulimo tawe.

⁸Aana khu Wele Omunyali Owa Bioosi siianwa sie khukhwosia, nga esilikakha emusiimisia. Mukhaane euunwa endiiti, limiiku lilala, ne kamameeme ke siseecha saba ke bukhulu bwe kumwiiko mulala, koosi kakhalikhoomo butekhele tawe.

⁹Muaane siianwa sie biakhulia sie bufu butubaanisibwe ne kamafura: bitaru khwikhumi bie siikula sie bufu khu buli euunwa, bibili khwikhumi khu limiiku,

¹⁰ne silala khu buli limeeme.

¹¹Lundi aana endurume ndala khulwe siianwa sie bubwoni, khutasa khu siianwa sie khurusiao bubwoni, ne siianwa sie khukhwosia sia buli lwosi alala ne siianwa sie biakhulia ne siianwa sie khunywa.

¹² “Khu ndaalo eye ekhumi na chiraano eye kumwesi kwa saba, mube ne libuusiana litakatifu. Mukhakholakho kumulimo tawe. Mulaba ne naikara khu Wele Omunyali Owa Bioosi khulwe chindaalo saba.

¹³Mukhaane siianwa sie khukhwosia, nga esilikakha esiimisia Wele Omunyali Owa Bioosi. Aana chiuunwa chindiiti ekhumi na chitaru, kamamiiku kabili, ne kamameeme ke siseecha ke bukhulu bwe kumwiiko mulala likhumi na kane, koosi kakhalikhoomo butekhele tawe.

¹⁴Aana siianwa sie biakhulia sie bufu butubaanisibwe ne kamafura. Aana bitaru khwikhumi bie siikula silala sie bufu khu uunwa ekhumi na chitaru ne bibili khwikhumi bie bufu khu buli limiiku khu mamiiku kabili,

¹⁵silala khwi khumi sie bufu khu buli limeeme.

¹⁶Lundi aana endurume ndala khulwa siianwa sie khurusiao bubwoni khutasa khu siianwa sie khukhwosia sia buli lwosi alala ne siianwa siasio sie biakhulia ne siianwa sie khunywa.

¹⁷“Khu ndaalo ekhola khabili eya naikara aana chiuunwa chindiiti likhumi na chibili, kamamiiku kabili, kamameeme ke siseecha ekhumi na kane ke kumwiiko mulala buli lilala bikhalikhoomo butekhele tawe.

¹⁸Biaane alala ne siianwa sie biakhulia ne siianwa sie khunywa khulwe chiuunwa, kamamiiku, ne kamameeme, khuloondekhana ne lilaka.

¹⁹Aana lundi endurume ndala khulwe siianwa sie khurusiao bubwoni khutasa khu siianwa sie khukhwosia sia buli lwosi ne siianwa siasio sie biakhulia ne biianwa biayo bie khunywa.

²⁰“Khu ndaalo ekhola khataru eya naikara aana chiuunwa chindiiti likhumi na ndala, kamamiiku kabili, ne kamameeme ke siseecha ke bukhulu bwe kumwiiko mulala likhumi na kane, bioosi bikhalikhoomo butekhele tawe.

²¹Aana ebio alala ne siianwa siayo sie biakhulia ne biianwa bie khunywa khu chiuunwa, kamamiiku, ne kamameeme, khuloondekhana ne lilaka.

²²Lundi aana endurume ndala khulwe siianwa sie khurusiao bubwoni khutasa khu siianwa sie khukhwosia sia buli lwosi ne siianwa siasio sie biakhulia ne siianwa siasio sie khunywa.

²³“Khu ndaalo ekhola khane aana chiuunwa likhumi chindiiti, kamamiiku kabili ne kamameeme ke siseecha likhumi na kane ke bukhulu bwe kumwiiko mulala, bioosi bikhalikhoomo butekhele tawe.

²⁴Aana alala ne siianwa sie biakhulia ne sie khunywa khulwe chiuunwa, khulwe kamamiiku, ne khulwe kamameeme, khuloondekhana ne lilaka.

²⁵Aana lundi ne endurume ndala khulwe siianwa sie khurusiao bumayaanu, khutasa khu siianwa sie khukhwosia sia buli lwosi, ne siianwa siasio sie biakhulia ne sie khunywa.

²⁶“Khu ndaalo ekhola kharaano aana chiuunwa chindiiti tisa, kamamiiku kabili ne kamameeme ke siseecha ke bukhulu bwe kumwiiko mulala likhumi na kane, bioosi bikhalikhoomo butekhele tawe.

²⁷Aana alala ne siianwa sie biakhulia ne siianwa sie khunywa khulwe chiuunwa, kamamiiku, ne kamameeme, khuloondekhana ne lilaka.

²⁸Lundi aana endurume ndala khulwe siianwa sie khumalao bubwoni khutasa khu siianwa sie khukhwosia sia buli lwosi ne siianwa siasio sie biakhulia ne sie khunywa.

²⁹“Khu ndaalo ekhola sita aana chiuunwa munaane chindiiti, kamamiiku kabili, ne kamameeme ke siseecha ke bukhulu bwe kumwiiko mulala likhumi na kane, bioosi bikhalikhoomo butekhele tawe.

³⁰Biaane alala ne siianwa sie biakhulia ne siianwa sie khunywa khulwe chiuunwa, kamamiiku ne kamameeme, khuloondekhana ne lilaka.

³¹Lundi aana endurume ndala khulwe siianwa sie khurusiao bubwoni, khutasa khu siianwa sie khukhwosia sia buli lwosi, ne siianwa siasio sie biakhulia ne biianwa biabio bie khunywa.

³²“Khu ndaalo ekhola saba aana chiuunwa saba chindiiti, kamamiiku kabili, ne kamameeme ke siseecha ke bukhulu bwe kumwiiko mulala likhumi na kane, bioosi bikhalikhoomo butekhele tawe.

³³Aana alala ne siianwa sie biakhulia ne siianwa sie khunywa khulwe chiuunwa, kamamiiku, ne kamameeme, khuloondekhana ne lilaka.

³⁴Aana lundi endurume ndala khulwe siianwa sie khurusiao bubwoni, khutasa khu siianwa sie khukhwosia sia buli lwosi, ne siianwa siasio sie biakhulia, ne biianwa siasio sie khunywa.

³⁵“Khu ndaalo ekhola munaane buusiana alala, mukhakholakho kumulimo tawe.

³⁶Ne kakhali mukhaane siianwa sie khukhwosia nga esilikakha esiimisia Wele Omunyali Owa Bioosi. Mukhaane euunwa ndala endiiti, limiiku lilala, ne kamameeme ke siseecha saba ke bukhulu bwe kumwiiko mulala, bioosi bikhalikhoomo butekhele tawe.

³⁷Mukhaane alala ne siianwa sie biakhulia ne biianwa bie khunywa khulwe euunwa, limiiku, kamameeme, khuloondekhana ne lilaka.

³⁸Lundi mukhaane endurume ndala khulwe siianwa sie khurusiao bubwoni, khutasa khu siianwa sie khukhwosia sia buli lwosi ne siianwa siasio sie biakhulia ne siianwa siasio sie khunywa.

³⁹“Bino bioosi mukhaane khu Wele Omunyali Owa Bioosi mu naikara chicharoborwa. Mukhabiaane khutasa khu biianwa nibio mwechuba khuaana ne biianwa bie khukhwirusia, bie khukhwosia, bie biakhulia, biianwa bie khunywa ne biianwa bienywe bie kumuleembe.”

⁴⁰Nio Musa aboolela Baisiraeli buli sisiindu bulayi bwene nga Wele Omunyali Owa Bioosi ne amulaka.