Read lubukusu Khub. 3 Bible Online

Khub. 3 - lubukusu bible

Khub. 3

¹Bano bali be nju eya Aruni nende be nju eya Musa mu sise nisio Wele Omunyali Owa Bioosi alomaloma ne Musa khu sikulu sia Sinai.

² Kano kali kamasina ke basoleeli ba Aruni: Natabu aba omubele, ne Abiiu, Eliesa ne Itamari.

³Abo nibo basoleeli ba Aruni, ba bachukhwakho kamafura khuba basaayi. Aruni abarobora khukhola kimilimo kie busaayi.

⁴ Ne kakhali Natabu ne Abiiu beerwa sikila babwanila Wele Omunyali Owa Bioosi kumulilo kukhenyekhana tawe, mu sichiimi sia Sinai. Ne se babakho ne babaana tawe. Nio Eliesa ne Itamari bakhola kimilimo kie busaayi mu bulamu bwa paapa wabwe Aruni.

⁵Nio Wele Omunyali Owa Bioosi aaboolela Musa ali,

⁶“Reera ekholo eya Lawi siimbi mala obare ebweeni wo musaayi Aruni nio bamuyeete.

⁷Bacha khuyeeta Aruni ne libuusiana lioosi, a liiema lie kumuse. Balikhola kimilimo mwiiema litakatifu.

⁸Bacha khuliinda bibiindu bioosi biili mu liiema lie kumuse, ne khukhola kimilimo kioosi khulwe Baisiraeli a liiema litakatifu.

⁹Elesia Balawi khu Aruni ne babaana bewe. Baebwa elala khu Aruni khukhwama mu baandu ba Isiraeli.

¹⁰Lundi orobore Aruni ne basoleeli bewe, khukhola kimilimo kie busaayi. Ne kakhali kaaba bali omundu yesi yesi eecha siimbi abiindu bitakatifu aleerwa.”

¹¹Nio Wele Omunyali Owa Bioosi aaboolela Musa ali,

¹²“Lola nabukuule Balawi khukhwama mu baandu ba Isiraeli. Nababukuule mu bweyaangu bwa buli mubele khukhwama mu Baisiraeli. Balawi bacha khuba babaase.

¹³ Sikila babeele boosi babaase. Khu ndaalo niyo neera babele boosi mu sibala sia Misiri, neyaulila babele boosi, bo mundu ne esaang'i. Baliba babaase, Ese ndi Wele Omunyali Owa Bioosi.”

¹⁴Wele Omunyali Owa Bioosi aaboolela Musa mu sichiimi sia Sinai ali,

¹⁵“Bala Balawi khuloondekhana ne luuya ne chinju chabwe. Bala buli mwana owe siseecha owe bukhulu bwe kumwesi mulala namwe khukhilakhoo.”

¹⁶Nio Musa aria lilaka lia Wele Omunyali Owa Bioosi mala abala babaandu.

¹⁷Ne bano nibo basoleeli ba Lawi. Kerishoni, Koati ne Merari.

¹⁸Ne bano nibo basoleeli ba Kerishoni khuloondekhana ne chinju chabwe: Libini ne Shimei.

¹⁹Basoleeli ba Kohati khuloondekhana ne chinju chabwe, baba: Amuramu, Ishihari, Heburoni ne Usieli.

²⁰Ne basoleeli ba Merari khuloondekhana ne chinju chabwe baba, Maila ne Musihi. Abo nibo ba baba chinju che Balawi khuloondekhana luuya lwabwe.

²¹Chinju cha Libini ne Shimei chaama khu luuya lwa Kerishoni.

²²Bukali bwabwe khuloondekhana ne babaana be siseecha be bukhulu bwe kumwesi mulala namwe khukhilakhoo, baba chielefu saba ne chimia chiraano.

²³Luya lwa Kerishoni lwakhola ekambi eyabwe enyuma we liiema litakatifu, lubeka lwe mumbo.

²⁴Eliasafu okhwa Laeli aba omwimeelesi wabwe.

²⁵Bakerisioni baliindanga liiema litakatifu, liiema lie kumuse ne sifuunikho sialio, epasia eye kumuliango kwe liiema lie kumuse,

²⁶ne chimbata che luuya, epasia eye kumuliango kwe luuya lulwabotookhelela liiema litakatifu ne alutare, ne kimikoye kiayo. Lundi bakhola kimilimo kioosi khuloondekhana ne bibiindu bino.

²⁷Chinju che Baamuramu, Baasiari, Baeburoni, ne Bausieli chaama mu kholo eya Koati.

²⁸Bukali bwe babaana be siseecha be bukhulu bwe kumwesi mulala namwe khukhilakhoo baba chielefu munaane ne chimia sita. Bakholanga kimilimo kie Abuundu Atakatifu.

²⁹Ekholo yino yakhola ekambi eyayo lubeka lwe bunafubo we liiema litakatifu.

³⁰Elisafani okhwa Usieli aba omwimeelesi owe nju eye Bakoati.

³¹Kumulimo kwabwe kwaba khuliinda lisanduku lie ndakaano, emesa, siteetwe, chialutare, bibiindu bie abuundu atakatifu, nibio basaayi bakholelangakho kimilimo, epasia ne kimilimo kioosi khuloondekhana ne bibiindu ebio.

³²Eliesa okhwa Aruni omusaayi, aba omwimeelesi owe babemeelesi be Balawi. Lundi emeelelanga abo ba bakholanga kimilimo Abuundu Atakatifu.

³³Chinju che Bamaili ne Bamusiihi chama mu luuya lwa Merari.

³⁴Bukali bwe babaana be siseecha be bukhulu bwe kumwesi mulala namwe khukhilakhoo baba chielefu sita ne chimia chibili.

³⁵Omwimeelesi wabwe aba Surieli okhwa Abihaili. Bakhola ekambi lubeka lwe bunaswa we liiema litakatifu.

³⁶Kimilimo kiabwe kiaaba khuliinda biteechi bie liiema litakatifu, kimitalaachi, chinjeko, chinguulo, ne bibiindu bialio bioosi, ne kimilimo kioosi khuloondekhana ne bibiindu bino.

³⁷Lundi baba ne kimilimo kie khuliinda chinjeko chichabotookhelela, bibale, bisiindi ne kimikoye.

³⁸Ne abo babakhola chikambi ebweeni we liiema litakatifu lubeka lwe bukwe, ebweeni we liiema lie kumuse lubeka nilwo enyanga esoelanga, baba Musa ne Aruni ne babaana bewe. Bemeelelanga kimilimo kikiekholekha abuundu atakatifu, siosi siosi sisienyekhana khukholwa khulwe babaandu ba Isiraeli. Ne omundu okundi yesi yesi owecha siimbi Abuundu Atakatifu enyekhana eerwe.

³⁹Musa ne Aruni babala Balawi khuloondehana ne chinju chabwe nga Wele Omunyali Owa Bioosi ne alaka. Boosi baba chielefu ishirini na mbili. Ba babalwa baba be kumwesi mulala ne khukhilakhoo.

⁴⁰Wele Omunyali Owa Bioosi aaboolela Musa ali, “Bala babaana be siseecha babele boosi ba Isiraeli khukhwamila kumwesi mulala khuchiililila. Babale khulwe khubukula kamasina kabwe.

⁴¹Mbukulile Balawi sikila ese ndi Wele Omunyali Owa Bioosi mu bweyaangu bwe babele mu baandu ba Isiraeli ne chikhaafu che Balawi mu bweyaangu bwe chimoosi che babaandu ba Isiraeli.”

⁴²Nio Musa aabala babele mu baandu ba Isiraeli nga Wele Omunyali Owa Bioosi ne amulaka.

⁴³Ne babaana be sisoleeli babele, khukhwama bukhulu bwe kumwesi mulala ne khuchiililila baba chielefu ishirini na mbili ne chimia chibili ne kamakhumi saba na bataru.

⁴⁴Wele Omunyali Owa Bioosi aaboolela Musa ali,

⁴⁵“Bukula Balawi mu bweyaangu bwe babele mu Baisiraeli ne chikhaafu chabwe mu bweyaangu bwe che Baisiraeli. Balawi bali babaase: Ese ndi Wele Omunyali Owa Bioosi.

⁴⁶Mu Isiraeli balimo babaana babele chimia chibili ne kamakhumi saba na bataru khukhila Balawi. Khusikula bano,

⁴⁷bukula bitonyi biraano bie e Shekeli khu buli mulala. Loonda sikelo sie Abuundu Atakatifu.

⁴⁸Elesia Aruni ne babaana bewe chirupia che khusikula Baisiraeli chimia chibili ne kamakhumi saba na bataru bano.”

⁴⁹Musa abukula chirupia che khusikula Baisiraeli nibo Balawi bakhanyala khubukula bubweyaangu bwabwe tawe.

⁵⁰Khukhwama khu buli omubele owa Isiraeli, Musa aabukula chishekeli eelefu ndala ne chimia chitaru ne kamakhumi sita na chiraano. Chakelwa khuloondekhana ne sikelo sie Abuundu Atakatifu.

⁵¹Musa aelesia chirupia che khusikula khu Aruni ne babaana bewe khuloondekhana nga Wele Omunyali Owa Bioosi ne amulaka.