Read lubukusu Khub. 30 Bible Online

Khub. 30 - lubukusu bible

Khub. 30

¹Musa aboolela babemeelesi be chikholo che Baisiraeli ali, “Kano niko Wele Omunyali Owa Bioosi alaka,

² Omundu ne echuba khu Wele Omunyali Owa Bioosi namwe ne echuba khulwe ndakaano, se akhoyeele afunaka khu khwechuba khwewe tawe. Akhoyele akhole buli sisiindu nisio echuba.

³Omukhasi omuele osiimenya mungo mwa raraawe ne echuba khu Wele Omunyali Owa Bioosi mala ne echuba khulwe endakaano,

⁴akhoya akhole buli sisiindu nisio alaka namwe echuba. Akhoya akhola niko alaka aaba bali raraawe aulila niko echuba mala se amukaania tawe.

⁵Ne kakhali raraawe amukhiingilila khukhwichusia endakaano yewe khu ndaalo niyo aulila aba omukhasi oyo se enyibwa khukibiikha tawe. Wele Omunyali Owa Bioosi alimubeela, sikila raraawe amukhiingilila.

⁶Ne aaba omukhasi oyo ne alabeela ne asiili asi we endakaano, namwe aba ne ali asi we endakaano eye kamakhuwa niko aloma ne akhebaasia tawe,

⁷akhoya akhole buli sisiindu nisio alaka namwe echuba. Akhabikhe khukhwechuba khwewe aaba bali omuseecha wewe aulila mala se amukhiingilila tawe.

⁸Ne omuseecha wewe amukhiingilila khukhwichusia endakaano, khu ndaalo niyo akiulila omukhasi oyo ne echuba se akhoyeele wakibiikha tawe. Wele Omunyali Owa Bioosi alimubeela.

⁹Namulekhwa namwe omukhasi owalekhana ne omuseecha akhoya eechusie buli endakaano niyo akhola.

¹⁰Omukhasi oli ne omuseecha aaba ne akhola endakaano namwe echuba,

¹¹akhoya akhola buli sisiindu nisio alaka namwe echuba. Akhoya akhola ario aaba bali omuseecha wewe aulila mala se amukhiingilila tawe.

¹²Ne kakhali omuseecha wewe aaba ne aulila mala amukhiingilila, se akhoyeele echusia khukhwechuba tawe. Wele Omunyali Owa Bioosi alimubeela, sikila omuseecha wewe amukhiingilile khukhwichusia endakaano yewe.

¹³Omuseecha wewe ali ne bunyali khufukiilila namwe khuloba endakaano yosi yosi namwe khukhwechuba khwosi khwosi nikhwo akholile.

¹⁴Ne omuseecha wewe aaba ne akhalomakho liosi liosi buli endaalo tawe aba afukiilile khukhwechuba khwo omukhasi khwoosi ne ndakaano yewe yoosi niyo akhola. Aba afukiilile aaba ne akhalomakho liosi liosi tawe khukhwama khu ndaalo niyo aulilila.

¹⁵Ne aaba ne akelao aloba endakaano, enyuma we siise khuulila, aba alanyoola bumayaanu bukhoyeele bwecha khu mukhasi wewe.”

¹⁶Kano kali kamalaka niko Wele Omunyali Owa Bioosi alaka Musa kabeo akari wo mundu ne omukhasi wewe ne akari wa paapa ne omukhaana wewe osiili omuele munju eya raraawe.