Read lubukusu Khub. 31 Bible Online

Khub. 31 - lubukusu bible

Khub. 31

¹Wele Omunyali Owa Bioosi aboolela Musa ali,

²“Rungia bubi khu Bamidiani khu niko bakholela Baisiraeli. Ne nyuma wako olafwa.”

³Nio Musa aboolela babaandu ali, “Rekekha babaandu mwinywe khulwe liie, nio bache bebwaakale Midiani. Balacha khuruungisia bubi ne bubi khu Bamidiani nga Wele Omunyali Owa Bioosi ne enya.

⁴Khukhwama buli mu kholo eya Isiraeli ruma babaandu eelefu ndala khucha mwiie.”

⁵Nio babaandu eelefu ndala baroborwa khukhwama buli mu kholo, boosi alala baba babaandu chielefu likhumi na chibili khulwe liie.

⁶Musa aaruma babaandu bano mwiie. Fineasi okhwa Eliesa omusaayi, acha ne nabo. Asuta bibiindu bie Abuundu Atakatifu ne chikhoombi che khukhwekesia simanyisio sie liie.

⁷Bebwaakala Midiani, nga Wele Omunyali Owa Bioosi ne alaka Musa, mala bera babaandu be siseecha boosi.

⁸Bera babaami baraano ba Midiani. Babaami abo baba: Evi, Rekemu, Suri, Huri ne Reba. Bera akhaba ne Balamu okhwa Peori.

⁹Babaandu ba Isiraeli baamba embaambe bakhasi ne babaana be Bamidiani. Babukula chikhaafu chabwe choosi ne kamakheese kabwe koosi ne kimiaandu kiabwe kioosi.

¹⁰Boosia chingoba nicho bamenyamo ne chikambi chabwe choosi.

¹¹Babukula nibio banuula bioosi nende nibo baamba; babaandu ne bibiaayo.

¹²Babireera khu Musa ne omusaayi Eliesa ne libuusiana lie babaandu ba Isiraeli, ba baaba a kambi khu siangalaamwe sia Moabu, sikelekha sia Yoritani, e Yeriko.

¹³Musa, Eliesa omusaayi ne babemeelesi boosi be babaandu barura enje we kambi khukhwakanila banamae.

¹⁴Musa akhalalila babemeelesi be banamae babemeelela banamae be bipupu chimia ne chielefu babakobola khukhwama mwiie.

¹⁵Abareeba ali, “Sikila siina ne mulekhile bakhasi boosi baba balamu?

¹⁶ Khebulila muli bakhasi nibo babaloonda kamekisio ka Balamu e Peori bakila babaandu baleka Wele Omunyali Owa Bioosi. Elio nilio liliareera butinyu khu baandu ba Wele Omunyali Owa Bioosi.

¹⁷Nono khwako yiira buli mwana owe sisoleeli nende buli mukhasi owabakho ne omundu.

¹⁸Ne kakhali mulekhe bakhaana boosi basiili khubakho ne omundu tawe khuba babenywe.

¹⁹Kona enje we kambi khu ndaalo saba. Ne yesi yesi mwinywe owera omundu namwe owatiila khu mufu esiinge alala ne baambe benywe. Bakhole bario khu ndaalo eya khataru ne khu ndaalo eya saba.

²⁰Musiinge buli siindu sisiang'oonwa khukhwama khu lisielo ne bioosi bibiakholwa khukhwama khu bufuumbo bwe chimbusi, ne buli sioosi sisiakholwa khukhwama khu murongooro.”

²¹Omusaayi Eliesa aboolela babaandu babakobola khukhwama mwiie, “Kano kali kamalaka niko Wele Omunyali Owa Bioosi aelesia Musa:

²²esahabu, efwesa, kumukasa, ne sichuuma, machwenu, sibia;

²³bioosi bikhanyala biaya tawe bilisiingwa khubirira mu mulilo biliba bimiliiu. Ne kakhaba kario bilisiingwa ne kameechi ke khumiliisia. Ne siosi siosi sinyala siaya mukhasiingile kameechi.

²⁴Mwenyekhana khusiinga chingubo chenywe khu ndaalo ekhola saba, ne mukhabe bamiiliu enyuma wako mukheche mu kambi.”

²⁵Wele Omunyali Owa Bioosi aboolela Musa ali,

²⁶“Ewe ne omusaayi Eliesa, alala ne babemeelesi be babaandu, bala buli sisiindu nisio baamba, baboe ne bibiaayo.

²⁷Kabania bioosi mu bitonye bibili. Sitonyi silala sibe sie banamae babacha mwiie ne sitonyi sisiindi sibe sie libuusiana lie babaandu lioosi.

²⁸Khukhwama mu sitonyi sie banamae babacha mwiie, bukulamo busuuru bwa Wele Omunyali Owa Bioosi. Bukula omuambe mulala khukhwama khu buli baambe chimia chiraano. Ne khola orio akhaba khu khaafu, khu punda ne khu makheese.

²⁹Bibukule khukhwama khu sitonyi siabwe mala obieelesie Eliesa omusaayi nga siianwa khu Wele Omunyali Owa Bioosi.

³⁰Ne khukhwama mu sitonyi sie Baisiraeli olarusia mulala khu buli kamakhumi karaano, khu baandu, ne khu khaafu, khu punda, ne khu makheese, khu biaayo bioosi, oeleesie Balawi, babemeelela liiema lia Wele Omunyali Owa Bioosi.”

³¹Musa ne Eliesa bakhola nga Wele Omunyali Owa Bioosi ne abalaka.

³²Nono bino bili bibiindu bibiarama khu biindu nibio banamae babukula mwiie: kamakheese chielefu chimia sita ne chielefu kamakhumi saba na chiraano.

³³Chielefu kamakhumi saba ne chibili che chikhaafu,

³⁴chipunda chielefu sitini na moja,

³⁵ne bakhasi boosi baba chielefu salasini na mbili basiili ne yabwana.

³⁶Ne sitonyi sie abo babacha mwiie siaba kamakheese chielefu mia tatu salasini na saba ne chimia chiraano.

³⁷Ne busuuru bwa Wele Omunyali Owa Bioosi bwaba kamakheese chimia sita ne kamakhumi saba na karaano.

³⁸Chikhaafu chaba chielefu salasini na sita ne chikhaafu kamakhumi saba na chibili baruunga busuuru khu Wele Omunyali Owa Bioosi.

³⁹Chipunda chaba chielefu kamakhumi kataru, ne chimia chiraano ne busuuru bwa Wele Omunyali Owa Bioosi bwaba chipunda kamakhumi sita na ndala.

⁴⁰Ne babaandu baba chielefu likhumi na sita ne kamakhumi kataru na babili baba busuuru bwa Wele Omunyali Owa Bioosi.

⁴¹Nio Musa aelesia omusaayi Eliesa busuuru bubwaba siianwa khu Wele Omunyali Owa Bioosi nga Wele Omunyali Owa Bioosi ne alaka Musa.

⁴²Musa aaula sitonyi sie babaandu busa khukhwama khu sitonyi sie banamae.

⁴³Nono sitonyi sie babaandu busa siaba: kamakheese chielefu mia tatu salasini na saba ne chimia chiraano,

⁴⁴chikhaafu chielefu salasini na sita,

⁴⁵ne chipunda chielefu salasini ne chimia chiraano,

⁴⁶ne babaandu chielefu ekhumi na sita.

⁴⁷Khukhwama mu sitonyi sino Musa aabukula mulala khu baboe kamakhumi karaano ne bibiaayo, abielesia Balawi ba bemeelelanga liiema lia Wele Omunyali Owa Bioosi, nga Wele Omunyali Owa Bioosi ne amulaka.

⁴⁸Nio babemeelesi be banamae bipupu chielefu ne chimia bacha khu Musa.

⁴⁹Baboolela Musa bali, “Khwabalile banamae bali asi we bunyali bwefwe. Ne mbao akhaba mulala otibile tawe.

⁵⁰Ne khwareerire siianwa sia Wele Omunyali Owa Bioosi, nisio buli mundu anyoolile: bibiindu bie esahabu, chipangili, chinaalo, chimbete, bipalakasa bie mu maru, ne bibiuma. Khubiaana khu Wele Omunyali Owa Bioosi nga kumuruungo kwe bubwoni bwefwe, ebweeni wa Wele Omunyali Owa Bioosi.”

⁵¹Musa ne omusaayi Eliesa babukula esahabu ne bibiindu bibiindi bioosi

⁵²ne esahabu eye siianwa yoosi niyo baana khu Wele Omunyali Owa Bioosi khukhwama khu banamae babemeelesi be bipupu chielefu ne chimia chaba chishekeli chielefu ekhumi ne sita ne chimia saba ne kamakhumi karaano.

⁵³Buli omunamae ebukulila kimiaandu.

⁵⁴Musa ne omusaayi Eliesa babukula esahabu khukhwama khu banamae babemeelesi be bipupu chielefu ne chimia mala bakirera mwieema lie kumuse. Bakirera nga likhebusia khulwe Baisiraeli ebweeni wa Wele Omunyali Owa Bioosi.