Read lubukusu Khub. 32 Bible Online

Khub. 32 - lubukusu bible

Khub. 32

¹Chikholo cha Rubeni ne Kati chaba ne chikhaafu chingali lukali. Babona bali sibala sia Yaseri ne Kileati siaba silayi khu khaafu.

²Nio be lisaaye lia Rubeni ne Kati bacha khu Musa ne omusaayi Eliesa, ne khu bemeelesi be babaandu mala baloma bali,

³“Ataroti, Diboni, Yaseri, Nimura, Heshiboni, Eleale, Sebamu, Nebo, ne Beoni,

⁴chili chingoba nicho Wele Omunyali Owa Bioosi abunia ebweeni we libuusiana lie Baisiraeli. Sibala sino sili silayi khulwe chikhaafu, ne efwe khuli ne chikhaafu.”

⁵Nio baloma bali, “Nosiima khuelesie efwe sibala sino khuba sisiefwe. Okhakhwambusia engelekha we luluuchi lwa Yoritani tawe.”

⁶Ne kakhali Musa areeba be lisaaye lia Kati ne Rubeni ali, “Mwenya murame anano, ne Baisiraeli basienywe bacha mwiie?

⁷Siina sikila ne murusia kumwoyo mu baandu ba Isiraeli khucha mu sibala nisio Wele Omunyali Owa Bioosi abaelesia?

⁸ Elio nilio bakuuka benywe bakhola nga ne nabaruma khukhwama e Kadeshi-barinea khubona sibala.

⁹Nga bacha bola mwitooma lia Eshikoli balola sibala, barusia kumwoyo mu baandu khulekha khucha mu sibala nisio Wele Omunyali Owa Bioosi abaelesia.

¹⁰ Wele Omunyali Owa Bioosi aba ne lirima likali endaalo ng'eneyo mala echuba ali,

¹¹‘Kang'ali mbao omundu khwaabo babarura e Misiri, owe bukhulu bwe kimiiko kamakhumi kabili namwe khukhilakho ocha khucha mu sibala nisio nalaka khuelesia Aburahamu, Isaaka, ne Yakobo tawe. Sikila se bandia ese ne kumwoyo kwoosi tawe,’

¹²se aliio omundu okhachemo tawe ne akhali Kalebu okhwa Yefune omukeeni ne Yoshua okhwa Nuni, sikila nibo baloonda Wele Omunyali Owa Bioosi ne kumwoyo kwoosi.

¹³Nio lirima lia Wele Omunyali Owa Bioosi khu Baisiraeli liaba likali. Aabakhola bayiiyayiiye mu sichiimi khulwe kimiiko kamakhumi kane, khukhwola nga eselukho eyakhola bubwoni ne yabunisibwa.

¹⁴Mala luno mwabukuule bubweyaangu bwe bakuuka benywe, babaandu babooni, khutasa lirima lia Wele Omunyali Owa Bioosi lili likali khu baandu ba Isiraeli.

¹⁵Sikila enywe babaandu ba Rubeni ne Kati mwaba ne muloba khuloonda khu Wele Omunyali Owa Bioosi acha khulekha babaandu bano boosi mu sichiimi, ne enywe ninywe mucha khukila babaandu bano boosi babune.”

¹⁶Bacha khu Musa mala baloma bali, “Khulombakha kamataala ano khulwe kamakheese kefwe ne chingoba khulwe batiiti befwe.

¹⁷Ne kakhali efwe khukherekekha khucha mwiie ne Baisiraeli basiefwe khukhwola nga khuboosia mu maloba kabwe. Ne batiiti befwe banyala bamenya anano mu ngoba chisire, sikila babaandu be sibala sino.

¹⁸Se khucha khukobola mu chingo chefwe tawe, khukhwola nga Baisiraeli ne banyoola buli mundu kumukabwa kwewe.

¹⁹Efwe se khucha khubukulakho kumukabwa mu nibo elubeka luluundi lwa Yoritani tawe, sikila khwanyoolile kumukabwa kwefwe anano lubeka lwe ebukwe owa Yoritani.”

²⁰Musa abakobosia ali, “Mwaaba ne mukhola murio, bukula bulwaani muche mwiie ebweeni wa Wele Omunyali Owa Bioosi.

²¹Buli mundu mwinywe okangiile bulwaani alambukha Yoritani ebweeni wa Wele Omunyali Owa Bioosi. Mulakhola murio khukhwola nga Wele Omunyali Owa Bioosi ne aoona basiku bewe,

²²lundi khukhwola nga sibala ne siuulwa ebweeni wa Wele Omunyali Owa Bioosi. Enyuma wako, munyala mwakobola, ne mulaba balekhuule khulwe kumulimo kwenywe khu Wele Omunyali Owa Bioosi ne khu Baisiraeli. Ne kamaloba kano kacha khuba kakenywe ebweeni wa Wele Omunyali Owa Bioosi.

²³Ne kakhali mwaba ne mukhakhola murio tawe, aba mwakholile bubwoni khu Wele Omunyali Owa Bioosi. Ne ba ne bung'ali muli bubwoni bwenywe bulamubuula.

²⁴Yombakhila babaana benywe chingoba ne kamataala khulwe kamakheese kenywe, mala mukhole niko mulakile.”

²⁵Be lisaaye lia Kati ne Rubeni baboolela Musa bali, “khucha khukhola nga ne olakile.

²⁶Bakhasi befwe ne babaana, ne kamakheese kefwe ne chikhaafu chefwe choosi bicha khurama ano mu ngoba cha Kileati.

²⁷Ne kakhali efwe fweesi khucha khwambukha engelekha khuche mwiie ebweeni wa Wele Omunyali Owa Bioosi mala khupane, nga nilwo okhulaka.”

²⁸ Khwako Musa aelesia lilaka khu musaayi Eliesa ne Yoshua okwa Nuni, ne babemeelesi be chinju che chikholo cha Isiraeli:

²⁹“Be lisaaye lia Kati ne Rubeni baberekeekhe khulwe liie balacha ne nanywe ebweeni wa Wele Omunyali Owa Bioosi. Balambukha engelekha wa Yoritani mala batiile sibala ebweeni wenywe. Nio mukhabaelesie sibala sia Kileati nga kumukabwa kwabwe.

³⁰Ne kakhali kaaba bali se balambukha engelekha wa Yoritani nanywe ne bulwaani bwabwe tawe, bacha khunyoola kumukabwa kwabwe mwinywe mu sibala sia Kanaani.”

³¹Babaandu ba Kati ne ba Rubeni bakobosia bali, “Omwami, efwe khulakhola nga Wele Omunyali Owa Bioosi ne akhuboleele efwe bakholi bowo.

³²Khulambukha ne khukangile bulwaani ebweeni wa Wele Omunyali Owa Bioosi. Ne kakhali kumukabwa kwefwe kulaba engelekha owa Yoritani eno.”

³³Nio Musa aakaba khu kholo cha Kati ne Rubeni ne balala khu kholo eya Manase sibala sio mwami Sihoni owe Baamori ne sibala sio mwami Oku owa Bashani, sibala sioosi alala ne chingoba chasio.

³⁴Ekholo eya Kati yombakha chingoba cha Diboni, Atiroti, Aroeri,

³⁵Atiroti-shofani, Yaseri, Yokibea,

³⁶Beti-nimura ne Beti-Harani. Echo chaba chingoba chisire. Bombakha ne kamataala ke kamakheese.

³⁷Ekholo eya Rubeni yombakha Heshiboni, Eleale, Kiriataimu,

³⁸Nebo, Baali-meoni (kamasina kano kakaluukhasibwa) ne Sibuma. Baana kamasina kakaandi khu ngoba nicho bombakha.

³⁹Luya lwa Makiri okhwa Manase lwebwaakala sibala sia Kileati, lwasibukula, ne khutimania Baamori ba babamo.

⁴⁰Nio Musa aelesia luuya lwa Makiri sibala sia Kileati, mala basimenyamo.

⁴¹Yairi, okhwa Manase, aamba birekere bie Bakileati mala abilanga ali, “Hafoti-yairi.”

⁴²Noba acha aamba lukoba lwa Kenati ne birekere bialwo, ne khubilanga ali, Noba, lisina liewe omwene.