Read lubukusu Khub. 33 Bible Online

Khub. 33 - lubukusu bible

Khub. 33

¹Kano niko kamasina ke abuundu niio Baisiraeli babirira nga baba ne barura e Misiri. Musa ne Aruni babemeelela mu bipupu.

²Musa aandika kamasina ka buli abuundu niio baapa chikambi nga baba ne babirira khuloondekhana ne lilaka lia Wele Omunyali Owa Bioosi. Ne kano niko kamasina ako:

³Babaandu ba Isiraeli bama e Misiri abuundu bali Ramusesi. Bamayo khu ndaalo eye ekhumi na chiraano eye kumwesi kunyoa. Yaba endaalo ndala enyuma we e Pasaka. Baisiraeli barekukha ne bunyindaafu ebweeni we Bamisiri boosi.

⁴Bamisiri baba balikho basiikha babaana babwe babele nibo Wele Omunyali Owa Bioosi eera. Mu khukhola ario, Wele Omunyali Owa Bioosi arusia bukhalaki khu bawele be Bamisiri.

⁵Nio Babaandu ba Isiraeli bama e Ramusesi mala baapa ekambi e Sukoti.

⁶Bama e Sukoti bola e Etamu, eli khundulo khwe sichiimi mala baapa ekambi.

⁷Khukhwama ebweeneyo bakobola e Pi-hairoti, ebukwe owa Baali-sefoni, mala baapa ekambi siimbi ne Mikitoli.

⁸Bama e Pi-hairoti mala babirira akari we nyanja eya Shamu ne khukhwingila mu sichiimi sia Etamu. Bacha lukeendo lwe chindaalo chitaru mala bakhola ekambi e Mara.

⁹Khukhwama ao bacha Elimu. Abwenao chabao chisebele ekhumi na chibili ne kimirongooro kimikheendu kamakhumi saba. Bapao ekambi.

¹⁰Bama e Elimu mala baapa ekambi siimbi ne nyanja eya Shamu.

¹¹Bama sia nyanja eya Shamu baapa ekambi yaabwe eloondakho baapa mu sichiimi sia Sini.

¹²Barekukha e Sini baapa ekambi e Tofika.

¹³Bama e Tofika, baapa ekambi Alushi.

¹⁴Bama ao bacha bakhola ekambi e Refidimu. Ao niio bakhanyoolakho kameechi ke khunywa tawe.

¹⁵Bama e Refidimu baapa ekambi mu sichiimi sia Sinai.

¹⁶Bama mu sichiimi sia Sinai, baapa ekambi e Kiburoti-Hataaba.

¹⁷Bama e Kiburoti-Hataaba baapa ekambi e Haseroti.

¹⁸Bama Haseroti bakhola ekambi e Ritima.

¹⁹Bama e Ritima baapa ekambi e Rimoni-peresi.

²⁰Bama e Rimoni-peresi baapa ekambi e Libuna

²¹Bama e Libuna, baapa ekambi e Risa.

²²Bama e Risa, baapa ekambi e Kehelata.

²³Bama e Kehelata, baapa ekambi khu sikulu sia Sheferi.

²⁴Bama khu sikulu sia Sheferi, baapa ekambi e Harata.

²⁵Bama e Harata baapa ekambi e Makheloti.

²⁶Bama e Makheloti, baapa ekambi e Tahati.

²⁷Bama e Tahati, baapa ekambi e Tera,

²⁸Bama e Tera, bapa ekambi e Mitika.

²⁹Bama e Mitika, baapa ekambi e Hasimona.

³⁰Bama e Hasimona, baapa ekambi e Moseroti.

³¹Bama e Moseroti, baapa ekambi e Bene-yaakani.

³²Bama e Bene-yaakani, baapa ekambi e Hori-hakitikati.

³³Bama e Hori-hakitikati, baapa ekambi e Yotibata.

³⁴Bama e Yotibata, baapa ekambi e Aburona.

³⁵Bama e Aburona, baapa ekambi e Esioni-geberi.

³⁶Bama Esioni-geberi, baapa ekambi mu sichiimi sia Sini (eyo niyo e Kadeshi.)

³⁷Bama Kadeshi, baapa ekambi khu sikulu sia Hori, khu lwakha lwe sibala sia Edomu.

³⁸ Omusaayi Aruni aniina khu sikulu sia Hori khulwe lilaka lia Wele Omunyali Owa Bioosi, mala afwilayo khu mwiiko kwe kamakhumi kane enyuma we Baisiraeli khurura e Misiri. Aafwa khu ndaalo eye khunyoa eye kumwesi kwa kharaano.

³⁹Ne Aruni aaba ne bukhulu bwe kimiiko emia ndala ne kamakhumi kabili na kitaru nga ne afwa khu lukulu lwa Hori.

⁴⁰ Omwami Omukanaani owa Arati owe lubeka lwe ebunafubo owa Kanaani aulila ali Baisiraeli balikho becha.

⁴¹Khukhwama khu sikulu sia Hori Baisiraeli bacha baapa ekambi e Salimona.

⁴²Bama e Salimona, baapa ekambi e Punoni.

⁴³Bama e Punoni, baapa ekambi e Oboti.

⁴⁴Bama e Oboti, baapa ekambi e Iye-abarimu, mu sibala sia Moabu.

⁴⁵Bama Iye-abarimu, baapa ekambi e Tiboni-kati.

⁴⁶Bama e Tiboni-kati, baapa ekambi e Alimoni-dibulataimu.

⁴⁷Bama Alimoni-dibulataimu, baapa ekambi khu bikulu bia Abarimu, siimbi ne sikulu sia Nebo.

⁴⁸Bama khu bikulu bia Abarimu, baapa ekambi mu siangalaamwe sie sibala sia Moabu, engelekha we luluuchi lwa Yoritani, e Yeriko.

⁴⁹Baapa ekambi siimbi ne Yoritani khukhwama Beti-yeshimoti khukhwola e Abeli-shitimu mu siangalaamwe sie sibala sia Moabu.

⁵⁰Ebweeneyo mu siangalaamwe sia Moabu, e sikelekha we luluuchi lwa Yoritani e Yeriko, Wele Omunyali Owa Bioosi alomaloma ne Musa. Amuboolela ali,

⁵¹“Boolela Baisiraeli oli, ‘Ne mulambukha Yoritani ne mwingila mu sibala sia Kanaani,

⁵²mukhoyele mwatimania babaandu boosi bamenyile mu sibala esio. Yonakaka kamabaale ne kamapaati kabwe nende bioosi nibio bakhola nga bawele babwe ne khukhwonaka abuundu niio basaayilanga.

⁵³Menya mu sibala siabwe, sikila namueleesie enywe musimenyemo.

⁵⁴ Mukhakabane kamaloba khulwe khukhupa ekura khuloondekhana ne chinju chenywe. Khu kholo emboofu kielesie kumukabwa kumukali ne khu kholo endiiti kielesie kumukabwa mutiiti. Niye ekura ekwila okwo kulaba kumukabwa kwewe.

⁵⁵Ne kakhali mwaba ne mukhatimania bamenywa be mu sibala omwo tawe balimureerera enywe butinyu, baliba nga bisosono mumoni chenywe ne kamawa mumbafu mwenywe. Bakhamunanie mu sibala nisio mumenyamo.

⁵⁶Ne aba ndimukholela enywe niko nebaasia khu bakholela nibo.’ ”