Read lubukusu Khub. 34 Bible Online

Khub. 34 - lubukusu bible

Khub. 34

¹Wele Omunyali Owa Bioosi aboolela Musa ali,

²“Laka babaandu Baisiraeli oli, nocha mu Kanaani, (sibala nisio ndikho muelesia nga kumukabwa, sibala sia Kanaani sioosi)

³lubeka lwenywe lwe ebunafubo lucha khwama mu sichiimi sia Sini khuloonda khu lwakha lwa Edomu. Ne lulwakha luno elubeka lwe bukwe lucha khwama sia Nyanja eya chumbe.

⁴Nio lulwakha lwenywe luyukhe ebunafubo lucha khwambukha Akurabimu, ne khuchiililila khukhwola Sini ne khukhwola ebunafubo owa Kadeshi-barinea. Nio kuyukhe kulole lubeka lwe bunaswa owa Hasari-adari, ne khukhwola Asimoni.

⁵Ne lulwakha lucha khuyukhila Asimoni luche mwitooma khu lwakha lwa Misiri lukhamaliilikhile khu nyanja eya Mediterenia.

⁶“Lulwakha lwe mumbo lucha khuba enyanja eya Mediterenia.

⁷“Lulwakha lwe ebunaswa lucha khwama khu nyanja eya Mediterenia khukhwola khu sikulu sia Hori.

⁸Ne khukhwama abwenao khukhwola abwingililo owa Hamati, lucha lwoole Setati

⁹Ne lukhache khukhwola Sifuroni lutabusibwe e Hasari-enani. Oluno nilwo lucha khuba lulwakha lwenywe lwe ebunaswa.

¹⁰“Lulwakha lwe bukwe lucha khwama Hasari-enani khukhwola Shefamu.

¹¹Nio lwole Ribula, ebukwe owa Aini, ne khucha khukhwola khu nyanja eya Chumbe ebukwe.

¹²Khukhwama ao lukhache khukhwola khu luuchi lwa Yoritani mala luweele khu nyanja eya chumbe. Sino sicha khuba sibala sienywe ne chinjakha chasio choosi khubotookhelela.”

¹³ Nio Musa alaka Baisiraeli ali, “Esino sili sibala nisio mucha khunyoola khulwe khukhupa chikura. Sibala sino sili nisio Wele Omunyali Owa Bioosi aelesia chikholo tisa nende balala khu kholo eya Manase.

¹⁴Chikholo cha Rubeni ne Kati banyoola kumukabwa kwabwe alala nende balala khu kholo eya Manase.

¹⁵Chikholo chibili ne balala khu kholo eya Manase bali ne kumukabwa kwabwe engelekha owa Yoritani, e Yeriko khucha ebukwe.”

¹⁶Wele Omunyali Owa Bioosi aboolela Musa ali,

¹⁷“Omusaayi Eliesa ne Yoshua okhwa Nuni nibo bacha khukabania babaandu kamaloba.

¹⁸Lundi bukula omwimeelesi mulala khukhwama mu buli ekholo abayeete khukabania.”

¹⁹Kano niko kamasina ke babemeelesi: khukhwama mu kholo eya Yuda, Kalebu okhwa Yefune.

²⁰Khukhwama mu kholo eya Simioni, Shemweli okhwa Amihudi.

²¹Khukhwama mu kholo eya Benjamini, Elidadi okhwa Kisiloni.

²²Khukhwama mu kholo eya Dani, Buki okhwa Yokili.

²³Khukhwama mu lisaaye lia Yosefu: mu kholo eye Manase, Hanieli okhwa Efodi,

²⁴Ne mu kholo eya Efuraimu, Kemueli okhwa Sifutani.

²⁵Ne mu kholo eya Sebuluni, Elisafani okhwa Parinaki.

²⁶Khukhwamamu kholo eya Isakari, Palitieli okhwa Asani.

²⁷Khukhwama mu kholo eya Asieri, Ahihudi okhwa Shelomi.

²⁸Khukhwama mu kholo eya Nafutali, Petaeli okhwa Amihudi.

²⁹Abano nibo Wele Omunyali Owa Bioosi alaka khukabania kimikabwa khulwe babaandu ba Isiraeli mu sibala sia Kanaani.