Read lubukusu Khub. 35 Bible Online

Khub. 35 - lubukusu bible

Khub. 35

¹ Wele Omunyali Owa Bioosi alomaloma ne Musa musiangalaamwe sia Moabu siimbi ne luluuchi lwa Yoritani e Yeriko. Aboolela Musa ali,

²“Laka Baisiraeli oli, khu miaandu nikio mwanyoolile elesia Balawi chingoba nicho bamenyamo ne sibala sie kamayilwe kabotookhelela chingoba.

³Chingoba chino chiicha khuba che Balawi, ne bacha khumenya ebweeneyo. Sibala sie kamayilwe Sicha khuba khulwe chikhaafu chabwe ne bibiaayo biabwe ne bibaywa biabwe bioosi.

⁴Kamayilwe niko mucha khuelesia Balawi kakhoya kaaba khukhwama khwisiisi lie lukoba, bikele eelefu ndala, khubotookhelela lukoba.

⁵Ne enje we lukoba kela bikele chielefu chibili buli lubeka: ebukwe, mumbo, ebunaswa ne ebunafubo.

⁶Chingoba nicho muelesie Balawi chiicha khuba sita che khumulilamo. Mu nicho omundu anyala ekisa aba ne eera owasie matundubiikha. Khutubakho, baelesie chingoba kamakhumi kane na chibili chichiindi.

⁷Chingoba choosi nicho muelesia Balawi chibe kamakhumi kane na munaane, alala ne kamayilwe kacho.

⁸Ne chingoba nicho muelesia Balawi muaana muri: khukhwama mu kholo chimboofu, bukulamo chingoba chingali ne mu kholo ndiiti bukulamo chingoba chindiiti. Buli lukoba nilwo muaana lube khuloondekhane ne bubalaayi bwe kamaloba kabwe.”

⁹ Wele Omunyali Owa Bioosi aboolela Musa ali,

¹⁰“Boolela babaandu Baisiraeli oli, ne mwambukha luluuchi lwa Yoritani ne khukhwingila mu sibala sia Kanaani,

¹¹murobore chingoba che khumulilamo. Chiliba chingoba nicho omundu anyala elukhilamo aba ne eera owasie matundubiikha.

¹²Chingoba chino nicho mulimulilamo khukhwilukha omwiyachi nio owirire oyo akhafwa tawe khukhwola nga eema ebweeni we libuusiana khulwe bukhalaki.

¹³Rusia chingoba chenywe sita che khumulilamo.

¹⁴Rusia chingoba chitaru elubeka we ebukwe we luluuchi lwa Yoritani ne chitaru mu sibala sia Kanaani.

¹⁵Chino chiicha khuba chingoba che khumulilamo khulwe Baisiraeli ne baakwa bamenyile ne nanywe. Omundu yesi yesi owira okundi matundubiikha anyala elukhila mu ngoba ng'enecho.

¹⁶“Ne kakhali aba ne amupila sichuuma, nio afwe, omundu oupile oyo ali omwiiri. Ne omwiiri eerwa.

¹⁷Namwe aaba ne amupila libaale, nilio omundu anyala afwa, mala afwa, omundu oupile oyo aba omwiiri. Ne omwiiri eerwa.

¹⁸Namwe aaba ne amupila lukhu, mala lwakila omundu afwa, omundu oupile oyo ali omwiiri. Ne omwiiri acha khwirwa.

¹⁹Omundu oruungisia bubi ne bubi omwene niye oliira omwiiri oyo.

²⁰Ne omundu aaba ne eera okundi khulwe khumusindikha asi namwe khumuchukucha sisiindu

²¹namwe amwiira khulwe khumupa sikila ali omusiku, omundu omwirire acha khwirwa, sikila ali omwiiri. Oruungisia bubi ne bubi alimwiira aaba ne amunyoola.

²²“Ne wakana omundu anyala eera okundi, ne akhali omusiku wewe tawe, khulwe khumusindikha asi namwe khulwe khumuchukucha sisiindu.

²³Namwe liaba ne lili, khulekha khulola, omundu achukucha libaale liera okundi, ne akhali ne busiku naye tawe, ne lundi se enya khumuumisia tawe.

²⁴Mu musaango okwo libuusiana lie babaandu licha khukukhalaka akari wo omwiiri ne oruungisia sifuki khuloondekhana ne kamalaka kano.

²⁵Libuusiana likhasikule omwiiri khukhwama khu mundu oruungisia bubi. Ne libuusiana likhamukobosie mu lukoba lwewe mu bwilukhilo nimwo aba elukhileyo. Akhoya amenya ebweeneyo khukhwola nga Omusaayi Omukhulu Lukali owachukhwakho kamafura kamatakatifu ne afwa.

²⁶Omundu omwiiri oyo aaba ne enyokha mu lukoba mwe khumulila nimwo ekisa

²⁷ne oruungisia bubi namunyoola mala amwire, sikholwa sino sie khukhwiyacha se sili bubwoni tawe.

²⁸Sikila omwiiri akhoya arame mu lukoba mwe khumulila khukhwola nga Omusaayi Omukhulu Lukali ne afwa. Ne enyuma we lifwa lio Omusaayi Omukhulu Lukali omwiiri oyo anyala akobola engo wewe.

²⁹“Kamalaka kano kali khu selukho chenywe choosi buli niio mumenya.

³⁰ Omundu yesi yesi aaba ne eera owasie, acha khwirwa khulwe buloli burusibwa ne babaandi. Ne kakhali mbao omundu ocha khwirwa khulwe buloli bwo omundu mulala yeng'ene tawe.

³¹Khutasa khwako mukhafukiilila kumuruungo khulwe bulamu bwo omwiiri oli ne bubwoni bwe khukhwira tawe. Ne kakhali omwiiri oyo akhoya erwa.

³²Ne lundi mukhafukiilila kumuruungo khulwe omundu owilukhiile mu lukoba lwe khumula, aaba bali akobola khumenya mungo mwewe Omusaayi Omukhulu Lukali ne akhafwa tawe.

³³Nono mukhanyaalutiakho sibala nisio mu menyilemo tawe sikila sifuki sinyaalutia sibala. Ne mbao sinyala siarusiao bubwoni bwe sifuki ne siikhali sifuki sio omundu owirire tawe.

³⁴Mukhanyaalutia sibala nisio mumenyilemo tawe, sikila Ese, Wele Omunyali Owa Bioosi menyile akari we babaandu ba Isiraeli.”