Read lubukusu Khub. 36 Bible Online

Khub. 36 - lubukusu bible

Khub. 36

¹Babemeelesi be luuya lwa Kileati, bacha khu Musa ne khu bemeelesi be chinju cha Isiraeli. (Kileati aba okhwa Makiri, omwichukhulu owa Manase lundi sisoni sia Yosefu.)

² Baloma bali, “Wele Omunyali Owa Bioosi akhulaka ewe khukaba babaandu Baisiraeli kamaloba khulwe khukhupa chikura. Lundi akhulaka khuana kimiaandu kia wandaayefwe Selofehadi khu bakooko bewe.

³Ne kakhali baaba ne bacha khu baseecha be ekholo ekiindi eya Isiraeli, kumukabwa kwabwe aba kucha khuba kwe ekholo eyo. Nio kimiaandu kiefwe kicha khubukulwa khukhwama mwifwe.

⁴Ne siise sia naikara eye likhebusia eye Baisiraeli ne sioola kumukabwa kwabwe kulitasikha khu mukabwa kwe kholo niyo balimo. Nio kumukabwa kwabwe kulibukulibwa khukhwama mumukabwa kwe kholo eye bakuuka befwe.”

⁵Musa alaka babaandu Baisiraeli khuloondekhana ne lomo eya Wele Omunyali Owa Bioosi. Aaloma ali, “Nilio ekholo eya Yosefu elomile lia ng'ali.

⁶Kano niko Wele Omunyali Owa Bioosi alaka khu bakooko ba Selofehadi ‘Lekha bateekhe khu niye benya. Ne kakhali babeywe munju eye kholo eya paapa wabwe.

⁷Kumukabwa kwe Baisiraeli se kucha khurura khu kholo ndala kuche khu kiindi tawe. Buli mulala khu Baisiraeli acha khurama mu mukabwa kwe kholo eye bakuukawe.

⁸Ne buli mukooko owila khu mukabwa mu kholo yosi yosi eye Baisiraeli akhoya abeela khu museecha owe kholo ng'eneyo. Mu ngila yino buli muisiraeli acha khwila khu mukabwa kwe bakuuka bewe.

⁹Khwako kimiaandu se kicha khwama mu kholo ekiindi kiche mu kholo ekiindi tawe. Buli kholo echa khurama ne kumukabwa kwayo.’ ”

¹⁰Bakooko ba Selofehadi bakhola nga Wele Omunyali Owa Bioosi ne alaka Musa.

¹¹Mahila, Tirisa, ne Hokila, Milika ne Noa, bakooko ba Selofehadi babeela khu basoleeli ba baaba sianang'ina babwe.

¹²Babeela khu lisaaye lie kholo eya Manase okhwa Yosefu. Nio kumukabwa kwabwe kwarama mu kholo eya paapa wabwe.

¹³Kano kali kamalaka niko Wele Omunyali Owa Bioosi aelesia Baisiraeli. Aabaelesia khubirira khu Musa khu siangalaamwe sia Moabu embi ne luluuchi lwa Yoritani e Yeriko.