Read lubukusu Khub. 4 Bible Online

Khub. 4 - lubukusu bible

Khub. 4

¹Wele Omunyali Owa Bioosi aaboolela Musa ne Aruni ali,

²“Bala luuya lwe Balawi Bakoati khuloondekhana ne luuya ne chinju chabwe.

³Bala abo boosi be siseecha be bukhulu bwe kimiiko akari we kamakhumi kataru ne kamakhumi karaano, banyala bakhola kimilimo mwiiema lie kumuse.

⁴Kimilimo kie Bakoati kiaba khu biindu bitakatifu mu liiema lie kumuse.

⁵“Baisiraeli ne balikho barekukha, Aruni ne babaana bewe bacha khukhwingila mwiiema lie kumuse khukangulula e pasia ebweeni we Lisanduku lie ndakaano, mala bakifuunikhile lisanduku.

⁶Khu ngaaki khwalio bakhareekho lisieelo lie mbusi mala babimbekho engubo embuusi, mala bareekho kimisaala kie khusuta.

⁷“Ne khu mesa eye kumukaati kwe khuaana khu Wele Omunyali Owa Bioosi babimbekho engubo embuusi mala bareekho chisaani, bibuumba bie khukhwoseliakho bupani, chipwakuli, ne chisoongo che khuanilamo siianwa sie khunywa. Buli lwosi kumukaati kukhoya kwaba khu mesa.

⁸Lundi bakhabimbekho engubo embesemu khwoosi. Ne khu ngaaki bakhabimbekho lisieelo lie mbusi mala barekho chinguulo che khusuta.

⁹Ne bakhabukule ngubo embuusi mala babiimbe khu siteetwe sie taa, ne chitaa chasio, bibioso, chibeseni, ne bibiindu bibiikha kamafura bioosi.

¹⁰Bakhaboe bibiindu bioosi mu lisieelo lie mbusi mala bare khu mitalaachi kie khusutilakho.

¹¹“Lundi bakhabiimbe ngubo embuusi khu alutare eye sahabu mala bafuunikhekho lisieelo lie mbusi mala bareekho chinguulo che khusuta.

¹²Bakhabukule bibiindu bioosi birumikha Abuundu Atakatifu, babiboe mu ngubo embuusi mala babifunikhekho lisieelo lie embusi ne khubira khu mitalaachi kie khusutilakho.

¹³Bakharusieo likokhe khu alutare mala babimbekho engubo enapeenda.

¹⁴Khu alutare bakhareekho bibiindu bioosi birumikhwa khu milimo alutare: bifuria, chiuma, bipakuo, ne chibeseni ne bibiindu bioosi bie khu alutare. Lundi bakhareekho lisieelo lie mbusi ne khuraamo kimitalaachi kie khusuta.

¹⁵Aruni ne babaana bewe bakhabimbe bario liiema litakatifu ne bibiindu bialio bioosi. Ne bamalile, nga Baisiraeli ne barekukha khukhwama mu kambi, babaana be luuya lwa Koati bakhasute liiema litakatifu. Ne kakhali bakhatiila khu biindu bitakatifu tawe, busa bakhola bario bafwa. Bino nibio bibiindu bie liiema lie kumuse nibio basoleeli be luuya lwa Koati bakhasute.

¹⁶“Ne Eliesa okhwa Aruni omusaayi, acha khuebwa kimilimo kwe khuliinda liiema lioosi nende bioosi bilimo, abuundu atakatifu ne bibiindu biliio. Acha khuliinda kamafura, bupani, siianwa sie khuchiilila sie siakhulia, ne kamafura ke khuchukha khu baandu khulwe kumulimo khu Wele.”

¹⁷Wele Omunyali Owa Bioosi aaboolela Musa ne Aruni ali,

¹⁸“Okhalekha Bakoati

¹⁹babuna khukhwama mu Balawi khulwe khukhwicha siimbi ne bibiindu bitakatifu tawe. Nio bakhabuna tawe, Aruni ne babaana bewe bakhache mukari mala ba bakabe buli mundu kumulimo nikwo anyala aakhola.

²⁰Ne kakhali bakhengila mwiiema mala balola bibiindu bitakatifu, khwakhaba khu siise sitiiti tawe sikila bakhola bario bafwa.”

²¹Wele Omunyali Owa Bioosi aaboolela Musa ali,

²²“Bala luuya lwa Kerishoni khuloondekhana ne luuya ne chinju chabwe.

²³Bala buli mundu owe bukhulu bwe akari we kimiiko kamakhumi kataru ne kamakhumi karaano, onyala aakhola kimilimo mwiiema lie kumuse.

²⁴Kimilimo kiabwe kicha khuba kino.

²⁵Khusuta chipasia che liiema, liiema ne sifuunikho sialio ne lisieelo lie mbusi lili khu ngaaki khwalwo ne pasia eye liiema lie kumuse.

²⁶Bacha khusuta akhaba kimikoye kikiabotookhelela luuya lwe liiema, ne pasia eye kumuliango kwe luuya ne alutare ne bichaangi biayo ne bibiindu bioosi bie kimilimo kiabwe. Bakhakhole koosi niko benyekha bakhole.

²⁷Kimilimo kioosi kie luuya lwa Kerishoni kilaba asi owa Aruni ne babaana bewe. Alabekesia bioosi nibio benyekhana bakhole ne khusuta.

²⁸Ekio nikio kimilimo kie luuya lwa Kerishoni mwiiema lie kumuse. Bacha khuba asi we bubwimeelesi bwa Itamari okhwa Aruni omusaayi.”

²⁹Bala luuya lwa Merari khuloondekhana ne luuya ne chinju chabwe.

³⁰Bala boosi be bukhulu bwe akari we kimiiko kamakhumi kataru ne kamakhumi karaano, banyala bakhola kimilimo mwiiema lie kumuse.

³¹Kino nikio kimilimo kiabwe nikio benyekha khukhola mwiiema lie kumuse. Khusuta chimbao che liiema ne bichuuma biacho ne chinguulo chalio, ne bibale bie liiema.

³²Lundi bakhasute chinjeko che luuya, bisiindi bialio, ne kimikoye ne bibiindu biloondekhana ne nalio bioosi. Lundi okhekesie buli mundu nisio akhoyeele asute.

³³Ekio nikio kimilimo kie luuya lwa Merari lucha khukhola mwiiema lie kumuse. Bacha khukhwimeelelwa ne Itamari okhwa Aruni omusaayi.

³⁴Musa ne Aruni ne babemeelesi be libuusiana babala luuya lwa Koati. Ba babala khuloondekhana ne luuya ne chinju chabwe.

³⁵Babala abo ba baaba ne bukhulu khukhwamila kimiiko kamakhumi kataru khukhwola kamakhumi karaano babanyala khukhola kimilimo mwiiema lie kumuse.

³⁶Ne boosi ba babalwa boola chielefu chibili ne chimia saba ne kamakhumi karaano.

³⁷Abo nibo ba babalwa mu luuya lwa Koati. Boosi bakhola kimilimo mwiiema lie kumuse. Musa ne Aruni ba babala khuloondekhana ne lilaka lia Wele Omunyali Owa Bioosi khubirira khu Musa.

³⁸Luya lwa Kerishoni lwabalwa, khuloondekhana ne luuya ne chinju chabwe.

³⁹Babalwa khukhwamila bukhulu bwe kimiiko kamakhumi kataru khukhwola karaano; buli mundu owanyala khukhola kimilimo mwiiema lie kumuse.

⁴⁰Boosi baba chielefu chibili ne chimia sita ne kamakhumi kataru.

⁴¹Abo nibo ba baaba be luuya lwa Kerishoni, ba bakhola kimilimo mwiiema lie kumuse. Musa ne Aruni ba babala khuloondekhana ne lilaka lia Wele Omunyali Owa Bioosi.

⁴²Babaandu be luuya lwa Merari babalwa khuloondekhana ne luuya ne chinju chabwe.

⁴³Babalwa khukhwamila bukhulu bwe kimiiko kamakhumi kataru khukhwola khu miiko kamakhumi karaano, buli mundu owanyala khukhola kimilimo mwiiema lie kumuse.

⁴⁴Bukali bwabwe bwaba babaandu chielefu chitaru ne chimia chibili.

⁴⁵Abo nibo ba baaba be luuya lwa Merari nibo Musa ne Aruni babala khuloondekhana ne lilaka lia Wele Omunyali Owa Bioosi.

⁴⁶Musa ne Aruni ne babemeelesi ba Isiraeli babala Balawi boosi khuloondekhana ne luuya ne chinju chabwe.

⁴⁷Babala babaandu khukhwamila khu kimiiko kamakhumi kataru khukhwola karaano buli mundu owanyala khukhola kimilimo mwiiema lie kumuse ne khusuta bibiindu.

⁴⁸Abo ba babalwa boosi baba chielefu munaane ne chimia chiraano ne kamakhumi munaane.

⁴⁹Khuloondekhana ne lilaka lia Wele Omunyali Owa Bioosi khubirira khu Musa, buli mundu aebwa kumulimo nikwo enyekha akhole namwe asute. Khwako babalwa ne Musa nga Wele Omunyali Owa Bioosi ne amulaka.