Read lubukusu Khub. 5 Bible Online

Khub. 5 - lubukusu bible

Khub. 5

¹Wele Omunyali Owa Bioosi aboolela Musa ali,

²“Laka babaandu ba Isiraeli barusie mu kambi omundu yesi yesi oli ne bulwaale bwe kamakele, bulwaale bwe khurura kamayila nende nabo bali banyaalu khulwe khutiila khu mufu.

³Mubarusie boosi baseecha ne bakhasi enje we kambi eye babaandu, nio balekhe khunyaalutia ekambi niyo bamenyilemo.”

⁴Baisiraeli bakhola bario mala ba barusia enje we kambi nga Wele Omunyali Owa Bioosi ne alaka Musa.

⁵ Wele Omunyali Owa Bioosi aaboolela Musa ali,

⁶“Boolela Baisiraeli oli, omundu owe siseecha namwe owe siikhasi ne akholela owasie kamabi, aba se ali omweyikinwa khu Wele Omunyali Owa Bioosi tawe. Omundu oyo aba akholile libi.

⁷Omundu akhoyeele eyame bubwoni bwewe nibwo aakholile mala aruunge kumuruungo kwoosi khulwe bubwoni bwewe. Alala ne khutasakho kumuruungo kukwola sitonyi silala khu biraano sie kumuruungo khu mundu niye akholeele bubi.

⁸Omundu oyo aba ne afwa mala se ali ne omulebe niye banyala baruunga tawe, kumuruungo okwo bakuelesia Wele Omunyali Owa Bioosi khulwo musaayi. Khu muruungo okwo akhoyeele arusie limiiku khulwe khurusiao bubi bwewe.

⁹Ne buli siianwa ne bibiindu bitakatifu bioosi nibio Baisiraeli bareera khu musaayi, biliba bio musaayi.

¹⁰Siianwa sitakatifu nende siosi siosi siianwa khu musaayi, Sicha khuba sio musaayi.”

¹¹Wele Omunyali Owa Bioosi aboolela Musa ali,

¹²“Boolela Baisiraeli oli omukhasi wo mundu anyala alekha khuba omweyikinwa

¹³khulwe khuba ne omundu okundi. Bumayaanu bwewe se bunyala bwamanyikhana khu museecha wewe tawe. Wakana omundu yesi yesi se amubona tawe ne se bamutiila tawe.

¹⁴Ne kakhali omuseecha wewe amubonela bubi mala amwibaasilia ali aaba no mundu, omukhasi wewe oyo akhaba ne aaba no mundu okundi namwe tawe,

¹⁵omundu oyo aayila omukhasi wewe khu musaayi. Lundi akhareere siianwa sisienyekhana khu mukhasi wewe. Siianwa sino siliba bufu bwe shayiri butiiti buri mu siikula. Se akhabureemo kamafura ne bupani tawe. Sikila sili siianwa sie biakhulia sie khubona bubi, lundi siianwa sie biakhulia sie likhebulila, siikhebusia bumayaanu.

¹⁶Omusaayi akhareere omukhasi oyo mala amwimikhe ebweeni wa Wele Omunyali Owa Bioosi.

¹⁷Ne omusaayi akhabukule kameechi kamatakatifu mu sibuumba mala abukule lipukhuulu khukhwama asi we liiema lia Wele Omunyali Owa Bioosi mala alire mu meechi.

¹⁸Nio omusaayi akhemie omukhasi oyo ebweeni wa Wele Omunyali Owa Bioosi, mala amukangulule lichuune. Ne akhare siianwa sie siakhulia sie likhebulila siili lundi siianwa sie khubona bubi mu makhono ko mukhasi oyo. Ne omusaayi akhabe ne kameechi kamalulu kareera silaamo.

¹⁹Nio omusaayi amwichubie ali, ‘Kaaba bali se wabelekho no mundu okundi yesi yesi tawe, ne lundi se wakholilekho bumayaanu bwosi bwosi tawe, nga waba mu bunyali bwo museecha wowo, se olanyoola silaamo sireerwa ne kameechi kamalulu kano tawe.

²⁰Ne waaba ne wabele no mundu okhali omuseecha wowo tawe ne oli mu bunyali bwo omuseecha wowo,

²¹(lekha omusaayi akhole omukhasi oyo alome liliechuba lie silaamo, mala amuboleele ali) babaandu bakhuchube ne khu khuloba. Wele Omunyali Owa Bioosi akhakhole enda yowo ebiimbe lundi akhakhukhole obe omukuumba.

²²Ne kameechi kano kareera silaamo kakhoya kabira munda mwowo mala kakhole kumubili kwowo kubiimbe, lundi obe omukuumba.’ Ne omukhasi akhalome ali, ‘Amina, Amina.’

²³“Omusaayi akhaandike bilaamo bino mu sitabu ne khusiinga kamakhuwa ke bilaamo mu meechi ke bululu.

²⁴Omusaayi akhanywesie omukhasi oyo kameechi ke bululu kareera silaamo ne kameechi ako kakhakhole omukhasi achuunwe lukali.

²⁵Omusaayi akhabukule siianwa sie biakhulia sie khubona bubi khukhwama mu makhono ko mukhasi, asibisie ebweeni wa Wele Omunyali Owa Bioosi mala asire khu alutare.

²⁶Nio musaayi afumbare efuusi ndala eye siianwa nga eye likhebulila mala asiosiele khu alutare. Ekhumaliilikha, amunywesie kameechi.

²⁷Aaba ne aba omundu, mala anywa kameechi ke khureera silaamo, kameechi ako kakhengile munda mala kamureerere buchuuni bukali. Enda yewe ekhabiimbe, lundi acha khuba omukuumba. Babaandu bewe bakhamulobe.

²⁸Ne kakhali aaba ne akhabakho no mundu tawe, akhabe omulekhuule khu silaamo sino ne alisaala babaana.

²⁹“Lino nilio lilaka lie chikesi che khubona bubi. Ne kakhabe kario khu mukhasi ooli asi we bunyali bwo museecha wewe ne efwolobia.

³⁰Namwe likhekholekhe lirio aaba bali omundu abonela omukhasi wewe bubi. Omusaayi akhemie omukhasi ebweeni wa Wele Omunyali Owa Bioosi, mala akhole koosi khu niye khuloondekhana ne lilaka lino.

³¹Omuseecha se akhabe ne bumayaanu tawe ne kakhali omukhasi niye okhasute bumayaanu bwewe omwene.”