Read lubukusu Khub. 6 Bible Online

Khub. 6 - lubukusu bible

Khub. 6

¹Wele Omunyali Owa Bioosi aaboolela Musa ali,

²“Boolela babaandu ba Isiraeli oli omundu yesi yesi owe siseecha namwe owe siikhasi ne echuba, khuba Omunadhiri, nio eyaule Khulwa Wele Omunyali Owa Bioosi,

³ akhoyela eyaule khukhwama mu khunywa endali ne kamalwa. Se akhoyeele anywakho enduruuchi khukhwama mu ndali namwe khu malwa tawe. Ne akhaliakho kimisabibu kimibisi namwe kimiomu tawe.

⁴Siise sioosi sie bunadhiri, akhaliakho sisiindu siosi siosi sisiama mu ndali eye kumusabibu tawe, chakhaba chimiicho namwe kamoola kakhwo tawe.

⁵“Chindaalo choosi che sisiechubo sie bunadhiri, se akhoyeele abeka lichuune liewe tawe. Aliba omutakatifu mu biise bioosi nibio eyauule khu Wele Omunyali Owa Bioosi. Alilekha lichuune liewe lilee.

⁶Mu ndaalo choosi nicho eyaula khu Wele Omunyali Owa Bioosi, se akhesendekho siimbi ne omufu tawe.

⁷Akhaba raraawe namwe maawe namwe wandaaye omusoleeli namwe omukhaana ne afwa tawe, akhenyaalutia khulwe khubachao siimbi tawe. Sikila sifuno sie khukhwiyaula khwewe khu Wele sili khu murwe khwewe.

⁸Mu ndaalo choosi che khukhwiyaula khwewe, ali omutakatifu owa Wele Omunyali Owa Bioosi.

⁹“Ne kaaba bali omundu amufwilao lifwa lia matundubiikha, aba anyaalutisia kumurwe kwo omunadhiri kumwaule. Omunadhiri oyo akhoya aabeka kumurwe kwewe khu ndaalo ekhola saba eye khukhwikwalaasia.

¹⁰Khu ndaalo ekhola munaane akhareere kamauusi kabili ke mundaa namwe kamaana kabili ke kamauusi kamabaya khu musaayi, muliaango mwe liiema lie kumuse.

¹¹Omusaayi acha khuaana liuusi lilala khulwe siianwa sie bubwoni, ne likhola khabili khulwe siianwa sie khukhwosia. Akhakhole ario nio arusieo bubwoni bwo omunadhiri owakhola bumayaanu khulwo mufu. Nio akhaule kumurwe kwewe lundi khulwa Wele Omunyali Owa Bioosi.

¹²Omunadhiri akhoya eyaule lundi Khulwa Wele Omunyali Owa Bioosi mu ndaalo chewe che khukhwiyaula. Akhareere limeeme lie kumwiiko mulala nga siianwa sie kamakhiikha. Ne biise bie nyuma se bikhabalwe tawe sikila khukhwiyaula khwewe khwanyaalutisibwa.

¹³ “Nono lino nilio lilaka khu munadhiri siise sie khukhwiyaula khwewe ne siweele: Alireerwa amuliango kwe liiema lie kumuse

¹⁴mala aane siianwa siewe khu Wele Omunyali Owa Bioosi. Siliba, limeeme lie kumwiiko mulala likhalimo libi tawe khulwe siianwa sie khukhwosia, limeeme likhasi lie kumwiiko mulala likhalimo libi tawe khulwe siianwa sie bubwoni, ne limiiku lilala likhalimo libi tawe khulwe siianwa sie kumuleembe.

¹⁵Lundi alirusia endubi ndala eye kimikaati kikhalimo limela tawe, chikeki che bufu bunosie chichakholwa ne kamafura ke chiseituni ne chipisikuuti chikhakholwa ne kamafura ke chiseituni, alala ne siianwa sie biakhulia ne biianwa bie ndali.

¹⁶Omusaayi acha khuaana bioosi ebweeni wa Wele Omunyali Owa Bioosi ne khuaana siianwa sie bubwoni nende sie khukhwosia.

¹⁷Lundi acha khuaana khu Wele Omunyali Owa Bioosi limiiku nga embosio eye siianwa sie kumuleembe ne kimikaati endubi ndala kikhalimo limela tawe. Lundi omusaayi acha khuaana siianwa sie siakhulia nende sie ndali.

¹⁸Nio munadhiri abeke kumurwe kwewe kumwaule a muliango kwe liiema lie kumuse. Ne lundi akhabukule lichuune lino alimwaate mu mulilo kukwosia siianwa sie kumuleembe.

¹⁹“Nio musaayi abukule enyama eye siambele eye limiiku ne likho etutuba nende ekeeki ndala ekhalimo limela tawe khukhwama mu ndubi nende episikuuti mala abire mu makhono ko munadhiri. Omusaayi akhakhole ario, omunadhiri ne amalile khubeka lichuune liewe.

²⁰Omusaayi akhasiaane ebweeni wa Wele Omunyali Owa Bioosi nga siianwa sie khusuta khu Wele Omunyali Owa Bioosi. Siianwa sino sicha khuba sio musaayi alala ne sitindimilo nisio asuta ebweeni wa Wele Omunyali Owa Bioosi nende sietakho siaanilwe. Enyuma wako Omunadhiri anyala anywa endali.

²¹“Elio nilio lilaka khu munadhiri okhola sisiechubo. Siianwa siewe khu Wele Omunyali Owa Bioosi siliba khuloondekhana ne sisiechubo siewe nga omunadhiri, khutasa khu siindi siosi siosi nisio anyala aana. Enyekhana olisie sisiechubo siewe khuloondekhana ne lilaka lie bunadhiri nga nilwo echuba.”

²²Wele Omunyali Owa Bioosi aaboolela Musa ali,

²³“Boolela Aruni ne babaana bewe oli mulibiita babaandu ba Isiraeli ne kamakhuwa kano,

²⁴Wele Omunyali Owa Bioosi amubiite chikhabi lundi amuliinde enywe.

²⁵Wele Omunyali Owa Bioosi abe omulayi lundi owe kumwalaalo khwinywe.

²⁶Wele Omunyali Owa Bioosi amuliinde ne khumuelesia enywe kumuleembe.

²⁷Nga basaayi ne bakhalomalome kamakhuwa kano, ese khakarumikhire khubiita babaandu ba Isiraeli chikhabi.”