Read lubukusu Khub. 7 Bible Online

Khub. 7 - lubukusu bible

Khub. 7

¹Khu ndaalo niio Musa amala khusimikha liiema lia Wele Omunyali Owa Bioosi, aalichukhakho kamafura mala aalielesia alala ne bibiindu bialio bioosi khu Wele Omunyali Owa Bioosi. Aachukha lundi kamafura khu alutare ne khukiaana ne bibiindu biayo bioosi khu Wele Omunyali Owa Bioosi.

²Babemeelesi ba Isiraeli; babemeelela chinju che bakuuka babwe, ne babemeelesi be chikholo chabwe babemeelela babaandu ba babalwa becha siimbi.

³Bareera ne khuaana biianwa biabwe ebweeni wa Wele Omunyali Owa Bioosi kamakaari sita ne chieeyi ekhumi ne chibili. Bareera likaari lilala khu buli bemeelesi babili ne eeyi ndala khu buli mwimeelesi mulala. Babiaana ebweeni we liiema lia Wele Omunyali Owa Bioosi.

⁴Nio Wele Omunyali Owa Bioosi aaboolela Musa ali,

⁵“Yakaanila biianwa bino khulwe burumikhi bwe kimilimo kie mwiiema lie kumuse, mala obieelesie Balawi khuloondekhana ne kimilimo kia buli sia mulala.”

⁶Khwako Musa aabukula kamakaari ne chieeyi aelesia Balawi.

⁷Aelesia be luuya lwa Kerishoni kamakaari kabili ne chieeyi chine khuloondekhana ne kumulimo kwabwe.

⁸Ne ba Merari abaelesia kamakaari kane ne chieeyi munaane khuloondekhana ne kimilimo kiabwe. Baba asi we bubwimeelesi bwa Itamari okhwa Aruni omusaayi.

⁹Ne kakhali Musa se akabakho be luuya lwa Koati kamakaari namwe chieeyi tawe, sikila kimilimo kiabwe kiaba khuliinda bibiindu bitakatifu, bibienyekhana bisutwe khu mabeka kabwe.

¹⁰Babemeelesi baana biianwa khulwe khukhwaula alutare khu ndaalo niyo yachukhwakho kamafura. Babemeelesi baana biianwa biabwe khu alutare.

¹¹Wele Omunyali Owa Bioosi aaboolela Musa ali, “Baboolele oli buli mwimeelesi acha khuaana siianwa siewe buli khu ndaalo khulwe khukhwaula alutare.”

¹²Nasioni okhwa Aminatabu niye owanyoa khuaana siianwa siewe khu ndaalo enyoa khulwe ekholo yewe eya Yuda.

¹³Siianwa siewe siaba esaani ndala eye fwesa. Busiro bwayo bwaba chishekeli emia ndala ne kamakhumi kataru, e beseni ndala eye busiro bwe chishekeli kamakhumi saba. Busiro buno bwakelwa khuloondekhana ne sipiimilo sie eshekeli eye Abuundu Atakatifu. Buli siindu siechusibwakho bufu bunosie bubwatubaanisibwamo kamafura khulwe siianwa sie siakhulia.

¹⁴Aana lundi sibuumba sie esahabu eli ne busiro bwe chishekeli ekhumi, sisiaba ne sichuule bupani.

¹⁵Lundi aana euunwa enjoka, limiiku, limeeme lilala lie bukhulu bwe kumwiiko mulala, khuba siianwa sie khukhwosia.

¹⁶Aana ne endurume khulwe siianwa sie bumayaanu.

¹⁷Ne khulwe siianwa sie kumuleembe aana chieeyi chibili, kamamiiku karaano, chindurume chiraano ne kamameeme ke kumwiiko mulala karaano. Esio siaba siianwa sia Nasioni okhwa Aminatabu.

¹⁸Khu ndaalo ekhola khabili, Netaneli okhwa Suari omwimeelesi owe luuya lwa Isakari, aana siianwa siewe.

¹⁹Aana esaani ndala eye fwesa. Busiro bwayo bwaba chishekeli emia ndala ne kamakhumi kataru. Lundi aana lulweelo lwe fwesa eye busiro bwe chishekeli kamakhumi saba. Abiaana khuloondekhana ne bikelo bie abuundu atakatifu. Bibiindu bino bioombi biechulakho bufu bunosie butubaanisibwemo kamafura khulwe siianwa sie biakhulia.

²⁰Lundi aana sibuumba sie esahabu. Busiro bwasio bwaba chishekeli likhumi lundi siaba siechulakho bupani.

²¹Aana euunwa enjoka, limiiku, ne limeeme lie bukhulu bwe kumwiiko mulala khulwe siianwa sie khukhwosia.

²²Aana ne ndurume ndala khulwe siianwa sie khurusiao bubwoni.

²³Lundi aana chieeyi chibili, kamamiiku karaano, chindurume chiraano, ne kamameeme karaano ke kumwiiko mulala khulwe embosio eye siianwa sie khureerao kumuleembe. Sino siaba siianwa sia Netaneli okhwa Suari.

²⁴Khu ndaalo eya khataru, Eliabu okhwa Heloni omwimeelesi owe luuya lwa Sebuluni areera siianwa siewe.

²⁵Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

²⁶Lundi areera sibuumba sie esahabu sie busiro bwe chishekeli ekhumi sisiaba ne sichuusibwekho bupani.

²⁷Eliabu areera lundi euunwa enjoka, limiiku ne limeeme lie kumwiiko mulala khulwe siianwa sie khukhwosia.

²⁸Areera ne endurume khulwe siianwa sie khurusiao bubwoni.

²⁹Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano. Sino siaba siianwa sia Eliabu okhwa Heloni.

³⁰Khu ndaalo eya khane, Elisuri okhwa Sheteuri, omwimeelesi owe luuya lwa Rubeni areera siianwa siewe.

³¹Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie bubwatubanisibwamo kamafura khulwe siianwa sie biakhulia.

³²Lundi areera sibuumba sie esahabu sie busiro bwe chishekeli ekhumi sisiaba ne sichuulemo bupani.

³³Elisuri areera ne euunwa embangaachi, limiiku ne limeeme lie bukhulu bwe kumwiiko mulala khulwe siianwa sie khukhwosia.

³⁴Lundi areera endurume khulwe siianwa sie khurusiao bubwoni.

³⁵Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino siaba siianwa sia Elisuri okhwa Sheteuri.

³⁶Khu ndaalo eya kharaano, Shelumieli okhwa Surisiatai, omwimeelesi owe luuya lwa Simioni areera siianwa siewe.

³⁷Siianwa sino siaba esaani eye efwesa, eyaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

³⁸Lundi areera sibuumba sie esahabu sie busiro bwe chishekeli ekhumi sisiichuulekho bupani.

³⁹Shelumieli areera euunwa enjoka, limiiku ne limeeme lie kumwiiko mulala khulwe siianwa sie khukhwosia.

⁴⁰Lundi aana endurume khulwe siianwa sie khurusiao bubwoni.

⁴¹Lundi areera chieeyi chibili, kamamiiku karaano chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino sisiaba siianwa sia Shelumieli okhwa Surisiatai.

⁴²Khu ndaalo eya sita, Eliasafu okhwa Teueli, omwimeelesi owe luuya lwa Kati areera siianwa siewe.

⁴³Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁴⁴Lundi areera sibuumba sie esahabu sie busiro bwe chishekeli ekhumi sisichuulekho bupani.

⁴⁵Eliasafu areera euunwa enjoka, limiiku ne limeeme lie bukhulu bwe kumwiiko mulala khulwe siianwa sie khukhwosia.

⁴⁶Lundi aana endurume khulwe siianwa sie khurusiao bubwoni.

⁴⁷Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino sisiaba siianwa sia Eliasafu okhwa Teueli.

⁴⁸Khu ndaalo eya saba, Elisiama okhwa Amihudi, omwimeelesi owe luuya lwa Efuraimu, areera siianwa siewe.

⁴⁹Siianwa sino siaba esaani eye efwesa, eyaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁵⁰Lundi areera sibuumba sie esahabu sie busiro bwe chishekeli ekhumi sisiichuulekho bupani.

⁵¹Elishama areera euunwa enjoka, limiiku ne limeeme lie bukhulu bwe kumwiiko mulala khulwe siianwa sie khukhwosia.

⁵²Lundi aana endurume khulwe siianwa sie bubwoni.

⁵³Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino sisiaba siianwa sia Elisiama okhwa Amihudi.

⁵⁴Khu ndaalo eya munane, Kamalieli okhwa Petausuri, omwimeelesi owe luuya lwa Manase, areera siianwa siewe.

⁵⁵Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁵⁶Lundi areera sibuumba sie esahabu sie busiro bwe chishekeli ekhumi sisiichuulekho bupani.

⁵⁷Kamalieli areera euunwa enjoka, limiiku ne limeeme lie kumwiiko mulala khulwe siianwa sie khukhwosia.

⁵⁸Lundi aana endurume khulwe siianwa sie khurusiao bubwoni.

⁵⁹Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino siaba siianwa sia Kamalieli okhwa Petausuri.

⁶⁰Khu ndaalo eya tisa, Abitani okhwa Gidioni, omwimeelesi owe luuya lwa Benjamini, areera siianwa siewe.

⁶¹Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁶²Lundi areera sibuumba sie esahabu sie busiro bwe chishekeli ekhumi sisiichuulekho bupani.

⁶³Abitani areera euunwa enjoka, limiiku ne limeeme lie kumwiiko mulala khulwe siianwa sie khukhwosia.

⁶⁴Lundi aana endurume khulwe siianwa sie khurusiao bubwoni.

⁶⁵Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino siaba siianwa sia Abitani okhwa Gidioni.

⁶⁶Khu ndaalo eye ekhumi, Aieseri okhwa Amisiatai, omwimeelesi owe luuya lwa Dani, areera siianwa siewe.

⁶⁷Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁶⁸Lundi areera sibuumba sie esahabu sie busiro bwe chishekeli ekhumi sisiichuulekho bupani.

⁶⁹Ahieseri areera euunwa embangaachi, limiiku ne limeeme lie kumwiiko mulala khulwe siianwa sie khukhwosia.

⁷⁰Lundi aana endurume khulwe siianwa sie khurusiao bubwoni.

⁷¹Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino siaba siianwa sia Ahieseri okhwa Amisiatai.

⁷²Khu ndaalo eye ekhumi na ndala, Pakieli okhwa Okirani, omwimeelesi owe luuya lwa Asieri, areera siianwa siewe.

⁷³Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁷⁴Lundi areera sibuumba sie esahabu sie busiro bwe chishekeli ekhumi sisiichuulekho bupani.

⁷⁵Pakieli areera euunwa enjoka, limiiku ne limeeme lie kumwiiko mulala khulwe siianwa sie khukhwosia.

⁷⁶Lundi aana endurume khulwe siianwa sie khurusiao bubwoni.

⁷⁷Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino siaba siianwa sia Pakieli okhwa Okirani.

⁷⁸Khu ndaalo eye ekhumi na chibili, Ahira okhwa Enani, omwimeelesi owe luuya lwa Nafutali, areera siianwa siewe.

⁷⁹Siianwa sino siaba esaani eye efwesa, yaba ne busiro bwe chishekeli emia ndala ne kamakhumi kataru, lulweelo lwe efwesa eye busiro bwe chishekeli kamakhumi saba. Bibiindu bino biakelwa khuloondekhana ne sipiimilo sie chishekeli che Abuundu Atakatifu. Bibiindu bino bioombi biechusibwa bufu bunosie butubaanisibwemo kamafura khulwe siianwa sie biakhulia.

⁸⁰Lundi areera sibuumba sie esahabu sie busiro bwe chishekeli ekhumi sisiichuulekho bupani.

⁸¹Ahira areera euunwa enjoka, limiiku ne limeeme lie bukhulu bwe kumwiiko mulala khulwe siianwa sie khukhwosia.

⁸²Lundi aana endurume khulwe siianwa sie khurusiao bubwoni.

⁸³Lundi areera chieeyi chibili, kamamiiku karaano, chindurume chiraano ne kamameeme ke bukhulu bwe kumwiiko mulala karaano khulwe siianwa sie khureerao kumuleembe. Sino siaba siianwa sia Ahira okhwa Enani.

⁸⁴Sino siaba siianwa sie khukhwaula alutare, khu ndaalo niyo bakichukhilakho kamafura, khukhwama khu bemeelesi ba Isiraeli. Chisaani likhumi na chibili che efwesa, chibeseni likhumi na chibili che fwesa, bibuumba likhumi na bibili bie esahabu.

⁸⁵Buli esaani eye efwesa yaba busiro bwe chishekeli emia ndala ne kamakhumi kataru ne buli lulweelo lwaba lwe chishekeli kamakhumi saba. Chifwesa choosi che bibiindu chaba chielefu chibili ne chimia chine che chishekeli khuloondekhana ne sikelo sie chishekeli che Abuundu Atakatifu.

⁸⁶Bareera bibuumba likhumi na bibili bie esahabu, bibiechulakho bupani. Biaba ne busiro bwe chishekeli likhumi buli silala khuloondekhana ne sikelo sie chishekeli che Abuundu Atakatifu. Esahabu eye bibuumba bioosi yaba chishekeli emia ndala ne kamakhumi kabili.

⁸⁷Chikhaafu choosi che siianwa sie khukhwosia chaba chiuunwa likhumi na chibili, kamamiiku likhumi na kabili, kamameeme ke bukhulu bwe kumwiiko mulala ekhumi na kabili, alala ne siianwa siabwe sie biakhulia, ne chindurume likhumi na chibili khulwe siianwa sie khurusiao bubwoni.

⁸⁸Lundi chikhaafu choosi khulwe embosio eye siianwa sie khureerao kumuleembe chaba chiuunwa kamakhumi kabili na chine, kamamiiku kamakhumi sita, chindurume kamakhumi sita, kamameeme ke bukhulu bwe kumwiiko mulala kamakhumi sita. Esio siaba siianwa sie khukhwaula alutare, ne malile khuchukhwakho kamafura.

⁸⁹Ne nga Musa engila mwiiema lie kumuse khulomaloma ne Wele Omunyali Owa Bioosi, aulila kumumilo ne kumuboolela khukhwama mu ngaaki mwe ndebe eye kumwalaalo eyaba khu lisanduku lie ndakaano akari we bifwaani bie chikerubi chibili. Nio Musa alomaloma naye.