Read lubukusu Khub. 8 Bible Online

Khub. 8 - lubukusu bible

Khub. 8

¹ Nono Wele Omunyali Owa Bioosi aboolela Musa ali,

²“Boolela Aruni oli, ne ara chitaa khu siteetwe, akhoyeele areekho chitaa saba nio buwaanga bukhosie ebweeni wasio.”

³Ne Aruni akhola ario. Arao chitaa charusia buwaanga ebweeni we siteetwe nga Wele Omunyali Owa Bioosi ne alaka Musa.

⁴Siteetwe siakholebwa mu ngila eloondakho yino. Khukhwama khu sibale khukhwola khu bimuli biasio, siteetwe siapibwa kumukuba ne esahabu, khuloondekhana ne sifwaanane nisio Wele ekesia Musa.

⁵Wele Omunyali Owa Bioosi aaboolela Musa ali,

⁶“Yaula Balawi khukhwama mu baandu ba Isiraeli mala obakwalaasie.

⁷Khubakwalaasia, bakholele kano, baanyekho kameechi ke khukwalaasia khukhwama mu bwoni bwabwe, mala beebeke buli abuundu. Lundi baboolele khusiinga chingubo chabwe nio bekwalaasie.

⁸Nio babukule euunwa enjoka ne siianwa sie bufu, bubwatubanisibwamo kamafura, mala obukule euunwa ekiindi enjoka khulwe siianwa sie khurusiao bubwoni.

⁹Nono akhareere Balawi ebweeni we liiema lie kumuse, mala obuusie babaandu ba Isiraeli boosi.

¹⁰Ne oreerire Balawi ebweeni wa Wele Omunyali Owa Bioosi, babaandu ba Isiraeli bakhabareekho kamakhono.

¹¹Ne Aruni akhaane Balawi nga siianwa khu Wele Omunyali Owa Bioosi khukhwama mu Baisiraeli, nio bakhole kimilimo kia Wele Omunyali Owa Bioosi.

¹²Nio Balawi nabo bakhare kamakhono kabwe khu mirwe kie chiuunwa chibili, mala okhaane ndala khulwe siianwa sie khurusiao bubwoni ne ekiindi khulwe siianwa sie khukhwosia, khu Wele Omunyali Owa Bioosi, khurusiao bubwoni bwe Balawi.

¹³“Khola Balawi bayeete Aruni ne babaana bewe mala obaane nga siianwa khu Wele Omunyali Owa Bioosi.

¹⁴Mu ngila yino okhaaule Balawi khukhwama mu baandu ba Isiraeli, babe babaase.

¹⁵Ne omalile khukhola orio Balawi bakhache bakhole kimilimo a liiema lie kumuse ne obakwalaasiisie ne khubaana nga siianwa khu Wele Omunyali Owa Bioosi.

¹⁶Balawi bali khale baane khwise khukhwama mu baandu ba Isiraeli. Nababukuule mu bweyaangu bwe babele boosi be babaandu ba Isiraeli babe babaase.

¹⁷ Babele boosi be ba Isiraeli bali babaase, akhaba babaandu namwe bibiaayo. Khukhwama khu ndaalo niyo neera babele boosi mu sibala sia Misiri naaula babele ba Isiraeli khuba ba base.

¹⁸Luno nabukuule Balawi mu bweyaangu bwe babaana babele mu baandu ba Isiraeli boosi.

¹⁹Lundi naanile Balawi khu Aruni ne babaana bewe nga siianwa khukhwama mu Baisiraeli. Nakholile ndio nio bakholele Baisiraeli mwiiema lie kumuse. Bakhayeete mu milimo kie khurusiao bubwoni bwe Baisiraeli nio Baisiraeli bakhaba ne butinyu bunyala bwabanyoola ne becha siimbi Abuundu Atakatifu tawe.”

²⁰Nono Musa, Aruni, ne Baisiraeli boosi bakhola bario khu Balawi nga Wele Omunyali Owa Bioosi ne alaka Musa.

²¹Balawi babeene bekwalaasia khukhwama mu bwoni mala basiinga chingubo chabwe. Ne Aruni abaana khu Wele Omunyali Owa Bioosi nga siianwa. Lundi Aruni aabakholela siianwa sie khurusiao bubwoni khubakwalaasia.

²²Enyuma wako Balawi bengila mwiiema lie kumuse mala bakhola kimilimo kiabwe. Bemeelelwa ne Aruni ne babaana bewe. Bakholela Balawi nga Wele Omunyali Owa Bioosi ne alaka Musa.

²³Wele Omunyali Owa Bioosi aaboolela Musa ali,

²⁴“Lino nilio lilaka khuloondekhana ne Balawi, buli Mulawi ooli ne bukhulu bwe kimiiko khukhwamila kamakhumi kabili ne kiraano ne khukhilakhoo anyala akhola kimilimo kie mwieema lie kumuse.

²⁵Ne oolile bukhulu bwe kimiiko kamakhumi karaano akhoyeele alekhe khukhola kimilimo.

²⁶Enyuma wako anyala ayeeta Balawi basie mu khukhola kimilimo mwiiema lie kumuse. Ne kakhali se enyekhana khukhola kumulimo kwosi kwosi yeng'ene tawe. Mu ngila yino okhaelesie kimilimo Balawi.”