Read lubukusu Khub. 9 Bible Online

Khub. 9 - lubukusu bible

Khub. 9

¹ Wele Omunyali Owa Bioosi alomaloma ne Musa mu sichiimi sia Sinai mu mwesi kunyoa kwe kumwiiko kukhola khabili enyuma we babaandu ba Isiraeli khurura mu Misiri. Amuboolela ali,

²“Lekha Baisiraeli babe ne ndaalo eye Epasaka mu siise sisiaroborwa.

³Khu ndaalo eye likhumi na chine eye kumwesi kuno, ekolooba, mulaba ne Epasaka khu siise nisio yaroborwa. Mulaba nayo khuloondekhana ne kamalaka kayo koosi.”

⁴Nio Musa aboolela babaandu ba Isiraeli ali bakhoya baba ne Pasaka.

⁵Baisiraeli baba e pasaka mu mwesi kwe khunyoa khu ndaalo eye likhumi ne chine, ekolooba mu sichiimi sia Sinai. Bakhola bario khuloondekhana nende koosi niko Wele Omunyali Owa Bioosi alaka Musa.

⁶Ne babao babaandu babaandi baba banyaalu sikila aba batiilile khu mufu. Khwako se banyala khuba ne Pasaka endaalo ng'eneyo tawe. Nio baacha khu Musa ne Aruni khu ndaalo ng'eneyo.

⁷Babaandu abo baloma bali, “Efwe khuli banyaalu sikila khwatiilile khu mufu. Ne sikila siina ne khukhiingililwa khuaana siianwa khu Wele Omunyali Owa Bioosi siianwa siewe khu siise sisiaroborwa mu baandu ba Isiraeli?”

⁸Ne Musa ababoolela ali, “Liinda mbulile nisio Wele Omunyali Owa Bioosi alalakiilisia khuloondekhana ne nanywe.”

⁹Wele Omunyali Owa Bioosi aboolela Musa ali,

¹⁰Boolela babaandu ba Isiraeli oli, “Omundu yesi yesi khwinywe namwe owe lisaaye lienywe akhaba ne ali omunyaalu khulwe khutiila khu mufu, namwe ali aleeyi mu lukeendo, alaba ne Pasaka khu Wele Omunyali Owa Bioosi.

¹¹Mu mwesi kwe khabili khu ndaalo eye likhumi na chine, ekolooba, bakhabe ne Pasaka. Bakhakikhole khulwe khulia kumukaati kukhalimo limela tawe ne chinyenyi chindulu.

¹² Bakhalekhakho siakhulia siayo khukhwola kumutikhinyi namwe bafunakho sikuumba sie sikele sie sisiaayo tawe. Bakhakhole e Pasaka khuloondekhana ne kamalaka kayo koosi.

¹³Ne kakhali omundu yesi yesi oli omukwalaafu okhali khu lukeendo tawe, mala alekha busa khuba ne pasaka, se akhabalwe nga mulala khu baandu base tawe. Sikila niye se aana siianwa sia Wele Omunyali Owa Bioosi mu biise bibiaroborwa tawe. Omundu mwene oyo akhasute bubwoni bwewe omwene.

¹⁴Ne omundu omukwa owa mumenyamo busa ne enya abe ne pasaka eya Wele Omunyali Owa Bioosi, akhoya akikhola khuloondekhana ne kamalaka kayo. Muliba ne lilaka lifwaanana khu baakwa ne khwinywe mwabene.”

¹⁵Khu ndaalo niyo liiema lia Wele Omunyali Owa Bioosi liasimikhwa, lifuumbi liecha mala lialifuuma. Khukhwama ekolooba khukhwola kumutikhinyi lifuumbi lialolekhana nga kumulilo.

¹⁶Biachiililila birio; lifuumbi lialifuunikha kumuusi ne musilo kumulilo kwalifuunikha.

¹⁷Buli lwosi nga lifuumbi ne lisutwa angaaki we liiema lia Wele Omunyali Owa Bioosi, babaandu ba Isiraeli barekukha. Ne abuundu niio lifuumbi liekhanga, abwenao Baisiraeli bakhola ekambi.

¹⁸Khulwe lilaka lia Wele Omunyali Owa Bioosi, Baisiraeli barekukha khu lukeendo ne lundi khulwe lilaka lia Wele Omunyali Owa Bioosi bakhola ekambi. Khu siise sioosi nisio lifuumbi liaba khu ngaaki khwe liiema lia Wele Omunyali Owa Bioosi, Baisiraeli barama mu kambi.

¹⁹Ne lifuumbi liakhaba ne liarama khu ngaaki khwe liiema lia Wele Omunyali Owa Bioosi siise sileeyi, Baisiraeli baria lilaka lia Wele Omunyali Owa Bioosi mala se barekukha tawe.

²⁰Biise bilala lifuumbi liabechanga khu ngaaki khwe liiema lia Wele Omunyali Owa Bioosi khulwe chindaalo ndiiti busa. Ne khuloondekhana ne lilaka lia Wele Omunyali Owa Bioosi barama mu kambi namwe barekukha.

²¹Biise bilala lifuumbi liabechanga khukhwama ekolooba khukhwola kumutikhinyi ne lirurao. Ne liarurangao kumutikhinyi Baisiraeli barekukhanga. Buli lwosi lifuumbi ne liniina angaaki, ne kuli kumuusi namwe silo Baisiraeli barekukhanga.

²²Yakhaba ne chili chindaalo chibili, namwe kumwesi, namwe khu siise sileeyi, khuloondekhana nga lifuumbi ne liabechanga khu ngaaki khwe liiema lia Wele Omunyali Owa Bioosi, se barekukha nga tawe. Ne nga lifuumbi ne liesutanga angaaki, barekukhanga.

²³Khuloondekhana ne lilaka lia Wele Omunyali Owa Bioosi bakholanga ekambi namwe barekukhanga. Baliinda lilaka lia Wele Omunyali Owa Bioosi, nga Wele Omunyali Owa Bioosi ne alilaka khubirira khu Musa