Read lubukusu Mik. 1 Bible Online

Mik. 1 - lubukusu bible

Mik. 1

¹ Wele Omunyali Owa Bioosi aana burume buno khu Mika owaama mu lukoba lwa Moresiesi, mu ndaalo nicho Yosamu, Ahasi, ne Hesekia bamiilamo Yuda. Wele Omunyali Owa Bioosi ekesia Mika kamakhuwa kano koosi khuloondekhana ne Samaria ne Yerusalemu.

²Ulila lino, enywe Be Chikholo mweesi, rekeeresia lino, mweesi mumenyile khu sibala! Omwami WELE alalomaloma khu mabi kenywe. Rekeeresia alikho alomaloma khukhwama mu Lukaangu lwewe lutakatifu.

³Wele Omunyali Owa Bioosi alikho echa khukhwama abuundu wewe atakatifu, alecha mala aswalakilile abuundu e khusaayila bifwaani.

⁴Bikulu bilayengukhila asi wewe nga embula mu mulilo, bileekha asi mu matooma nga kameechi ne keekha khu mwikha.

⁵Kano koosi kalakholekha sikila sileka ne bubwoni bwe Baisiraeli khu Wele, wikiicha naanu khulwe sileka sie Baisiraeli? Se luli Samaria lukoba luboofu lwa Isiraeli! Naanu okholeleesie khusaaya bifwaani mu Yuda? Se bali babaandu ba Yerusalemu babeene!

⁶Khwako, Wele Omunyali Owa Bioosi aloma ali, “Ndabunia lukoba lwa Samaria lube likuunda, abuundu e khubiaala kimisabibu. Ne ndichukha kamabaale kalwo mwitooma, ne khusiulaka kimisiingi kialwo.

⁷Bifwaani biomwo bioosi bikharakakwemo, bioosi nibio baaelesia baeeyi be mu lukaangu bikhosibwe, bifwaani bialwo bioosi bikhabe libuumbi sikila babaandu balwo babinyoola khulwe bueeyi ne luno basiku balwo balabisuta bayilile bakhola bueeyi abuundu aandi.”

⁸Nio Mika aloma ali, “Sikila kano, khelooche ne khulila, khechule mala ngende sichula, khasame nga engipwe mala ndile nga enyeefwe.

⁹Kamakoonjo ka Samaria se kaona tawe, mala luno kakwile khu Yuda, libuna liolile khu bilibwa bie babaandu base bamenyile mu Yerusalemu.”

¹⁰Mukhaboolelakho baali mu Kati khukhilwa khwefwe tawe, bakhamubona ne mulila tawe. Ne enywe babaandu ba Beti lafira, yikalangasia mwipukhuulu khukhwekesia bubeeleli bwenywe.

¹¹Enywe bamenywa ba Safira, mulacha mu mbaambe ne muli sichula mala muambwe chisoni. Bamenywa ba Sanaani, mukharura enje we lukoba tawe. Ne muulila babaandu ba Beteseli ne balila, manya muli bubwilukhilo bwenywe se buliyo tawe.

¹²Sikila babaandu ba Marota baliindilila siuluukho mu silukuluku sikila Wele Omunyali Owa Bioosi areerire libuna khu lukoba lwa Yerusalemu.

¹³Enywe mumenyile Lakishi, boa chifarasi khu makaari ke liie. Enywe mwaloonda bubwoni bwa Isiraeli, mala mwakila babaandu ba Yerusalemu bakwa mu bwoni.

¹⁴Khwako mulaana biianwa bie khuboolela babaandu ba Moresheti-kati muli muliindwe, ne babaandu ba Akisibu balabea babaami ba Isiraeli.

¹⁵Enywe babaandu ba Moresa, Wele Omunyali Owa Bioosi alamura enywe mumakhono ko musiku, oolikho ocha khutiila lukoba lwenywe. Babemeelesi ba Isiraeli bakhache bekise mwibina lia Adulamu.

¹⁶Baandu ba Yuda, beka lichuune lienywe, ne mulila babaana benywe nibo mwasiima, ba ne bisule nga ng'ooli, sikila babaana benywe balatiilwa bache mu mbaambe.