Read lubukusu Mik. 2 Bible Online

Mik. 2 - lubukusu bible

Mik. 2

¹Bali ne silaamo abo barengeecha ne barekekha kamamayaanu, oli busia bakhola niko barekekhe siilo, sikila bali ne bunyali bwe khukhola bario.

²Bekoomba ne khu nuula babaandu kimikuunda, bekoomba chinju ne khuchibukula, bapia omundu siibi ne lisaaye liewe, ne khumunuula kumukabwa kwewe.

³Khwako Wele Omunyali Owa Bioosi aloma ali, “Ndikho ndekekha butinyu khwinywe butinyu nibwo mukhebacha tawe. Mucha khukwa mu butinyu, ne se mukheboniekho lundi tawe.

⁴Siise esio ne siola babaandu balipa chimbakha khwinywe babaandu balirumikhira kakekholekha khwinywe nga silolelo sie libuna, mala bakhembe kumwenya kwe ngunyi kuno. Efwe khwabuniile elala. Wele Omunyali Owa Bioosi abukule kimikuunda kiefwe mala akiaanile khwaabo babakhura efwe mu mbaambe.”

⁵Khwako siise ne sikhoole sie khukoboselia babaandu ba Wele Omunyali Owa Bioosi kamaloba, enywe se mukhanyoolekho khu mukabwa tawe.

⁶Babaandu bamboolela bali, “Okhakhwilwachila tawe. Okhelwacha khu makhuwa ako tawe. Wele se acha khukhuambia efwe chisoni tawe.

⁷Mwibaasia muli ba Isiraeli balaamiilwe ku? Wele Omunyali Owa Bioosi atibisie liliekhaliilikha liewe ku? Anyala akhola siindu sirio? Wele Omunyali Owa Bioosi se alomalomanga kamalayi khwaabo bakhola kamaluungi tawe ku?”

⁸Wele Omunyali Owa Bioosi akobosia ali, “Enywe mwibwaakala babaandu base nga basiku. Babaandu bakobola khukhwama mwiie bebaasia bali, bali ne kumuleembe, ne kakhali enywe mubanuula chingubo chabwe.

⁹Muoona bakhasi be babaandu base mala barura munju nicho basiima, lundi mwanuulile babaana babwe chikhabi cha buli lwoosi.

¹⁰Yinyokha muche, sikila ano bubwilukhilo se buliio lundi tawe. Sikila bubwoni bwenywe bwareerire libuna abuundu ano.

¹¹“Babaandu bano benya omung'oosi owechula bubeeyi obaboolela ali, ‘Endali ne kamalwa bilaba bikali.’

¹²“Ne kakhali ndamubuusia enywe alala ndabuusia babarama mu Isiraeli, ndamubuusia alala nga kamakheese mu siko siako nga kumunyele mu mayilwe, sibala sienywe silechula babaandu.”

¹³Wele aliikula babaandu bewe khukhwama mu mbaambe, balirura enje we bilibwa mala babe balekhuule. Wele Omunyali Owa Bioosi, oli omwami wabwe, omwene alibarangirira abarusie mu mbaambe.