Read lubukusu Mik. 3 Bible Online

Mik. 3 - lubukusu bible

Mik. 3

¹Mika aloma ali, “Bemeelesi ba Isiraeli rekeeresia! Awenyekha mukhole bung'ali,

²ne kakhali mwabiyila kamalayi mala mwasiima kamabi. Mubaaka ne mutabulakamo babaandu base ne bakhaafwa tawe.

³Enywe mubaaka ne khulia babaandu base mufunaka bikuumba biabwe ne khubasacha nga chinyama nicho mwenya khura mu ningilo.

⁴Siise silikho siicha nisio mulililila Wele Omunyali Owa Bioosi ne kakhali salimukobosia tawe sakharekeeresie kamasaba kenywe tawe, sikila mwakholile bumayaanu.

⁵“Babaandu base basiima bang'oosi, ba babea bali khulaba ne kumuleembe sikila babaruungire, lundi barikhirisilia liie, khwaabo bakhabaruunga tawe, khu bang'oosi bano Wele Omunyali Owa Bioosi aboola ali,

⁶‘Bang'oosi chindaalo chenywe chaweele, sikila mutiimia babaandu base, se mulaba ne kamalola tawe. Se mung'oolakho siindu lundi tawe.’ ”

⁷Bang'oola baliambwa chisoni sikila niko bang'oolile se kekholekha tawe, bakhaambwe chisoni, sikila Wele sakhakhole niko bamusabile tawe.

⁸Ne kakhali ese Mika Wele Omunyali Owa Bioosi anjichusie Roho wewe ne kamaani, mala ambelesie ese limanya lie bung'ali, ne bunyindaafu bwe khuboolela Baisiraeli bubwoni bwabwe.

⁹Ndekeresie enywe babemeelesi Baisiraeli, enywe mumwabiila bung'ali mala mukaluukhasia bulayi buba bubi,

¹⁰mulombakhanga Yerusalemu lukoba lwa Wele khu musiingi kwe sifuki ne bubeeyi.

¹¹Babemeelesi ba Yerusalemu banyoola asoya mu bwimeelesi bwabwe. Basaayi basomia Lilaka khulwe khunyoola kumuruungo, ne bang'oosi baruungia chirupia nio bang'oole, mala boosi baloma bali, Wele Omunyali Owa Bioosi ali ne nabo. Lundi bali, “Bubi se bulakhwichakho tawe Wele Omunyali Owa Bioosi ali nafwe.”

¹² Khwako sikila enywe, Sayuni lulilimwa nga kumukuunda lukoba lwa Yerusalemu luliba situumi sie libuna ne sikulu siilikho Lukaangu siliba sichakha.