Read lubukusu Mik. 4 Bible Online

Mik. 4 - lubukusu bible

Mik. 4

¹Mu ndaalo chichiicha sikulu siilikho Lukaangu lwa Wele Omunyali Owa Bioosi. Siliba sileeyi khukhila bikulu bioosi, khukhila chingulu choosi. Chikholo chingali chikhebusiekho,

²ne babaandu abo baliloma bali, “Yiicha khuche khu sikulu sia Wele Omunyali Owa Bioosi, mu Lukaangu lwa Wele owa Isiraeli. Alakhusomia niko enya khukhole, mala khukhole niko enya. Sikila lilaka lia Wele Omunyali Owa Bioosi liama Yerusalemu, Wele alomaloma khu baandu bewe naali Sayuni.”

³ Alimalao kamayiingamo ke chikholo mu kholo che kamaani che aembi ne aleeyi ne babaandu balibasa chimbalu chabwe chibe chimbako ne kamafumo kabwe kabe chingeso. Babaandu Be Chikholo se balipana lundi liie tawe ne se balirekekha lundi ke liie tawe.

⁴ Buli mundu alamenya mu muleembe, alibiaala kimisabibu kiewe omwene ne kimituli, ne se aliio olimuriikhirisia tawe sikila Omwami Owe Banamae alakiliisie ario.

⁵Luno buli ekholo esaaya ne khuria Wele wayo, ne kakhali efwe khulasaaya ne khuria Wele Omunyali Owa Bioosi Wele wefwe khulwa mindali.

⁶Wele Omunyali Owa Bioosi aloma ali, “Siise silikho siicha, nisio ndibuusia alala abo nibo naukuuma, abo ba baaba mu sibi mu mbaambe.

⁷Bali baleme lundi bali aleeyi khukhwama engo wabwe, ne kakhali ndakhola limenya liya khwaabo ba barama mala baliba ekholo emboofu. Khukhwama siise esio ndibamiia ne ndi khu sikulu sia Sayuni khulwa mindali.”

⁸Ne ewe Yerusalemu nilwo Wele emangakho naliinda babaandu bewe nga omwaayi, oliba lundi lukoba luboofu lwe bubwami bubwaba bubwowo.

⁹Baandu ba Yerusalemu, siina sikila ne mulila lukali? Siina sikila ne muumia nga omukhasi olumwa? Sikila se muli no mwami tawe, namwe babemeelesi benywe bafwa?

¹⁰Ee baandu ba Yerusalemu, lila ne khusikhiikha nga omukhasi olumwa, sikila luno mularura mu lukoba mala mumenye aleeyi mu lukoongo. Mulacha e Babiloni, ne kakhali Wele Omunyali Owa Bioosi alimuonia khukhwama khu basiku benywe.

¹¹Chikholo chingali chebuusiisie khumwibwaakala enywe. Baloma bali, “Khukhwola khubunie Yerusalemu! Khulalubona ne lukwile kamaumbu.”

¹²Ne kakhali chikholo chino se chimanyile chinganakani cha Wele Omunyali Owa Bioosi tawe, se bamanyile bali babuusibwe alala khuukuumwa nga buulo nibwo benya khuula tawe.

¹³Wele Omunyali Owa Bioosi aboola ali, “Baandu ba Yerusalemu, cha muukuume basiku benywe. Ndamukhola mube ne kamaani nga euunwa eye chinjika che bichuuma ne bikhakayu bie kumukasa. Mulabunia babaandu Be Chikholo chingali ne kimiaandu nikio banuula mu siayuumba, mukhandeerere ese Omwami we sibala sioosi.”