Read lubukusu Mik. 6 Bible Online

Mik. 6 - lubukusu bible

Mik. 6

¹Rekeeresia niko Wele Omunyali Owa Bioosi eundukuma khu Isiraeli, Yinyokha mala wilooche ebweeni we chingulu, ne lekha bikulu biulile niko oloma.

²Enywe ngulu, ulila lilieundukuma lia Wele Omunyali Owa Bioosi, enywe ninywe kimisiingi kie sibala kikiabao khukhwama khale, sikila Wele Omunyali Owa Bioosi ali ne lilieundukuma khu baandu bewe mala alikho acha khureebana nabo.

³Wele Omunyali Owa Bioosi aloma ali, “Ee baandu base, siina sibi nase? Bubi bwase khwinywe buli siina? Mboolele!

⁴ Ese namurusia mu sibala sia Misiri, namureesia khukhwama mu bunasioobi, ne naruma Musa, Aruni ne Miriamu, khuba barangirisi benywe.

⁵ Baandu base, khebulila niko omwami Balaki owa Moabu arekekha khukhola khwinywe, ne niko Balamu okhwa Beori amuboolela, kakekholekha ne mucha Kilikali khukhwama Sitimu, mwolaane khumanya bikholwa bie buonia bwa Wele Omunyali Owa Bioosi.”

⁶Siina nisio khareerere Wele Omunyali Owa Bioosi owe mwikulu, ne nicha khusaaya? Eku, mureerere chimoosi nga biianwa bie khukhwosia?

⁷Eku, Wele Omunyali Owa Bioosi alasiimisibwa ne biianwa bie kamakheese chielefu, namwe kamafura kamakali ka miseituni? Nyala namuaanila omwana wase omubele khulwe bubwoni bwase?

⁸Se kanyalikha tawe! Wele Omunyali Owa Bioosi akhwekesia efwe kaali kamalayi, niko Wele enya efwe khukhole niko kano, khukhola bung'ali ne khukhwekesia busiime buli lwoosi, ne khumenya mu lieboombia mu bulala ne Wele wefwe.

⁹Buli bulayi khuria Wele Omunyali Owa Bioosi, aboolela lukoba ali, “Rekeeresia enywe mumenyile mu lukoba luno,

¹⁰mu nju che babaandu bamayaanu khulimo ne buiinda nibwo banyoolela mu bubeeyi, barumikhira bikelo bie bubeeyi sisiindu nisio ese mbiyisibwa nasio.

¹¹Ese nyala nabeela ndiena omundu orumikhira bikelo bie bubeeyi.

¹²Babaandu benywe baiinda babea ne khukhwiba bie bataambi ne enywe mweesi muli babeeyi.

¹³Khwako narakikhe khumubunia enywe, sikila bubwoni bwenywe.

¹⁴Mulalia ne kakhali se mulekura tawe ata mulachiililila khuba ne njala. Mwakhamusia bibiindu se mukhabionie tawe, nibio mukhaka khuonia ndibionakakila mwiie.

¹⁵Mulibiaala ne kakhali se mulikesa tawe, mulisuura kamatuunda ke kimiseituni ne kakhali se muliamiamo kamafura tawe, mulisuura kimisabibu ne kakhali se mulinywa endali yakio tawe.

¹⁶ Kakhabe kario sikila mwaloonda bikholwa biibi bio mwami Omri no mwana wewe omwami Ahabu niko akhola mala mwaloondile bukeleki bwabwe. Khwako ndamubunia enywe mala buli mundu alimulekelesia babaandu boosi balimukhoma.”