Read lubukusu Mik. 7 Bible Online

Mik. 7 - lubukusu bible

Mik. 7

¹Ndi ne silaamo! Sikila nabeele nga omundu we njala okhanyoola lituunda liramire khu murongooro kakaandi ne kabutibwe tawe kamatuunda ke siimiyu kamalayi koosi kabutiibwe.

²Se aliio omusuubilwa oramire mu sibala tawe, se aliio oria Wele tawe. Buli mulala alindiliile khukhwira, ne buli mulala ayiima owasie.

³Boosi bamanyile khukhola kamabi ne sinani, babaami ne bakhalaki basaba asoya. Ne kakhali owe lukoosi aloma niko kumwoyo kwewe kwenya, khwako barekekhera alala niko benya.

⁴Akhaba balayi lundi basuubilwa lukali mu nibo bali busa nga enyoonyi ekhali ne bukhala tawe. Endaalo yolile niyo Wele acha khuukuumilakho babaandu bewe, nga aboola khubirira mu bang'oosi bewe. Luno bakoyaanile.

⁵Okhasuubila owasio, namwe ore lilieyikina mu musaale tawe, ba omurekeerefu niko oloma, akhaba khu mukhasi wowo.

⁶ Chindaalo chino babaana basoleeli babukula bararaawabwe nga basilu, bakhaana bayingania ba maawabwe ne mukho musaani alomania masalaawe we siikhasi, basiku bo mundu bali babaandu be nju yewe babeene.

⁷Ne kakhali ese ndalindiilila Wele Omunyali Owa Bioosi, ndalindiilila Wele ne lilieyikina. Wele alambonia. Wele wase alambulila.

⁸Basiku befwe, mukhekhoya sikila khwakwile tawe. Khwakwile mala khulenyokha. Luno khuli mu siilima ne kakhali Wele Omunyali Owa Bioosi alakhukhoselia.

⁹Efwe khulekhaliilikha bukhalafu bwa Wele Omunyali Owa Bioosi. Sikila khwamukholeele bubwoni, khulekhaliilikha khukhwola akhubabile kumusaango kwefwe. Ne khu khurusiakho bukhalaki bwewe. Alikhureera efwe mu buwaanga khukhabone buonia bwewe.

¹⁰Abwenao basiku befwe balibona kano mala chisoni chiliaamba abo babakhuboolela efwe bali, “Wele Omunyali Owa Bioosi, Wele wenywe ali waena?” Efwe khulibabona nga bakhilwa, ne baliswalakililwa asi nga kamatosi ke khu ngila che mu lukoba.

¹¹Baandu ba Yerusalemu, Siise sie khukhwombakha lundi kamasiisi ke lukoba lwenywe siolile. Siise esio chinjakha chikhabalae.

¹²Babaandu benywe balimukobolela khukhwama buli abuundu, khukhwama Ashuru ebukwe khukhwola e Misiri ebunafubo bali mwichakho ne khukhwama mu bibala bie aluuchi lwa Efurati, khukhwama mu nyanja che aleeyi ne chingulu che aleeyi.

¹³Ne kakhali sibala siliba sisiangalaamwe, sikila bubwoni bwe babaandu bamenyilemo.

¹⁴Wele Omunyali Owa Bioosi, ba omwaayi khu baandu bowo nibo wamwene warobora. Akhaba ne bamenyile bong'ene mu sichiimi, kumukuunda kwe ngakha kuli embi nabo. Lekha bamenye mu maloba ke ngakha ka Basiani ne Kileati nga bamenyanga khale.

¹⁵Wele Omunyali Owa Bioosi Khukholele kamayia, nga biise nibio wakhurusilia mu sibala sia Misiri.

¹⁶Chikholo chichiindi chikhabone mala chiambwe chisoni, chakhaba ne chili ne kamaani kamakali bakhasile busa, mala baminyaale.

¹⁷Balikhururira asi nga chindemu, balirura mu ngoba chabwe chisire ne baterema, mala bakobolele Wele Omunyali Owa Bioosi Wele wefwe ne liria, mala baliba ne buuri sikila ewe Wele Omunyali Owa Bioosi.

¹⁸Ee Wele Omunyali Owa Bioosi naanu oli Wele nga ewe, obeela bubwoni, owibilila bumayaanu bwe babaandu be kumukabwa kwewe khwaabo bakhacha mu mbaambe tawe? Ewe se obechanga ne lirima khulwa mindali tawe, sikila wekesianga busiime bwa buli lwoosi.

¹⁹Ewe olakhukholela efwe siisa lundi. Olaswalakilila bubwoni bwefwe, ne khubumwaata mu nyanja.

²⁰Ewe olekesia busuubilwa bwowo khu be nju eya Yakobo, ne busiime bwowo khu lisaaye lia Aburahamu, nga wasuubisia bakuuka befwe, khukhwama khale.