Read lubukusu Nau. 1 Bible Online

Nau. 1 - lubukusu bible

Nau. 1

¹ Buno buli burume khuloondekhana ne lukoba lwa Ninefe, liaandike khu malola niko Naumu owama mu lukoba lwa Elikosi aabona.

²Wele Omunyali Owa Bioosi se ekhaliilikhanga bamwekelaniakho tawe, Aukumanga abo bakhafukiilisiana naye tawe, mwirima liewe aruungia kamabi.

³Wele Omunyali Owa Bioosi ali kalaa khuambwa lirima, ne kakhali ali ne bunyali, se alekhanga khuukuuma babooni tawe. Niio Wele Omunyali Owa Bioosi akeenda embembeesi yinyokha, Kamafuumbi kali lutamuusi nilwo bikele biewe binyosia.

⁴Akhokhela enyanja, mala yooma Ateenyia chinjichi. Kimikuunda kia Bashani kiooma, sikulu sia Karimeli siekhola sikupilia, ne bimuli bia Lebanoni biniala.

⁵Bikulu biterema ebweeni wa Wele Omunyali Owa Bioosi, chingulu chinukulukha ebweeni wewe. Wele Omunyali Owa Bioosi nga nabonekha sibala siesisikha, sibala ne babaandu balio boosi baterema.

⁶Naanu onyala wema ebweeni wewe naali ne lirima? Naanu onyala ekhaliilikha burafu bwe lirima liewe? Lirima liewe lirura nga kumulilo, niye arakakangamo chinyaanda.

⁷Wele Omunyali Owa Bioosi ali omulayi, aliinda babaandu bewe mu siise sie butinyu aliinda abo bamweyikina niye.

⁸Ereera elala basiku bewe nga kameechi kakechuule, eera abo bamuyingania.

⁹Siina nisio mulakwangwaanilanga Wele Omunyali Owa Bioosi? Alamwiira. Se aliio omuyingania khukhwola khabili tawe.

¹⁰Bulayi bwene nga kamawa ne kosibwa enywe bameesi mulosebwa murio.

¹¹Omundu owekutanga Wele Omunyali Owa Bioosi, ne khumwekesia enywe bubwoni se ama mwinywe tawe ku?

¹²Wele Omunyali Owa Bioosi aboola ali, bakhaba bakali lundi be kamaani balonakakwa mala bafwe, akhaba ne namupia enywe sibi se ndakhola ndio lundi tawe.

¹³Luno ndakamia kamaani ka Asiria khwinywe, ne khukhalaka kiminyololo kikiamuboa.

¹⁴Kano niko Wele Omunyali Owa Bioosi abisiisie khulwe ba Asiria: “Se baliba ne lisaaye libatiuukha tawe. Ndonaka bifwaanani bili mu chingaangu che ba wele babwe. Ndarekekhanga eng'ani eye ba Asiria, se bakhoyela khumenya tawe!”

¹⁵ Lola, Omurume alikho echela khu bikulu ne elomo endayi! Ali khungila echa khulangilila bukhili! Baandu ba Yuda, sangaala mu milukha kienywe mala muelesie Wele nibio mwamulaka mu khwechuba. Babooni se balibwaakalakho sibala sienywe lundi tawe. Babunisiibwe elala.