Read lubukusu Nau. 2 Bible Online

Nau. 2 - lubukusu bible

Nau. 2

¹Ninefe, balikho bakhwibwaakala, kamaani kalakhusalanisia kolile. Rekekha banamae benywe khulwe buliindi. Liinda chingila! Yirekekhera liie!

²Sikila Omwami ali siimbi khukobosia efuma eye lukoba lwa Isiraeli nga ne lwaba, basiku balwo ne bakhaluyaaya tawe.

³Banamae basiku basuta chingabo chimbesemu, lundi befwara chingubo chifwaanana chimbesemu. Balerekekhanga khukhwibwaakala! Kamakaari kabwe kamwemukha nga kumulilo! Chifarasi chabwe chitima!

⁴Kamakaari ke liie kechula sifwaabi mu miyila. Kacha enyuma ne ebweeni akari e lukoba, kakhosia nga chitochi ne kameniuukha nga lueni.

⁵Babemeelesi balaangwa, betuya nga beyindilisia khucha ebweeni. Babebwaakali batimaka sie siisi, mala barayo engabo ekhiingilila sitikulula lisiisi.

⁶Bilibwa biili eluuchi bikukha, lichipi liechulamo kamariisio.

⁷Kwini atiliilwe, bakholi bewe beunamila nga kamauusi ne bara kamakhono kabwe alusaya mu bubeeleli.

⁸Babaandu belukha khukhwama mu Ninefe! Nga kameechi kakaama mwitiisi likhungululwe, Bayokela ne baloma bali, “Yiima! Yiima!” Ne se aliio owekhebukha tawe.

⁹Khemuyaye efwesa! Khemuyaye esahabu! Lukoba lwechulamo kimiaandu!

¹⁰Ninefe lwonakwe ne khu khwanjukhwa, Kimiooyo kiechuule buuri, kamasikamo katerema, kamaani kawelemo, bubweeni bwakaluukhane.

¹¹Lukoba lulwabechanga nga kamabina ke chitalang'i luno luli waena? Abuundu niio chitalang'i ching'ana chalisibwanga, niio chitalang'i chachichanga, nio ching'ana chacho chiliindwe.

¹²Etalang'i yeera esaang'i yayo, mala yakitabulakila chichasie ne ching'ana chayo, yechusia chinyama chindabulake mwibina mwayo.

¹³Omwami Owe Banamae aloma ali, “Ese ndi omusiku wowo, Ndoosia kamakaari kowo. Banamae bowo balererwa mwiie, ne ndabukula buli siindu nisio wanuula babaandu babaandi. Lilienya lie barumwa bowo se liliuliilikhana lundi tawe.”