Read lubukusu Nau. 3 Bible Online

Nau. 3 - lubukusu bible

Nau. 3

¹Lukoba lubeeyi lundi lwe babeeri, lulwechulamo kimiaandu luno, lwabunile. Lulebwaakalwa ne biilimo khuyaaywa!

²Rekeeresia! Khurundukha khwe siboko, khusakaya khwe chingarangarani, khutima khwe chifarasi, khupiringikha khwe kamakaari!

³Banamae be chifarasi bachirekusia chiche ebweeni, chimbalu ne kamafumo bimeniuukha! Bafu babusibwa bituumi, bafu bakali bakhabalikha tawe babaandu babetuyakho!

⁴Ninefe lukoba lwe sifwaabi lulikho luukuumwa. Lusiimisia mala lwechulamo bibiindu bie bulosi, omukhasi owechula bufwisi oyo aamba Be Chikholo ne sifwaabi siewe.

⁵Omwami Omunyali Owa Bioosi aboola ali, “Ninefe, ndakhuukuuma! Ndakhuchula mala Be Chikholo babone sichula siowo, mala oambwe chisoni.

⁶Ndakhulekelesia ne khukhunyaalutia, babaandu balakhubona mala bauke.

⁷Boosi balamubona enywe balesiindukha. Balaloma bali, ‘Ninefe lwabunile! Naanu olalukholela siisa? Naanu oleenya aluoleelesie!’ ”

⁸Ninefe, ewe oli omulayi khukhila Tebesi, lukoba luboofu lwa Misiri ku? Nilwo lwosi lwaba ne luluuchi lulwalukhiinga nga lisiisi, luluuchi olwo lwaba Naili.

⁹Tebesi lwaruka Sudani ne Misiri, bunyali bwalwo se bwaba ne sisiakamo tawe, ne lwaba ne busaale ne Libia.

¹⁰Ne babaandu ba Tebesi babukulwa khucha mu mbaambe. Buli khungila babaana babwe bapwangwa ne berwa. Banamae be basiku babara khu minyololo mala buli mundu acha ne babewe.

¹¹Ninefe, akhaba ewe olakwa mu kimeesi eye khuloba khumanya liliekholekha. Ne lundi olakhaka khukhwefubarura khu basiku bowo.

¹²Chingoba chowo chisire choosi chilaba nga kimituli kiirobiisie chinduli chakio, sisiikha kimirongooro, ne lituunda lilakwa mukhanwa mwowo!

¹³Banamae bowo balinga bakhasi, ne sibala siowo sili ao busa se sili ne oliinda busiku tawe. Kumulilo kulonaka kimitalaachi kikikala bilibwa biowo.

¹⁴Khemutae kameechi mwirekekhele liie ne khukhatatasia chingoba chenywe! Swala liloba mupe kamatifari, ne rekekha bibiipa kamatifari!

¹⁵Wakhakhola oriena, olosibwa namwe wirirwe mwiie. Olaba nga biakhulia biliibwa ne chisike. Mwasaalana nga buchunju.

¹⁶Mwasaala baboofuli bakali khukhila ching'enieesi che khwikulu! Ne luno bachile, nga chisike chibambula chindaa chacho mala chipurukha.

¹⁷Babemeelesi benywe bali nga chisike chiili mu masiisi khu ndaalo eye kumunyiri. Ne nga kumuumu ne kwicha, chipurukha, ne se aliio omanya niio chiicha tawe!

¹⁸Omuruki owa Asiria ewe, baruki baali asi wowo bafwiile, ne babaandu bowo be lukoosi bali mwilo lia mindali! Babaandu bowo baasalaniile khu bikulu, ne se aliio onyala abakobosia engo lundi tawe.

¹⁹Se siliio sirusiao khuchuunwa khwenywe tawe, ne kamakoonjo kenywe se kasilikhwa kaona tawe. Abo boosi baulila kamakhuwa ke lilionakwa lienywe baapa chimbi ne khukhwekhoya. Alikhoo namulala owifubarura burafu bwowo buli bukali ku?