Read lubukusu Hab. 1 Bible Online

Hab. 1 - lubukusu bible

Hab. 1

¹Obuno nibwo burume nibwo Wele Omunyali Owa Bioosi ekesia omung'oosi Habakuku.

²Ee Wele Omunyali Owa Bioosi, ndasaba buyeeti khu siise siina nio ewe okhuulile, namwe nio okhuonie khukhwama khu siayuumba?

³Siina sikila ne unda mu butinyu? Wikhaliilikha oriena khubona bumayaanu? Libuna ne sisiayuumba biambotookhelele, bulomani ne bubupani bili buli abuundu.

⁴Khwako lilaka se lili ne kamaani tawe, ne bung'ali se buliio tawe, sikila bamayaanu baindiaala khukhila baluungi, ne bung'ali bwakoyaanisibwa.

⁵ Nio Wele Omunyali Owa Bioosi aboolela babaandu bewe ali, “Chiililila khulola chikholo chiili siimbi nanywe, mala mulesiindukhila niko mulabona. Nja khukhola sikholwa nisio mulaulila mala mulekhe khusuubila tawe.

⁶ Ndikho namiisia ba Babiloni, ekholo endafu eyayobayobana, balikho bamaasia buli abuundu khuulila bibala bibiindi.

⁷Bareera buuri ne liendekhelela, mu lielola liabwe bekholela kamalaka babeene.

⁸Chifarasi chabwe chili khangu khukhila chingwe, chindafu khukhila bisuuche. Bakeendela khu farasi bama mu bibala bie aleeyi Chifarasi chabwe chibuya. Chiicha khangu nga chifuruusi ne chiikha khukamula siindu.

⁹Banamae becha ne sisiayuumba, buli mundu ariire nga ne becha, baambe babwe bali bakali nga buchunju.

¹⁰Balekelesia babaami ne khuchekheelela babemeelesi. Se luliio lumako lubakhiingilila tawe sikila babuusia situumi bambukhile baluambe.

¹¹Bacha ebweeni oli embeo, kamaani kabwe niko wele wabwe.

¹²Wele Omunyali Owa Bioosi, khukhwama khale ewe oli Wele. Oli Wele wase omutakatifu lundi owa mindali? Wele Omunyali Owa Bioosi, oli Wele lundi omuliindi wase, warobora Bababuloni ne khubaa kamaani nio bakhuukuume efwe.

¹³Ne kakhali Wele Omunyali Owa Bioosi, wikhaliilikha oriena babaandu bachongani ne bamayaanu bano? Chimoni chowo se chinyala chalola bumayaanu tawe mala sonyala wekhaliilikha babaandu ne bakhola kamabi tawe. Sina sikila nosilile busa babaandu bamayaanu ne babunia baluungi khubakhila?

¹⁴Wele Omunyali Owa Bioosi, obukula oriena babaandu nga ching'eeni, namwe nga bimoola bitamba omwimeelesi?

¹⁵Bababiloni baloba babaandu oli ching'eeni. Babatilila mu ndimba chabwe ne bekhoyela khutiilwa khwabwe.

¹⁶Lundi basaaya chindiimba chabwe ne khuchiaanila chimbosio, sikila chindiimba chibaanila buli siindu silayi nisio benya.

¹⁷Wele Omunyali Owa Bioosi, balachiililila khurumikhira chimbalu chabwe buli lwoosi, ne khubunia chikholo ne bakhabaakho ne siisa tawe?”