Read lubukusu Hab. 2 Bible Online

Hab. 2 - lubukusu bible

Hab. 2

¹Habakuku aloma ali, “Ndaniina khu ndeleelwa yase, mala ndindiilile nilio Wele Omunyali Owa Bioosi amboolela, ne likobosia siina nilio amboolela.”

²Nio Wele Omunyali Owa Bioosi akobosia ali, “Andika bulayi bubwene khubipao niko nja khukhuboolela, nio kabonekhe khu buli mundu osoma.

³ Sikila siise sie kamalola kano khukhwekholekha sikhoola tawe. Ne kakhali silikho siicha khangu, ne niko ekhwekesia kakheche kekholekhe. Kanyala kaayilila ne kakhali kalindiilile khukhwola kalekholekha.”

⁴ Burume nibwo buno, “Bali bamayaanu balafwa, ne kakhali bali baluungi balamenya sikila bali ne lisuubila khu Wele.

⁵“Khutasa khwako, endali emeesia omundu owe kibonio se alayindila tawe, kameelu kewe kali kamabalaayi nga emakoombe, nga lifwa se ekura tawe, apania chikholo choosi, mala mwaamba babaandu bano boosi baba babenywe.

⁶Babaandu babaulwa bakhachekheelele ba babaula. Balibaboolela bali, ‘Mubukula biikhali bibienywe tawe, ne kakhali mwabunile! Mulachiililila khuba baiinda khu siise siina, khulwe khuyingiilila be kamakobi kenywe bamuruunge?’ ”

⁷Ne kakhali ne likhamanyikha tawe, enywe mumwaula babaandi, muliba mu makobi mwabene mala muyingililwe khuruunga bukhala. Basiku bakheche bamurikhirisie. Ne bakhamubunie.

⁸Sikila mwanuula chikholo chingali ne kakhali abo babarama bakheyache sikila bubwiri nibwo mwakhola, ne lundi sisiayuumba nisio mwakhola khu baandu be sibala sioosi ne chingoba chabwe.

⁹Enywe mwabuna! Mwayindisia chinju chenywe ne bibiindu nibio mwanuula musiayuumba mala mwakhaka chingoba chenywe chione khukhwama khu busiku.

¹⁰Ne kakhali lirekekha lienywe liareerire chisoni mu chinju chenywe, mukhwibwaakala chikholo mwerereere libuna mwabene.

¹¹Akhaba kamabaale ke kamasiisi keloocha sikila enywe, ne kimitalaachi kiosi kilila.

¹²Enywe mwabuna! Mwarakikha lukoba bubi mala mwalwombakhila khu sifuki.

¹³Chikholo nicho mwaula chakhola kia busa, ne bioosi nibio bakhola biakwa likokhe. Wele Omunyali Owa Bioosi niye okholile kano.

¹⁴ Ne kakhali sibala sikhechule limanya lie luyali lwa Wele Omunyali Owa Bioosi, nga kameechi ne kechula mu nyanja.

¹⁵Ali ne silaamo oyo ookhola owasie ameele! Oora bufwisi mu ndali yabwe, nio ababone ne bekhaale sichula.

¹⁶Ne mweesi mukhaambwe chisoni nga beele ne munyoola efuma. Enywe mwabene mukhanywe mala mutalitaale. Wele Omunyali Owa Bioosi akhamunywesie sikoombe sie siiukuumo, ne efuma yenywe ekhekhole chisoni.

¹⁷Enywe mwarema kumusiru kwa Lebanoni, ne luno enywe mularemwa, mweera chisaang'i chakwo ne luno chisaang'i chilamuriisia. Kano kakhekholekhe sikila sifuki nisio mwachukha ne sisiayuumba nisio mwakholela babaandu ne chingoba

¹⁸Sifwaani sili na bukhala siina? Sili busa sisiindu nisio omundu akholile, ne se sikhuboolela sisiindu tawe ne kakhali bubeeyi. Sili nabukhala siina khu wasikhola nio asisuubilemo, wele khakhalomaloma tawe!

¹⁹Enywe mwabuna! Muboolela sipichu sie kumurongooro muli, “Siisimukha!” Namwe khu libaale muli, “Yinyokha!” Sifwaani sinyala siakhuboolelakho siindu ku? Banyala basisaa ne fwesa ne sahabu ne kakhali se sili ne bulamu tawe.

²⁰Wele Omunyali Owa Bioosi ali mu Lukaangu lwewe lutakatifu, lekha buli mundu asile busa khu sibala niye ali.