Read lubukusu Hab. 3 Bible Online

Hab. 3 - lubukusu bible

Hab. 3

¹Lisaba lio mung'oosi Habakuku.

²Ee Wele Omunyali Owa Bioosi, nauliile efuma yowo mala nariire. Nono khola orio lundi mu biise biefwe bikholwa bikali nibio wakholanga, akhaba noli ne lirima ba ne siisa.

³Wele alikho akobola lundi khukhwama Edomu, Wele omutakatifu alikho echa khukhwama khu bikulu bia Parani luyali lwewe lwechuule likulu, ne sibala siechuule efuma yewe.

⁴Buwaanga bwewe buli nga bwe nyanga, buwaanga bukhosia khukhwama mukhono mwewe, mu bwene omwo nimwo bunyali bwewe buli.

⁵Arangisia bulwaale, ne alaka lifwa khumuloondakho.

⁶Ne eema sibala siterema, ne alola chikholo chiterema. Nio chingulu cha mindali chibulungukha ne bikulu bia buli lwoosi biesikha, bikulu nibio akeendangakho khale.

⁷Nabona babaandu ba Kushi ne baria, ne babaandu ba Midiani baterema.

⁸Wele Omunyali Owa Bioosi, chaba chinjichi chichakhuambia lirima? Yaba enyanja niyo eyakhukhalasia? Ewe wakeendela khu mafuumbi, lifuumbi lie mbembeesi liaba likaari liowo nga wareerera babaandu bowo bukhili.

⁹Werekekha khurumikhira luyingo, werekekha khulasa buembo bwowo. Waarurura sibala mala chinjichi chatubukhamo.

¹⁰Chingulu nga chakhubona chaterema, kameechi kachichukha khukhwama mungaaki, kameechi ke mu nyanja kaoloola, mala bibuli biako bianiina angaaki.

¹¹Khulwe khumeniuukha khwe buembo bwowo bubweyuula, ne khu melamela khwe lifumo liowo, enyanga ne kumwesi biema.

¹²Ewe wakeenda mu sibala mu lirima, mala waswalakilila Be Chikholo mu bukhalafu.

¹³Ewe wacha enje khuonia babaandu bowo, khuonia omwami wowo omurobore. Ewe wera omwimeelesi owe bamayaanu ne khubunisilia elala baloondi bewe.

¹⁴Buembo bwowo bwalasa omwimeelesi wewe owe banamae nga becha oli sisifuusia, khu khusalanisia efwe, nga basangaala oli abo bapaapia bataambi sibi mu bwikisi.

¹⁵Ewe wakeenda khu nyanja ne chifarasi chowo, wabira mu lusiba lukhulukukha.

¹⁶Mbulila kano koosi mala nderema, kiminwa kiase kiterema ne buuri. Ese mbikila, ne bikele biase bituya. Ndasila busa mala ndinde siise siole nisio Wele alieleseliamo kumunaanio abo bakhwibwaakala efwe.

¹⁷Kumutuli kwakhalekha khurakho chinduli namwe kumusabibu kwakhalekha khurakho chisabibu kimiseituni kiakhatambao ne kimikuunda kiakhatambamo bibiaamo, mala bibiaayo ne chikhaafu biakhatamba mu mataala,

¹⁸ese ndachiililila khusangaala ne khukhwekhoya, sikila Wele Omunyali Owa Bioosi ali omuonia wase.

¹⁹ Omwami Wele ali kamaani kase, akholanga ngenda bulayi nga ekhisi, mala anindanga akhaba khu bikulu.