Read lubukusu Sef. 2 Bible Online

Sef. 2 - lubukusu bible

Sef. 2

¹Enywe ekholo ekhali ne chisoni tawe, khe mwebuusie alala,

²ne mu siili khuuchwa nga likhuuchi tawe, lirima lia Wele Omunyali Owa Bioosi ne lisiili khumwichakho tawe, endaalo eye lirima lia Wele Omunyali Owa Bioosi ne khamwichakho tawe.

³Enywe mweesi be lilieboombia mu sibala yiima Wele Omunyali Owa Bioosi, enywe mu mwaria kamalaka kewe, Yiima buluungi, yiima lilieboombia, nio wakana munyala mwebacha, endaalo eye lirima lia Wele Omunyali Owa Bioosi.

⁴ Se aliio olilekhwa mu lukoba lwa Kasa tawe. Ashikeloni lulanjukhwa. Babaandu ba Ashitoti balirusibwamo mwiangilwe ne babaandu ba Ekironi balirusibwa mu lukoba lwabwe.

⁵Bafilisiti enywe mwabunile! Enywe babaandu mu menyile embi ne nyanja, Wele Omunyali Owa Bioosi amalile khumukhalakila, alamubunia ne se aliio na mulala khwinywe olarama tawe.

⁶Kamaloba kenywe kakalaanda khu nyanja kalaba kamayilwe, ne kakhabemo bisali bie babaayi ne biko bie kamakheese.

⁷Babaandu ba Yuda baaliba balamu bakhamenye mu sibala sienywe bakhasikhole kamayilwe ne balikonaanga mu chinju cha Ashikeloni. Wele Omunyali Owa Bioosi, Wele wabwe aliba nabo mala abakoboselie lundi kimiaandu kiabwe.

⁸ Omwami Owe Banamae aloma ali, “Nauliile babaandu ba Moabu ne Amoni ne bakhoma ne khuchekheelela babaandu base. Belola bali balabukula kamaloba kabwe.

⁹ Khwako, nga ne ndi Wele Omunyali Owa Bioosi, Wele owa Isiraeli, nechuba ndi Moabu ne Amoni balikho bacha khubunisibwa nga Sodomu ne Komora. Bilakwa chumbe ne khuba abuundu we libuna lia mindali, enyoonyi elikhulamo. Babaandu base balirama balinuula abo bibiindu ne khubukula kamaloba kabwe.”

¹⁰Babaandu ba Moabu ne Amoni baliuukuumwa, mu ngila yino sikila khukhwelola ne khukhweniinia khwabwe, ne khukhoma babaandu ba Wele Omunyali Owa Bioosi.

¹¹Wele Omunyali Owa Bioosi akhabateremie alimalao bawele boosi be sibala, ne buli ekholo elimusaaya niye buli kholo abuundu wayo.

¹² Akhaba enywe Baesopia mulibunisibwa ne Wele Omunyali Owa Bioosi,

¹³ Wele Omunyali Owa Bioosi lundi alirumikhira kamaani kewe, khukhwonaka sibala sia Ashuru ne alikhola lukoba lwa Ninefe lwanjukhwe lutambemo kameechi nga sisiangalaamwe.

¹⁴Aliba abuundu niio bibiaayo ne kamatuuli bimenya ne chisaang'i cha buli lukano chilikonamo. Ne chisikhiikhi chilibamo ne khusikhiikhila munuma chalwo khooro kiliaanila amuliango. Kimitarakwa nikio bombakhila se kilibao tawe.

¹⁵Ako niko kakhekholekhe khu lukoba lulwebonia sikila kamaani kalwo mala lwakanakana luli, luli bulayi. Babaandu balwo bakanakana bali lukoba lwabwe nilwo luboofu khukhila chingoba chichiindi choosi mu sibala. Lukhanjukhwe lukali lube abuundu niio chisaang'i che mundaa chimenya. Buli obirao aliesiindukha.