Read lubukusu Sef. 3 Bible Online

Sef. 3 - lubukusu bible

Sef. 3

¹Yerusalemu lukoba lubi, lwe sileka lulupianga babaandu balwo siibi lwabunile.

²Se lwarekeeresie Wele Omunyali Owa Bioosi namwe lwafukiilila likololosia liewe tawe. Se lwasuubiile Wele Omunyali Owa Bioosi namwe lwenya buyeeti khukhwama khu niye tawe.

³Babemeelesi balwo bali nga chitalang'i chiulukhuma, bakhalaki balwo bali nga bisuuche bie njala bilia nandakhaola siilo sioosi.

⁴Bang'oosi balwo se bali ne limanya tawe lundi bachamani, basaayi bafwolobia biili bitakatifu mala bakoyania kamalaka ka Wele khunyoola bukhala.

⁵Wele Omunyali Owa Bioosi Wele walwo ali omuluungi, sakholanga bubi tawe buli kumutikhinyi ekesianga bung'ali bwewe, buli mabwibwi se akhilwanga tawe, ne kakhali bakhali bang'ali se baambwa chisoni tawe.

⁶Wele Omunyali Owa Bioosi aloma ali, “Nabuniisie chikholo choosi, nonakaake chingoba chabwe ne khukhola kamasiisi ne chindeleelwa chabwe khuba kamakuunda chingoba chabwe chanjukhwe, se aliio omenyilemo tawe. Ne khungila chabwe se aliio okeendakho tawe

⁷Nebaasia ndi babaandu base balaba ne buuri khwise, mala balafukiilila likololosia liase, mala balekhe khukhwibilila niko bekesia tawe. Ne kakhali enyuma we siise sitiiti siri bachiililila khukhola bubwoni bukali.”

⁸Wele Omunyali Owa Bioosi aboola ali, “Khwako ninde, khu ndaalo niyo ndirusiria buloli. Sikila libisia liase lili khubuusia chikholo ne bubwami, khubaweseliakho lirima liase lioosi, sibala sioosi silibuna khulwe lirima liase likali.

⁹Nio khakaluukhasie babaandu Be Chikholo, mala bakhasabe ese seng'ene ne se bakhasabekho bawele babaandi tawe. Boosi bakhafukiilile kakaase.

¹⁰Akhaba khukhwama engelekha we chinjichi cha Esopia, babaandu base babasalanila balinderera biianwa biabwe.

¹¹“Enywe baandu base, siise esio, se muliambwa chisoni sikila mwakholela sileka tawe, kharusieo buli mundu owebonia ne khukhweniinia, ne lundi se mulikholela sileka khu sikulu siase sitakatifu tawe.

¹²Khalekhe mu lukoba lwase babeboombia lukali, bakheeche buyeeti khwise.

¹³ Abo balirama mu Isiraeli, se balikhola bubi khu mundu yesi yesi tawe lundi se baliloma bubeeyi, namwe bubeeyi se bulibakho khu nimi chabwe tawe. Bakhabe nga kamakheese kakhaaye mu muleembe, se aliio olibariikhirisia tawe.”

¹⁴Baandu ba Isiraeli yiimba ne khukhwekhoya lukali, yekhoya ne kimwoyo kienywe kioosi baandu ba Yerusalemu.

¹⁵Wele Omunyali Owa Bioosi alekhile khumuukuuma enywe arusiisieo basiku benywe boosi Wele Omunyali Owa Bioosi, omwami owa Isiraeli ali ne nanywe se siliio sibariikhirisia luno tawe.

¹⁶Siise silikho siicha nisio baliloma khu baandu ba Yerusalemu bali, “Lukoba lwa Yerusalemu, okharia tawe namwe okhaluwa tawe.

¹⁷Wele Omunyali Owa Bioosi, Wele wenywe ali nanywe, kamaani kewe kamua bukhili. Wele Omunyali Owa Bioosi alamusangaalila enywe, mu busiime bwewe, alamuelesia enywe bulamu buyia, bakhembe ne khukhwekhoya sikila enywe,

¹⁸nga babaandu baali mu naikara ne bekhoya. Wele Omunyali Owa Bioosi aloma ali, ‘Nalekhile khumuriikhirisia ndi mulabuna ne khurusiao chisoni chenywe.’

¹⁹Siise silikho siicha nisio khaukuume abo boosi bamukuluumia enywe khasikule baleme boosi ne khukobosia engo be mu mbaambe. Ndikaluukhasia chisoni chabwe chibe efuma, ne babaandu be sibala boosi bakhabafumie.”

²⁰Wele Omunyali Owa Bioosi aloma ali, “Siise silikho siicha, nisio ndikoboseliamo babaandu benywe be mu mbaambe engo ndimukhola mumanyikhe mu sibala sioosi mala mukhole mube baiinda lundi nga mwaba.”