Read lubukusu Hag. 1 Bible Online

Hag. 1 - lubukusu bible

Hag. 1

¹ Mu mwiiko kukhola khabili nikwo Dario aba omwami owa Pasha, khu ndaalo eye khunyoa eye kumwesi kwa sita, Wele Omunyali Owa Bioosi aruma omung'oosi Hagai. Arumwa khuboolela omuruki owa Yuda Serubabeli okhwa Shealitieli, ne khu Omusaayi Omukhulu Lukali Yoshua okhwa Yehosataki.

²Omwami Owe Banamae aboolela Hagai ali, “Babaandu bano baloma bali, sino se sili siise silayi sie khukhwombakha lundi Lukaangu tawe.”

³Nio Wele Omunyali Owa Bioosi aruma omung'oosi Hagai aboolele babaandu ali,

⁴“Baandu base, siina sikila enywe ne mumenya munju chichombakhwa bulayi ne Lukaangu lwase lwekelile likuunda?”

⁵Khwako Omwami Owe Banamae aloma ali, “Kanakana limenya lienywe.

⁶Mwabiaala biakhulia bikali, mala mwakesa bitiiti busa. Mulia ne se mwikura tawe. Munywa endali ne kakhali se liio engali emumeesia tawe. Mwifwara ne kakhali se munyoola luluuya tawe. Okhola kimilimo akhola kia busa.

⁷Khwako kanakana limenya lienywe.

⁸Cha mu ngulu mukeye kimirongooro mala mwombakhe lundi Lukaangu. Ndalusangaalila nio nekesie luyali lwase.

⁹“Mweyikina khukesa bikali, ne kakhali mwakesa bitiiti busa. Ne nga mwareera engo, nabitamuusia. Sikila siina ne nakhola ndio? Sikila Lukaangu lwase lwekhola likuunda mala buli mundu khwinywe alikho akhaka kamaani khukhwombakha enju yewe omwene.

¹⁰Khwako efula yalekhile khukwa ne kamaloba kabeele sitalalie.

¹¹Nareera siimiyu khu sibala. Khu ngulu, mu mikuunda, mu maruuti ke kimisabibu, khu miseituni ne khu bimelwa bioosi. Ne, khu baandu, khu saang'i ne khu buli siindu nisio mukhaka khubiaala.”

¹²Nio Serubabeli okhwa Shealitieli ne Yoshua okhwa Yehosataki Omusaayi Omukhulu Lukali, ne babaandu babasikala boosi[1], bafukiilila niko Wele Omunyali Owa Bioosi, Wele wabwe aloma, khubirira mu mung'oosi Hagai nga Wele Omunyali Owa Bioosi, Wele wabwe ne aamuruma.

¹³Nio Hagai aboolela babaandu burume bwa Wele Omunyali Owa Bioosi ali, “Ndaba nanywe, lino lili lisuubisia liase.”

¹⁴Wele Omunyali Owa Bioosi atinyilisia buli mundu khukhwombakha Lukaangu. Atinyilisia Serubabeli, omuruki owa Yuda, Yoshua Omusaayi Omukhulu Lukali alala ne babaandu babakobola khukhwama mu mbaambe boosi. Nio babaandu bano boosi barakikha khukhwombakha Lukaangu lwa Wele Omunyali Owa Bioosi, Wele wabwe.

¹⁵Yino yaba endaalo eye kamakhumi kabili na chine eye kumwesi kwa sita, mu mwiiko kwa khabili kwe bubwami bwa Dario.