Read lubukusu Hag. 2 Bible Online

Hag. 2 - lubukusu bible

Hag. 2

¹Khu ndaalo eye kamakhumi kabili na ndala eye kumwesi kwa saba mu mwiiko okwo, Wele Omunyali Owa Bioosi aboolela omung'oosi Hagai ali,

²“Luno boolela Serubabeli omuruki owa Yuda okhwa Shealitieli, Yoshua Omusaayi Omukhulu Lukali ne babaandu babaandi oli,

³ ‘Alikhoo mwinywe onyala akhebulila bulayi bwe Lukaangu luno nga lwaba ku? Luno lubonekha lurie ebweeni wenywe? Mukhoya mulubone oli lukhali siindu tawe.

⁴Ne kakhali mukhafwa kimiooyo tawe. Khola kimilimo sikila ese ndi nanywe.

⁵ Nga mwama e Misiri nabasuubisia ndi ndiba nanywe buli lwoosi. Ese siili busa nanywe, khwako mukharia tawe.’

⁶ “Omwami Owe Banamae aloma ali, ‘Enyuma we siise sitiiti siri, ndateremia likulu, sibala, ne nyanja.

⁷Ndaula chikholo choosi mala kimiaandu kiacho kioosi kireerwe. Nio Lukaangu lwichusibwemo buiinda.

⁸Efwesa ne esahabu eye sibala bili bibiase.

⁹Lukaangu luuya lulaba lulayi khukhila lukhale. Ne ndielesia babaandu base buiinda ne kumuleembe.’ ”

¹⁰Khu ndaalo eye kamakhumi kabili na chine kumwesi kwa tisa kwe kumwiiko kwe khabili nikwo Dario aba omwami, Wele Omunyali Owa Bioosi aboolela omung'oosi Hagai lundi ali,

¹¹“Reeba basaayi bukhalaki bwabwe khwikhuwa lino.

¹²Kaaba bali omundu abukula sitonyi sie nyama sitakaasiibwe, mala asisutila mu ngubo yewe, ne alekha engubo yewe eyo yetiila khu siakhulia siosi siosi akhaba siteekhe, endali, kamafura, namwe biakhulia bie lukano lwosi lwosi. Engubo eyo enyala khukhola biakhulia ebio bioosi biaba bitakaasiibwe ku?” Nio nga areeba ario, basaayi bamukobosia bali, “Se kanyalikhana tawe.”

¹³ Lundi Hagai abareeba ali, “Kaaba bali omundu ali omunyaalu sikila etilile khu mufu, mala etiila khu siakhulia siosi siosi khu bino, sinyala siaba sinyaalu siosi ku?” Nio basaayi bakobosia bali, “Ee, silaba sinyaalu.”

¹⁴Nio Hagai aloma ali, “Wele Omunyali Owa Bioosi aloma ali, akhaba babaandu be ekholo yino bosi bali bario. Nono buli siindu nisio bakhola nende nisio baana khu alutare sili sinyaalu.”

¹⁵Wele Omunyali Owa Bioosi aboola ali, “Nono bona kamakhuwa kacha khwekholekha. Ne mukharakikha khukhwombakha lundi Lukaangu tawe,

¹⁶mwaba murie? Beele ne mucha khu fuuti eye kamaindi, niyo mukhoyele munyoolemo chikiilo chimia chibili, mwanyoolamo emia ndala yong'ene. Yaaba ne musuura endali niyo mwenyekha munyoolemo chilita emia ndala mwanyoolamo kamakhumi kane kong'ene.

¹⁷Nabareerera ekhuungu, ne kamaarara khukhwonakaka buli siindu nisio mwakhaka khubiaala, ne kakhaba kario se mwekanila tawe.

¹⁸Luno endaalo ekhola kamakhumi kabili na chine kumwesi kwa tisa, endaalo niyo kumusiingi kwe Lukaangu kumaliilwe khukhwombakha. Nono liinda mubone siicha khwekholekha khukhwama luno.

¹⁹Akhaba siakhulia ne siweele, mala kimisabibu, kimituli, kimikomanga ne kimiseituni ne kikhaanakho kamatuunda tawe, ese khukhwama luno ndamubiita enywe chikhabi.”

²⁰Khu ndaalo ng'ene eyo, kumwesi okwo ne kuli kamakhumi kabili na chine, Wele Omunyali Owa Bioosi aboolela Hagai burume bwe khabili,

²¹khu Serubabeli, omuruki owa Yuda ali, “Ese ndi siimbi khuteremia likulu ne liloba,

²²khukhwakamia bubwami ne bunyali bwabwo. Ndaula kamakaari ke liie ne nabo bakatimia. Chifarasi chilifwa, ne babaandu bachitimia baliirana babeene khu beene.

²³Endaalo ng'ene eyo ndikhubukula ewe, Serubabeli omukholi wase, ne ndikhurobora ewe wamiie mu lisina liase. Ewe niye ndoboore.” Wele Omunyali Owa Bioosi owe bunyali bwoosi alomile.