Read lubukusu Sak. 1 Bible Online

Sak. 1 - lubukusu bible

Sak. 1

¹ Mu mwiiko kwa khabili mu mwesi kukhola munaane kwe khukhwamiia khwa Dario nga omwami owa Pasha, Wele Omunyali Owa Bioosi alomaloma no mung'oosi Sakaria okhwa Berekia, omwichukhulu owa Ito.

²Omwami Owe Banamae aboolela Sakaria khuboolela babaandu ali, “Ese Wele Omunyali Owa Bioosi, naambila bakuuka benywe lirima.

³Ne kakhali luno ndoma ndi, ‘Ngobolele ne ese ndamukobolela.

⁴Mukhaba nga bakuuka benywe nibo bang'oosi baboolela burume bwase khaale akho, khubakaania balekhe chingila chabwe che bubwoni ne bikholwa biabwe biibi ne kakhali se baulila namwe baria Wele Omunyali Owa Bioosi tawe.

⁵Bakuuka benywe abo luno bali waena? Ne bang'oosi babwe chana baliio ku?

⁶Naelesia bakuuka benywe kamalaka ne bukambisi bwase khubirira mu bakholi base bang'oosi, ne kakhali balekelesia mala banyoola butinyu. Nio bekanila mala bafukiilila bali ese Wele Omunyali Owa Bioosi owabaelesia siiukuumo nga baba ne benyekha lundi nga naba ne mbisiisie khukhola.’ ”

⁷Mu mwiiko kwa khabili nikwo Dario abela omwami, endaalo eye kamakhumi kabili na chine eye kumwesi kwe khumi na mulala (okwo nikwo kumwesi kwa Sebati), mu silo Wele Omunyali Owa Bioosi aelesia Sakaria burume mu malola.

⁸ Nio Sakaria aloma ali, “Mu silo mboone omundu natimia efarasi embesemu! Abeele emile mu mirongooro mwitooma, chifarasi chichiindi chibeele enyuma wewe chimbesemu, chingokhakokhe ne chiwaanga.”

⁹Nio namureeba ndi, “Omwami, sifuno sie chifarasi chino sili siina?” Angobosia ali, “Ndakhwekesia sifuno siacho.

¹⁰‘Wele Omunyali Owa Bioosi achirumire khucha khulambuula sibala.’ ”

¹¹Chifarasi chaboolela malaika owa Wele Omunyali Owa Bioosi chili, “Khwalambuulile sibala mala khwaboone khuli sibala sioosi sili ne kumuleembe.”

¹²Nio malaika owa Wele Omunyali Owa Bioosi aaloma ali, “Ee Omwami Owe Banamae olalekha khuba ne siisa khu Yerusalemu ne chingoba cha Yuda khukhwola siise siina? Ewe wababiyiile khu miiko kamakhumi saba.”

¹³Wele Omunyali Owa Bioosi mu likobosia aboolela malaika kamakhuwa ke khuoleelesia.

¹⁴Nio malaika amboolela ali, “Omwami Owe Banamae aloma ali, ‘Boola. Ndi ne busiime bukali khu Yerusalemu, lukoba lwase lutakatifu.

¹⁵Ne ese nakhalaliile babaandu Be Chikholo chichiindi bamenyile bulayi mu muleembe. Nga naba ne sikhiindia lirima liase khu baandu base, chikholo chana chatasa butinyu khu baandu base.’

¹⁶Khwako Wele Omunyali Owa Bioosi aloma ali, ‘Nakoboole mu lukoba lwa Yerusalemu khulukholela siisa. Enju yase elombakhwamo lundi. Ne Yerusalemu lukhapiimwe ne fuuti.’ ”

¹⁷Malaika amboolela khuloma lundi ndi, “Omwami Owe Banamae aloma ali, chingoba chewe chilaindiaala lundi mala alayeeta Yerusalemu lundi alurobore nga lulwewe.”

¹⁸Mumalola kakaandi nabona chinjika chine che chieeyi.

¹⁹Nio nareeba malaika owaba naloma nase ndi, “Chinjika chino chili na sifuno siina?” Angobosia ali, “Chiimeelela chikholo che kamaani mu sibala chisalanisie babaandu ba Yuda, Isiraeli ne Yerusalemu.”

²⁰Nio Wele Omunyali Owa Bioosi anjekesia bakholi batiilile chinyundo bane.

²¹Nareeba ndi, “Babaandu bano bechile khukhola siina?” Angobosia ali, “Bechile khuriikhirisia ne khukwisia Be Chikholo babonakakila elala sibala sia Yuda ne khusalanisia babaandu basio.”