Read lubukusu Sak. 10 Bible Online

Sak. 10 - lubukusu bible

Sak. 10

¹“Saba Wele Omunyali Owa Bioosi efula mu siise sie siruumbi khu mwiiko. Wele Omunyali Owa Bioosi niye oreeranga kamafuumbi, oelesianga babaandu efula, ne khuelesia buli mundu bibiaamo bikali.

² Babaandu bacha khu bang'oosi be bubeeyi, ne khurumikhira bifwaani. Ne kakhali buyeeti nibwo, banyoola buli bwe bubeeyi. Balala benoosia kamarooro ne kakhali bamutiimia busa mala baana buolelesi butaamba bukhala Khwako babaandu bayiiya nga kamakheese katibile.”

³Wele Omunyali Owa Bioosi aboola ali, “Lirima liase lili likali khu baayi, mala ndaukuuma babemeelesi, sikila ese Omwami Owe Banamae ndindanga babaandu base be nju eya Yuda ne ndabakhola babe nga chifarasi che kamaani mwiie.

⁴Khukhwama mu kholo eya Yuda khukhabe nende: baruki be kamaani nga libaale lie kumusiingi, balume nga sisiindi sie liiema, buyiingo bwe liie ne bakomanda buli ngano.

⁵Babaandu ba Yuda baliba ne bukhili nga banamae baula basiku babwe mwiie balipana sikila Wele Omunyali Owa Bioosi ali nabo, mala baliiula akhaba basiku be khu farasi.

⁶“Khaelesie babaandu ba Yuda kamaani, khasikule babaandu ba Isiraeli. Khabakholele siisa mala mbakobosie boosi engo. Ndiba ne siisa khu nibo ndibakobosia engo lundi. Ne baliba nga nibo yaba ese khekaana tawe. Ese ndi Wele Omunyali Owa Bioosi, Wele wabwe, khaulile kamasaba kabwe.

⁷Baisiraeli baliba ne kamaani nga banamae, bakhasangaale oli banywele endali. Lisaaye liabwe likhakhebulile bukhili buno mala balisangaala sikila niko Wele Omunyali Owa Bioosi akholile.

⁸“Khalaange babaandu base mala mbare alala, khabasikule mala batasikhe babe bakali nga baba khale.

⁹Akhaba ne mbasalanisie mu kholo, balikhebulila ese, bakhaba aleeyi arie, nibo ne babaana babwe baliiona mala bakobole engo.

¹⁰Khabareere engo khukhwama mu sibala sia Misiri mala mbabuusie khukhwama mu sibala sia Ashuru Khabareere mu maloba ka Kileati ne mu Lebanoni khukhwola nga balichulamo.

¹¹Ne babira mu nyanja yabwe eye butinyu, ese Wele Omunyali Owa Bioosi ndirusiao bibuli ne lusiba lwe luluuchi lwa Naili luliteenya. Babaandu ba Ashuru babelola baliambwa chisoni ne kamaani ke Bamisiri kaliwa.”

¹²Wele Omunyali Owa Bioosi alomile ali, “Ndikhola babaandu base babe ne kamaani, mala bakhasaaye ese ne khu khumbulila.”