Read lubukusu Sak. 11 Bible Online

Sak. 11 - lubukusu bible

Sak. 11

¹Yikula kimiliango kiowo Lebanoni, nio kumulilo kwosie kimirongooro kiowo kimitarakwa!

²Mirongooro kia Saipurasi, lila ne khu kukuula sikila kimitarakwa kiakwile, kimirongooro kie fuma ekio kionakwe! Mikhoonge kia Basiani, lila ne khu kukuula, sikila baberire kumusiru kukwasiimba!

³Ulila lukukuulo lwe babaayi, sikila efuma yabwe yachile! Rekeeresia liiulukhuma lie chitalang'i, sikila baberire kumusiru kuuli khu luuchi lwa Yoritani!

⁴Wele Omunyali Owa Bioosi, Wele wase amboolela ali, “Ba nga omwaayi we kamakheese niko benya khwiira.

⁵Babeeneko bakeera ne se banyoola siiukuumo tawe. Bakusia chinyama ne baloma bali, ‘Wele Omunyali Owa Bioosi afume! Khuli baiinda!’ Akhaba babaayi bako babeene se bakakholela siisa tawe.

⁶Wele Omunyali Owa Bioosi aaloma ali, se ndakholela lundi siisa omundu yesi yesi khu sibala tawe. Ese samwene ndara babaandu boosi mu makhono ke babaayi ne babemeelesi babwe. Babaayi ne babemeelesi balonakaka sibala ne se ndasikula omundu khukhwama mu makhono kabwe tawe.”

⁷Khwako ese Sakaria naba omwaayi we kamakheese niko bacheusi bacha khwiira. Nabukula chisiimbo chibili, ndala nakilanga ndi “Kumwalaalo” ne ekiindi nakilanga ndi “Buambaani.” Nio narakikha khukhwaya kamakheese.

⁸Naluiilila ne babaayi bataru babambiila mala nabeera mu mweesi mulala.

⁹Nio naboolela kamakheese ndi, “Se ndaba omwaayi wenywe lundi tawe. Ne mufwa mufwe, ne muramire mwakherana mwirane.”

¹⁰Nio nabukula esiimbo yase eyalaangwa “Kumwalaalo” nakifuna khurusiao endakaano niyo Wele Omunyali Owa Bioosi akhola ne babaandu Be Chikholo choosi.

¹¹Khwako endakaano yarusibwao endaalo ng'eneyo, ne abo babakulanga kamakheese ne khukusia baba bandoleelele mala bamanya bali Wele Omunyali Owa Bioosi niye owaba ne alomalome khubirira mu bikholwa nibio kholile.

¹² Nababoolela ndi, “Mwaaba ne mwenya, mbelesie kumuruungo kwase. Ne mukhenya tawe, lekha kube.” Nio banduunga bitonyi bie fwesa kamakhumi kataru.

¹³Wele Omunyali Owa Bioosi amboolela ali, bire mwibiikhilo lie Lukaangu, okwo kwaba kumuruungo kwase nikwo nenyekhanga khuruungwa khulwe kimilimo mu biise ebio. Nio nabukula bitonyi kamakhumi kataru bie fwesa ebio nara mu libiikhilo lie lukaangu lwa Wele Omunyali Owa Bioosi.

¹⁴Nio nafuna esiimbo yase eya khabili eyalaangwa Buambaani mala buambaani bwa Yuda ne Isiraeli bwawao.

¹⁵Nio Wele Omunyali Owa Bioosi amboolela lundi ali, “Ba lundi nga omwaayi otaamba bukhala.

¹⁶Narereo omwaayi khukhwaaya kamakheese kase. Omwaayi yuno se ayeeta kamakheese kacha khwirwa, namwe ayiime katibile, namwe asilikhe kaumiie, namwe alisie kamalamu tawe. Ne kakhali aliamo kamanefu, alia akhaba ne bikhakayu biako biakharurakho se abala khuba siindu tawe.

¹⁷Omwaayi wase okhali ne bukhala oyo tawe, alaamwe, owanjukha kamakheese! Embalu ekhoya yamurema kumukhono kwewe nende emoni yewe! Lekha kumukhono kwewe kufwokoye, ne emoni yewe eseecha ebofule.”